1 tasaluniki 2 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تاووري ن‑بولُس غ‑تاسالونيكي

¹ واي‑ايتماتنّغ، تسّنم كونّي ءيس‑ورد بلا لفايتّ ا‑نزّري ءوسّان‑ان غ‑گراتون.

² تسفلدم ف‑ماد‑اغ‑يجران لّيغ ءور‑تا‑ن‑نروح س‑دارون، سّرفوفنّ‑اغ مدّن غ‑تمدينت ن‑فيليبّي رگمن‑اغ باهرا، والاينّي ءيزّعام‑اغ ربّي‑نّغ باش اد‑اون‑نساول ف‑لخبار ءيفولكين لّي‑اغ‑يملا واخّا ءيلّا ما‑ياغ‑يتژين باهرا.

³ اشكو ءور‑ا‑نسّكيركيس ف‑مدّن لّيغ ا‑تن‑نتضالاب اد‑اغ‑سفليدن، ءولا‑دا‑نتّيري ما‑يگان وينسن ءولا‑دا‑نتّيري ا‑ستّ‑فلّاسن‑نزّري.

⁴ والاينّي ار‑نساوال س‑مكلّي گينّغ ءيرا ربّي لّي‑اغ‑يورمن ءيفك‑اغ اد‑اسن‑نسّلكام لخبار‑اد ءيفولكين. ءور‑ا‑نسكار ف‑ا‑نترضو بنادم والاينّي ار‑نسكار ف‑ا‑نرضو ربّي لّي‑يتارمن ءول‑نّغ.

⁵ تسّنم ءيس‑ور‑ا‑كُن‑نتالغ غ‑ووسّان‑ان س‑يواليون خوانين ءولا‑دا‑نسكار سين‑وودماون باش ا‑نتامژ كرا ف‑واوال‑نّغ. ربّي ا‑فلّانّغ‑يگان ءينيگي.

⁶ ءور‑جّو‑نسكير ف‑اد‑اغ‑تالغم كونّي ءولا وييّاض.

⁷ واخّا نژضار ا‑زگيگون‑نضالب ما‑يگّوتن ف‑سّيبت ن‑ما‑نگا ءيرقّاسن لّماسيح، نرخا‑بدّا ديدون زوند تامغارت لّي‑ستّ‑يتاوين غ‑تاروا‑نس مژّينين.

⁸ تعزّام دارنّغ س‑كيگان ايلّيغ نوجاد اد‑اون‑ين‑نفك ءورد غير لخبار ءيفولكين والاينّي نفرح ا‑فلّاون‑نفك ءولا ءيخف‑نّغ. غونشكاد ا‑دارنّغ‑تعزّام.

⁹ واي‑ايتماتنّغ، ءيس‑ور‑دي‑تسوانگمّ منشك ا‑نتخدام ار‑نتنهاتاف غ‑گراتون؟ نكّا‑تّين ار‑نتخدام غ‑ييض ءولا ازال باش ا‑فلّاون‑ور‑نژّاي لّيغ ا‑ياون‑نتبرّاح س‑لخبار ءيفولكين ن‑ربّي.

¹⁰ كونّي تگام ءيناگان فلّانّغ، ءولا ربّي ءيگا فلّانّغ ءينيگي ن‑يس‑يشوا ءيفولكي كولّو ما‑نسكر غ‑گراتون كونّي لّي‑يومنّ، ءور‑جّو‑گينّغ‑يلّي كرا لّعيب غ‑دارون.

¹¹ تيسّانم ءيس‑ا‑نسكار د‑كرايگاتّ يان گيگون غمكلّي ءيسكار‑ورگاز د‑تاروا‑نس عزّانين. ار‑كُن‑نزّعام ار‑فلّاون‑نسّفجّيج،

¹² ار‑كُن‑نتنصاح نيني‑اون ا‑تسكارم غمكلّي‑د‑يقّانّ غويلّي گانين وين ربّي لّي‑اون‑د‑يغران ا‑تكشمّ س‑تگلديت‑نس ءولا لمجد‑نس.

¹³ ماياد‑داغ ا‑ف‑ا‑بدّا‑نتشكار ربّي، اشكو غاكود لّيغ تسفلدم ءي‑واوال ن‑ربّي لّي‑اون‑ين‑نيوي، تامژم گيس تامنم ءيزد اوال ن‑ربّي ا‑يگا، ءورد اوال ن‑بنادم. س‑صّاحت اوال ن‑ربّي ا‑يگا، ءيخدم غيلاد غ‑وولاون‑نّون كونّي لّي‑سرس‑يومنّ.

¹⁴ اشكو ءيجرا غ‑دارون اي‑ايتما، غمكلّي ءيجران غ‑دار ءيمناگّارن ن‑ربّي لّي‑ومنّين س‑لماسيح ياسوع غ‑تمازيرت ن‑يودايا. ترفوفنم ف‑وفوس ن‑ايت‑تمازيرت‑نّون غمكلّي رفوفنّ نتني ف‑وفوس ن‑ايت‑يودايا.

¹⁵ اشكو ايت‑يودايا ا‑ينغان سيديتنّغ ياسوع ءولا لانبيا، سّمسرن‑اغ ءولا نكُّني. ار‑تّ‑سّطيّارن ءي‑ربّي ار‑سكارن گار غ‑كولّو مدّن،

¹⁶ اشكو ار‑ن‑تگّان تيقّي‑نسن ف‑اد‑اغ‑سّفسّان ا‑ور‑نتبرّاح ءي‑ايت‑تميزار ياضني س‑واوال لّي‑س‑راد‑نجمن. غمكاد ا‑س‑ا‑تعمّارن لعبرت ن‑دّنوب‑نسن. ءيمّا غيلاد غ‑تگيرا ءيگّوز‑د فلّاسن لغاضاب ن‑ربّي.

ءيژوژض بولُس ا‑يژر ايتماتن

¹⁷ ءيشقا فلّانّغ ا‑ديدون‑ننگارا اي‑ايتماتنّغ. واخّا‑د‑فلّاون‑ياگّوگ‑وودم‑نّغ، ءيقاما‑ن‑بدّا‑ديدون‑وول‑نّغ. منشك ا‑باهرا‑نتّيري ا‑كُن‑نژر.

¹⁸ نسكر كولّو ف‑ا‑كُن‑نژر. منّاوت‑توال ژوژضغ نكّي بولُس ا‑ن‑دارون‑وورّيغ، والاينّي ار‑اغ‑يتحصار شيطان.

¹⁹ اشكو غاكود لّيغ را‑د‑ياشك سيديتنّغ ياسوع، ما‑را‑يگ تّاج ن‑رّجا‑نّغ ذ‑لفرح‑نّغ لّي‑س‑را‑نزعم غ‑لگدّام‑نس، ابلا كونّي؟

²⁰ يياه، كونّي ا‑يگان لمجد‑نّغ د‑لفرح‑نّغ.