1 tasaluniki 1 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ زغ‑بولُس د‑سيلا د‑تيموتاوس، ءي‑ومناگّار ن‑ويلّي گانين وين ربّي باباتنّغ د‑سيديتنّغ ياسوع لماسيح غ‑تمدينت ن‑تاسالونيكي. اد‑اون‑تيلي لباراكا د‑سّلامت.

لفرح ن‑بولُس س‑ايتماتن

² ار‑بدّا‑نتشكار ربّي فلّاون كولّوكن. غاكود نّا‑نتژالّا ار‑كُن‑د‑نادّر،

³ ار‑د‑نسوينگيم غ‑لگدّام ن‑ربّي باباتنّغ مامنك ا‑كولّو‑تسكارم س‑ليمان‑نّون، ار‑تّخدامّ س‑لحنانت، تزگام غ‑رّجا ن‑سيديتنّغ ياسوع لماسيح.

⁴ واي‑ايتماتنّغ لّي‑ف‑يحنّا ربّي، نسّن ءيس‑كُن‑يژلي ا‑تگم وينس،

⁵ اشكو ءيلكم‑اون‑ين لخبار‑نّغ ءيفولكين، ءورد غير س‑يواليون والاينّي س‑لقوّا ءولا س‑تحكيمت ن‑رّوح لقودوس ايلّيغ‑اون‑يبان ءيس‑يگا لحقّ. تسّنم كونّي مامنك ا‑نگا غ‑ووسّان لّي‑نزّري غ‑گراتون، نسكر كولّو ف‑ا‑كُن‑نتعاوان.

⁶ توورّيم تسكرم ءولا كونّي غمكلّي نسكار نكُّني ءولا سيديتنّغ. واخّا ترفوفنم باهرا، تومژم غ‑واوال‑نس س‑لفرح ن‑رّوح لقودوس.

⁷ غمكان ا‑س‑تملام ءي‑كولّو ءيمومنّ غ‑تميزار ن‑ماكيدونيّا د‑اخايا مامنك ا‑تن‑د‑يقّان اد‑سكارن ءولا نتني.

⁸ والاينّي ءورد غير ماكيدونيّا د‑اخايا ا‑ن‑يلكم‑واوال ن‑سيديتنّغ ف‑سّيبت‑نّون، اشكو سفلدن مدّن غ‑كرايگاتّ ماني ف‑مامنك ا‑تومژم اغاراس ن‑ربّي، ايلّيغ ءور‑اغ‑يخصّا ا‑نيني يات ف‑مايد ءيجران.

⁹ اشكو ار‑كولّو‑تّينين مدّن ف‑مامنك اد‑اغ‑تقبلم لّيغ‑ن‑دارون‑نوشكا، تفلم ءيلاهات ن‑دّونيت‑اد، توورّيم س‑ربّي باش ا‑تّخدامّ ءي‑ربّي لّحقّ لّي‑يدّرن.

¹⁰ ار‑تّينين ف‑مامنك ا‑تّقلم غيلاد س‑يوس لّي‑د‑يسّنكر زغ‑لموت ار‑د‑يوورّي زغ‑يگنّا، ا‑ت‑يگان د‑ياسوع لّي‑اغ‑يجّنجمن زغ‑لغاضاب لّي‑را‑يتّوت ف‑دّونيت.