1 kurintus 9 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تاووري ن‑ورقّاس

¹ ءيس‑ور‑ژضارغ اد‑سكارغ غمكنّا ريغ؟ ءيس‑ور‑گيغ ارقّاس؟ ءيس‑ور‑ژريغ سيديتنّغ ياسوع؟ ءيس‑ور‑تگيم كونّي صّابت لّي‑ف‑خدمغ س‑يسم ن‑سيديتنّغ؟

² واخّا ءيلّا ما‑يّي‑ور‑يگين د‑ورقّاس، تسّنم كونّي ءيس‑ت‑گيغ، اشكو ءيبان گيگون ما‑يسكر سيديتنّغ ف‑وفوس‑ينو س‑ترقّاست لّي‑يّي‑يفكا.

³ غمكاد ا‑س‑ا‑تراراغ اوال ءي‑ويلّي سري تاشتكّانين.

⁴ ءيس‑ور‑داري لحقّ اد‑شتّاغ ار‑سّاغ ءولا نكّي؟

⁵ ءيغ‑ا‑تمودّوغ ءيس‑ور‑داري لحقّ ا‑ديدي‑تاويغ تامغارت تامومنت زوند ءيرقّاسن ياضني د‑ايتماس ن‑سيديتنّغ د‑بطرُس؟

⁶ ءيزد غير نكّي د‑بارنابا كا‑يخصّا ا‑نتخدام غ‑تووري ياضني باش ا‑نتامژ ما‑نشتّا؟

⁷ مان اعسكري ءيكشمن س‑يميغ ار‑سول‑يتصيّار ف‑يخف‑نس؟ ما‑يژّان اضيل ءور‑ا‑يشتّا زغ‑لغلّت‑نس؟ ما‑يكسان تاوروت ءور‑ا‑يسّا زغ‑وكُّفاي‑نس؟

⁸ والاينّي ءورد غير لمعني ن‑بنادم ا‑س‑نسّن تيغاوسيوين‑اد. ار‑فلّاسنت‑يتّيني شّرع ءولا نتّا.

⁹ اشكو غ‑شّرع ن‑موسا ا‑غ‑يتيارا: «ا‑ور‑تگت اغامو ءي‑وزگر لّي‑يسرواتن.» ءيزد غير ءيزگارن ا‑يقصاد ربّي غ‑واوال‑اد؟

¹⁰ ءيس‑ورد نكُّني ا‑يعنا غ‑ما‑ينّا؟ هاتي ف‑سّيبت‑نّغ ا‑ف‑يتيارا‑واوال‑اد، اشكو غوالّي ءيكّرزن ءولا غوالّي ءيمگّرن ءيقّان‑تن‑د ا‑ن‑ترجون غ‑تاغامت ن‑صّابت.

¹¹ نكُّني نلوح‑ن دارون امود ن‑رّوح. ءيس‑ور‑دارنّغ لحقّ ا‑دارون‑نمگر كرا لّخير لّي‑تحتاجّا دّات؟

¹² لّان وييّاض ار‑دارون‑تامژن تاغامت لّخير، ءيمّا نكُّني ءيس‑ور‑راد‑اغ‑تيلي تاغامت يوگُرن تينسن؟ والاينّي ءور‑جّو‑نضالب لحقّ‑نّغ. نصامح غ‑مايان كولّوت، باش ا‑ور‑نتحصار تابرّاحت لّخبار ءيفولكين لّماسيح.

¹³ ءيس‑ور‑تسّينم، غويلّي تخدامنين غ‑تگمّي ن‑ربّي ءيزد ما‑يتياوفكان ءي‑تگمّي ن‑ربّي ا‑زغ‑ا‑شتّان؟ ءيس‑ور‑تسّينم، غويلّي سكارنين تاووري ن‑وژرو ن‑تغرسي ءيزد تيغرسيو‑ان ا‑زغ‑ا‑شتّان؟

¹⁴ غمكان ا‑يوصّا سيديتنّغ ءولا ف‑ويلّي تبرّاحنين غيلاد س‑لخبار ءيفولكين، باش اد‑تامژن ماد‑حتاجّان ف‑سّيبت ن‑تووري ن‑تبرّاحت لّي‑سكارن.

¹⁵ ءيمّا نكّي ءور‑جّو‑ضالبغ لحقّ‑ينو. تابرات‑اد، ءور‑اون‑تّ‑ين‑وريغ باش اد‑امژغ كرا ءي‑يخف‑ينو. اشكو يوف داري اد‑مّتغ ءولا ءيكّيس فلّا كرا ن‑يان لفرح‑اد داري ءيلّان س‑مايد سكارغ.

¹⁶ والاينّي ءيغ‑ا‑تبرّاحغ س‑لخبار ءيفولكين، ءور‑ژضارغ اد‑الغّ ءيخف‑ينو ف‑مايد سكرغ، اشكو ءيقّان‑يّي‑د اد‑سكارغ غمكاد. تاگوضي ا‑راد‑يّي‑ييلي ءيغ‑ور‑ا‑تبرّاحغ س‑لخبار ءيفولكين.

¹⁷ مراد ءيزد نكّي ا‑يقصادن تاووري‑اد، راد‑يريغ ا‑فلّاس‑تامژغ تيغراد‑ينو. والاينّي تقّان‑يّي‑د‑تووري‑اد، اشكو ربّي ا‑زگيگي‑يران ا‑ستّ‑سكارغ.

¹⁸ ءيمّا غيلاد ما‑يگان تيغراد‑ينو؟ ا‑تنت‑يگان د‑ماياد. ژضارغ اد‑سّلكامغ لخبار ءيفولكين ءي‑مدّن بلا زگيسن حتاجّاغ يات، ءولا‑دا‑زگيسن‑تضالابغ ماد‑ستهلّاغ ف‑تووري‑اد ن‑تبرّاحت.

¹⁹ نكّي گيغ وين ءيخف‑ينو، ژضارغ اد‑سكارغ مكنّا ريغ. والاينّي گيغ ءيخف‑ينو د‑يسمگ ءي‑كولّو مدّن، باش ا‑زگيسن‑رارغ ويد گّوتنين ءي‑ربّي.

²⁰ گيغ ءيخف‑ينو د‑گو‑يودايا غ‑دار ايت‑يودايا، باش اد‑رارغ ايت‑يودايا ءي‑ربّي. گغ ءيخف‑ينو د‑بو‑شّرع غ‑دار ايت‑شّرع، واخّا ءور‑يّي‑د‑يقّان شّرع، باش اد‑رارغ ءولا ايت‑شّرع ءي‑ربّي.

²¹ گغ ءيخف‑ينو د‑واد ءور‑يسّينّ شّرع غ‑دار ويلّي ءور‑سّينّين شّرع، باش اد‑رارغ ءولا غويلّي ءور‑سّينّين شّرع ءي‑ربّي. والاينّي ءور‑جّود نكّين ا‑يفّوغن زغ‑شّرع ن‑ربّي اشكو ار‑بدّا‑سكارغ س‑ولمّود لّماسيح.

²² گغ ءيخف‑ينو د‑واد ءيضعفن غ‑دار ويلّي ضعفنين، باش اد‑رارغ ءولا غويلّي ضعفنين ءي‑ربّي. غ‑دار كولّو مدّن ار‑توورّيغ گغ زغ‑گيسن باش اد‑افغ مامنك اد‑زگيسن‑جّنجامغ كرا.

²³ كولّو ماياد، ار‑ت‑سكارغ باش اد‑سّلكمغ لخبار ءيفولكين ءي‑مدّن، كشمغ ديدسن غ‑تامونت‑نس.

²⁴ تسّنم ءيس‑يگّوت ما‑يسكارن شالا ن‑تيزّلا والاينّي غير يان ا‑را‑گيسن‑يامژ لكاس. تازّالات غيلاد باش ا‑تامژم لكاس.

²⁵ كولّو وانّا ءيتازّالن ار‑يسّدوس ءيخف‑نس. ار‑ت‑يسّدوس باش ا‑يامژ كرا لّكاس لّي‑ور‑را‑يدوم. ءيمّا نكُّني ار‑نسّدوس ءيخفاون‑نّغ باش ا‑نامژ لكاس لّي‑راد‑بدّا‑يدوم.

²⁶ ءور‑ا‑تازّالغ نكّي بلا لفايتّ ءولا‑دا‑سكارغ توكُّيمت زوند يان ءيكّاتن غير اضو.

²⁷ والاينّي ار‑سّدوسغ دّات‑ينو ار‑گيس‑تنباضغ، باش ا‑ور‑يّي‑يسّوفغ ربّي غ‑يسيگُّرا نكّي لّي‑ياد‑يتبرّاحن ءي‑وييّاض.