1 kurintus 8 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

اسقسي ف‑ما‑يتياوغراسن ءي‑لاصنام

¹ ءيمّا تيفيّي ن‑تغرسيو لّاصنام، نسّن ما‑فلّاس‑تّينين مدّن: «نطّاف كولّواغ ‹تاواسّنا›.» هاتي تاواسّنا ار‑تسّوفّ بنادم، ءيمّا تايري ار‑تي‑تسّدوس.

² يان ءيغالن ءيس‑يسّن كرا، ءور‑تا‑يسّين غمكلّي‑ت‑يخصّا ا‑ييسّان.

³ والاينّي يان ءيتّيرين ربّي، هاتين ءيتياوسّان دار ربّي.

⁴ ءيمّا غويلّي شتّانين تيفيّي ن‑تغرسيو لّاصنام، نسّن فلّاسن ءيزد «كولّو لاصنام ن‑دّونيت‑اد ءور‑ا‑سكارن يات.» نيسّان ءيزد «يان‑ربّي كا‑يلّان.»

⁵ ءور‑نتّو لارواح ن‑يگنوان ءولا وين‑واكال لّي‑زغ‑ا‑سكارن مدّن ‹ءيد‑ربّي›، اشكو نتني گّوتن دارسن ءيد‑ربّي‑نسن د‑يد‑سيديتسن.

⁶ ءيمّا نكُّني، يان‑ربّي اد‑دارنّغ‑يلّان لّي‑مي‑نگا وينس، ا‑ت‑يگان د‑باباتنّغ لّي‑يخلقن كولّو ما‑يلّان. د‑يان‑سيديتنّغ اد‑دارنّغ‑يلّان لّي‑س‑نلّا، ا‑ت‑يگان د‑ياسوع لماسيح لّي‑س‑يتياوخلاق كولّو ما‑يلّان.

⁷ والاينّي تاواسّنا‑ياد ءور‑تّ‑سّينّ كولّو مدّن. اشكو كرا گيسن ءيميار لاصنام باهرا. ءيغ‑دّان غيلاد ار‑شتّان تيفيّي‑ان راد‑سوانگمن ءيزد تيفيّي لّاصنام ا‑تگا. راد‑اسن‑طيّر ار‑سّحسّون ءيس‑را‑تن‑تسّركو، اشكو ءور‑تا‑سّينّ مامنك اد‑ژّمژلاين ما‑يفولكين زغ‑ما‑يُخشنّ.

⁸ ءيمّا ربّي، ءورد امشّو ا‑س‑را‑ت‑نرضو. ءور‑دارس‑نُخشين ءيغ‑ت‑نشّا، ءولا نشوا دارس ءيغ‑ور‑ت‑نشّي.

⁹ والاينّي ءيلّا فلّاون ا‑ترارم لعاقل ءيغ‑ترام ا‑تسكارم س‑لحقّ‑نّون، ا‑ور‑تّگّام تابايضّرت ءي‑ويلّي مي ءيضعف ليمان‑نسن.

¹⁰ اشكو يان ءور‑باهرا‑يسّينّ ما‑يفولكين زغ‑ما‑يُخشنّ، ءيغ‑ك‑يژرا كيّي لّي‑دار ‹تاواسّنا› ار‑تشتّات غ‑تگمّي لّاصنام، ءيس‑ور‑را‑ت‑يزّعام مايان ا‑يشّ ءولا نتّا تيفيّي لّاصنام؟

¹¹ هاتي س‑تواسّنا‑نّك ا‑س‑را‑تهلكت غوالّي ءيضعفن، ءيگان گماك لّي‑ف‑يمّوت لماسيح.

¹² وانّا ءيسكرن كرا ن‑دّنب ءي‑ايتماس، ءيسّياگّاس غويلّي ءور‑تا‑سّينّين مامنك اطّون افولكي زغ‑لخُشانت، هاتين لماسيح ا‑مي‑يسكر دّنب.

¹³ ماياد ا‑ف‑راد‑اون‑ينيغ، ءيغ‑را‑يضر گما ف‑سّيبت ن‑ماد‑شتّاغ، ءور‑سار‑راد‑شّغ تيفيّي، باش ا‑ور‑سّضرغ گما.