1 kurintus 7 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

ءيسقسيتن ف‑ليتّيهال

¹ ءيمّا تيغاوسيوين لّي‑ف‑دي‑تورام، راد‑اون‑فلّاسنت‑ينيغ: ءيشوا ءي‑ورگاز ا‑ور‑ياوي تامغارت.

² والاينّي را‑ياف ءيغ‑يلّا كرايگاتّ ارگاز س‑تمغارت‑نس، تيلي كرايگاتّ تامغارت س‑ورگاز‑نس، ف‑سّيبت ن‑ا‑ور‑ييلي لفساد.

³ ءيلّا ف‑ورگاز ا‑يفك ءي‑تمغارت‑نس لحقّ ن‑تمغارت، ييلي ف‑تمغارت ا‑تفك ءي‑ورگاز‑نس لحقّ ن‑ورگاز.

⁴ اشكو ءور‑سول‑تگي دّات ن‑تمغارت تين‑تمغارت، والاينّي تگا تين‑ورگاز‑نس. ءور‑سول‑تگي دّات ن‑ورگاز تين‑ورگاز والاينّي تگا تين‑تمغارت‑نس.

⁵ ءيلّا فلّاون ا‑ور‑تحصارم ءي‑نگراتون، ابلا ءيغ‑دي‑تمشاشكام ا‑تژليم كرا ن‑ووسّان تلهوم گيسن س‑تژالّيت. والاينّي ءيغ‑زرين‑ووسّان‑ان ءيلّا فلّاون ا‑توورّيم س‑ينگراتون، ا‑ور‑كُن‑يغرّو شيطان ءيغ‑ور‑سول‑تژضارم ا‑تصبرم.

⁶ مايد‑اون‑نّيغ ءور‑كُن‑سرس‑وميرغ، والاينّي ءودجيغ‑كُن ا‑تسكارم س‑غمكاد ءيغ‑ترام.

⁷ ريغ كولّو مدّن اد‑گن زوند نكّي، والاينّي كرايگاتّ يان د‑ماد‑اس‑يفكا ربّي. يان ءيتياوفكا‑ياس ا‑يگ غمكاد، د‑يان ءيتياوفكا‑ياس ا‑يگ غمكان.

⁸ ءيمّا غويلّي ءور‑تاهلنين ءولا ختيلّي گانين تيهجّالين، راد‑اسن‑ينيغ: را‑يشوو ءيغ‑قامان واحدوتن زوند نكّي.

⁹ والاينّي ءيغ‑ور‑ژضارن اد‑نبضن غ‑يخف‑نسن ءيلّا فلّاسن اد‑تاهلن. را‑ياف ءيغ‑تاهلن ءولا‑دا‑تن‑تجدّر شّهاوا.

¹⁰ ءيمّا غويلّي تاهلنين، راد‑اسن‑فكغ لوصيت‑اد. ءورد نكّي ا‑تن‑يوصّان والاينّي سيديتنّغ. ءيلّا ف‑تمغارت ا‑ور‑تفل ارگاز‑نس،

¹¹ والاينّي ءيغ‑تي‑تفل ءيلّا فلّاس ا‑تقاما واحدوتّ نغد ا‑دي‑توورّي س‑دار‑ورگاز‑نس. ييلي ف‑ورگاز ا‑ور‑يفرو ءي‑تمغارت‑نس.

¹² ءيمّا وييّاض راد‑اسن‑ينيغ ماياد. نكّي ا‑ت‑ينّان ءورد سيديتنّغ. وانّا گيگون ءيطّافن تامغارت ءور‑يگين تامومنت، ءيلّا فلّاس اد‑اس‑ور‑يفرو ءيغ‑ترا ا‑ديدس‑تقاما.

¹³ تانّا گيگونت ءيطّافن ارگاز ءور‑يگين امومن، ءيلّا فلّاس اد‑اس‑ور‑تفرو ءيغ‑يرا ا‑ديدس‑يقاما.

¹⁴ اشكو ف‑سّيبت ن‑تمغارت تامومنت ا‑ف‑يرضا ربّي ف‑ورگاز‑نس. ءولا ف‑سّيبت ن‑ورگاز امومن ا‑ف‑يرضا ربّي ف‑تمغارت‑نس. مراد ءيس‑ور‑يگي غمكاد راد‑گن تاروا‑نسن زوند تاروا ن‑ويلّي ءور‑سّينّين ربّي، والاينّي نسّن ءيزد س‑صّاحت ءيرضا ربّي ف‑تاروا‑نسن.

¹⁵ ءيمّا ارگاز لّي‑ور‑يومينّ، ءيغ‑يرا ا‑يفرو ءي‑تمومنت، ءيسكر‑ييت غمكلّي ءيرا. ءولا تامغارت لّي‑ور‑يومينّ، ءيغ‑ترا ا‑تفرو ءي‑ومومن تسكر‑ييت غمكلّي ترا. ءيغ‑يلّا غمكاد ءور‑سول‑تياوكرّافن ءيمومنّ، اشكو ربّي ءيقصاد گيگون اد‑اون‑تيلي سّلامت.

¹⁶ والاينّي سوانگم ا‑تامغارت تامومنت، ءيس‑تسّنت ءيس‑ور‑را‑تجّنجمت ارگاز‑نّم؟ سوانگم اي‑ارگاز امومن، ءيس‑تسّنت ءيس‑ور‑را‑تجّنجمت تامغارت‑نّك؟

قامايات ف‑ايلّي‑ف‑كُن‑د‑يوفا سيديتنّغ

¹⁷ والاينّي ءيلّا ف‑كود يان ا‑يقاما غمكلّي‑ف‑ت‑يد‑يوفا سيديتنّغ غاكود لّيغ‑اس‑د‑يغرا، ءيقاما غ‑تاغامت لّي‑اس‑يفكا ربّي. غمكاد ا‑س‑ا‑توصّاغ غ‑يمناگّارن كولّوتن.

¹⁸ وانّا ءيطّافن تاژالّيت ن‑دّات‑نس غاكود لّيغ‑اس‑د‑يغرا سيديتنّغ، ا‑ور‑ييري ا‑يگ زوند غويلّي ءور‑تّي‑طّافنين. ءيمّا وانّا ءور‑يطّافن تاژالّيت‑ان غاكود لّيغ‑اس‑د‑يغرا، ا‑ور‑ييري ا‑يژّالّ ي‑دّات‑نس.

¹⁹ اشكو تاژالّيت ن‑دّات ءور‑تگي يات، زوند ءيغ‑اس‑يژّولّا زوند ءيغ‑اس‑ور‑يژّولّي. ءيمّا تاغاوسا ءيهيّان ا‑ستّ‑يگان ا‑نسكار س‑لوصيّات ن‑ربّي.

²⁰ ءيلّا ف‑كرايگاتّ يان ا‑يقاما غمكلّي‑ت‑يد‑يوفا سيديتنّغ غاكود لّيغ‑اس‑د‑يغرا.

²¹ ءيغ‑تگيت ءيسمگ غاكود لّيغ‑اك‑د‑يغرا، اد‑اك‑ور‑طيّر ف‑مايان. والاينّي ءيغ‑توفيت مامنك ا‑س‑توورّيت ا‑تگت وين ءيخف‑نّك، سكر ما‑مي‑توفيت.

²² اشكو وانّا ءيگان ءيسمگ غاكود لّيغ‑اس‑د‑يغرا سيديتنّغ، هاتي يوورّي ءيگا وين ءيخف‑نس غ‑لگدّام ن‑سيديتنّغ. ءيمّا وانّا ءيگان وين ءيخف‑نس غاكود لّيغ‑اس‑د‑يغرا، يوورّي ءيگا نتّا ءيسمگ لّماسيح.

²³ ءيسغا‑كُن لماسيح ءيفك فلّاون اتيگ‑نّون. ءيمّا غيلاد ا‑ور‑تفكم ءيخفاون‑نّون ا‑تگم ءيسمگان ءي‑بنادم.

²⁴ واي‑ايتما، ءيلّا ف‑كود يان ا‑يقاما د‑ربّي غمكلّي‑ت‑يد‑يوفا غاكود لّيغ‑اس‑د‑يغرا.

ءيسقسيتن ف‑ويلّي ءور‑تاهلنين

²⁵ ءيمّا غويلّي ءور‑تا‑تاهلنين، ءور‑داري فلّاسن كرا لّوصيت زغ‑سيديتنّغ. والاينّي راد‑اون‑ينيغ ماد‑سوانگمغ نكّي لّي‑ف‑يرحم ربّي ءيگ‑يّي د‑واد ءيزگان غ‑وغاراس‑نس.

²⁶ هاتي ف‑سّيبت ن‑تنوكموت لّي‑يلّان غ‑ووسّان‑اد، نّيغ نكّي را‑ياف اد‑قامان مدّن غمكلّي گان.

²⁷ ءيغ‑تطّافت تامغارت ا‑ور‑تّي‑تفلت. ءيغ‑ور‑تطّافت تامغارت ا‑ور‑تيريت ا‑تّاهلت.

²⁸ ءيغ‑تّاهلت تامغارت ءورد دّنوب ايان. ءيغ‑تّاهل‑تفروخت ءورد دّنوب ايان. والاينّي غويلّي تاهلنين، ءيشابوكن ن‑دّونيت ا‑غ‑راد‑يلين. هاتي ريغ ا‑كُن‑كّيسغ ءي‑غايان.

²⁹ واي‑ايتما راد‑اون‑ينيغ، ءور‑سول‑تقاما لوقت ءيگّوتن. غيلاد س‑وفلّا ءيلّا ف‑ويلّي طّافنين تامغارت اد‑سكارن زوند ءيغ‑تّ‑ور‑طّافن.

³⁰ ءيلّا ف‑ويلّي الّانين اد‑سكارن زوند ءيغ‑ور‑الّان. ءيلّا ف‑ويلّي ضصّانين اد‑سكارن زوند ءيغ‑ور‑ا‑ضصّان. ءيلّا ف‑ويلّي ساغنين اد‑سكارن زوند ءيغ‑ور‑يگي يات وينسن.

³¹ ءيلّا ف‑ويلّي سالانين تيغاوسيوين ن‑دّونيت ا‑ور‑لهون ءيخف‑نسن س‑دّونيت، اشكو دّونيت‑اد تاكمور ا‑تتمّو.

³² ريغ ا‑ور‑دارون‑تيلي تاغوفت. ارگاز نّا‑ور‑يتاهيلن، ار‑يتلهو س‑تغاوسيوين ن‑سيديتنّغ، اشكو ار‑يتّيري ا‑يرضو سيديتنّغ.

³³ ءيمّا وانّا ءيتاهلن، ار‑ت‑سّلهاونت‑تغاوسيوين ن‑دّونيت اشكو ار‑يتّيري ا‑يرضو تامغارت‑نس.

³⁴ ار‑ن‑يتافا ءيخف‑نس غ‑گر سنات‑تنباضين. تافروخت نغد تامغارت نّا‑ور‑يتاهيلن، ار‑تّلهو س‑تغاوسيوين ن‑سيديتنّغ، اشكو ار‑تّيري ا‑تگ تينس تّياوژلاي كولّو ءي‑سيديتنّغ. ءيمّا تامغارت نّا‑يتاهلن ار‑تّ‑سّلهاونت‑تغاوسيوين ن‑دّونيت اشكو ار‑تّيري ا‑تّرضو ارگاز‑نس.

³⁵ نّيغ‑اون ماياد باش اد‑اون‑تيلي سّلامت. ءور‑ريغ ا‑ن‑فلّاون‑ژّيژايغ، والاينّي ريغ ا‑تسكارم ما‑يفولكين ار‑بدّا‑تّلهوم س‑ما‑يرضان سيديتنّغ.

³⁶ ءيمّا وانّا ءيغالن ءيس‑ا‑يسكار ما‑ور‑يفولكين د‑تالّي‑ن‑يضالب ار‑فلّاس‑تسّايك شّهاوا‑نس ييري ا‑ستّ‑ياوي، ادجات‑تن اد‑تاهلن. ءور‑را‑يگ مايان دّنوب.

³⁷ ءيمّا وانّا ءيدوسن ءيزگا غ‑وول‑نس ءينبض غ‑ما‑يرا ءيسكر د‑يخف‑نس ا‑ستّ‑ور‑يتاهل، ءيفولكي‑نّيت مايان.

³⁸ غوالّي ءيتاهلن، افولكي ايد ءيسكر. ءيمّا غوالّي ءور‑يتاهيلن ءيسكر افولكي س‑وگُّار.

³⁹ تياوكرّاف‑تمغارت س‑ورگاز‑نس ماحدّ سول ءيلّا غ‑دّونيت. ءيغ‑يمّوت‑ورگاز را‑تّياوفساي‑تمغارت. غاكودان را‑تيژضار ا‑تّاهل وانّا ترا، ءيغ‑يگا وين سيديتنّغ.

⁴⁰ والاينّي ءيرواس‑يّي ءيس‑را‑تفرح‑تمغارت ءيغ‑تقاما واحدوتّ. ماياد اد‑نّيغ نكّي، والاينّي ءيرواس‑يّي ءيس‑يّي‑ت‑يد‑يملا رّوح ن‑ربّي.