1 kurintus 6 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

ا‑ور‑تصرضم ءي‑نگراتون

¹ ءيغ‑يلّا يان گيگون دارس كرا‑ف‑ا‑يصراض ءي‑گماس امومن، ءيس‑را‑يزعم ا‑ت‑ياوي س‑دار كرا لّقاضي لّي‑ور‑يسّينّ ربّي، ءور‑ت‑ييوي س‑دار ءيمژلاين لّماسيح؟

² ءيس‑ور‑تسّينم ءيزد ءيمژلاين لّماسيح ا‑را‑يحكام ف‑دّونيت كولّوتّ؟ لّيغد كونّي ا‑را‑يحكام ف‑دّونيت، ءيس‑ور‑تژضارم ا‑تّحكامّ ف‑يصراض‑اد مژّينين؟

³ ءيس‑ور‑تسّينم ءيزد نكُّني ا‑را‑يحكام ف‑لمالايكا؟ ءيمّا غيلاد ءيس‑ور‑نژضار ا‑نتحكام ف‑تغاوسيوين ن‑تودرت‑اد؟

⁴ ءيغ‑دارون‑يلّا كرا ن‑وصراض، ماخ ا‑تّيريم ا‑تي‑تسّلكمّ ءي‑ويلّي ءور‑گينين يات دار‑ومناگّار ن‑ايتماتن؟

⁵ ءيس‑كُن‑ور‑يشّحشّيم غايد تسكارم؟ ءيس‑ور‑گيگون‑يلّي يان ءيطّافن لعاقل ييژضار ا‑يسّنفاصال ايتماتن ن‑ومناگّار؟

⁶ ءيمّا كونّي، هان سول‑نّيت دارون ايتماتن ار‑صراضن ءي‑نگراتسن. هان دار‑ويلّي ءور‑سّينّين ربّي ا‑س‑ا‑ياسن‑صراضن.

⁷ ءيغ‑ا‑تصراضم غمكان ءي‑نگراتون ءيبان گيگون ءيس‑تفّوغم اغاراس باهرا. ءيس‑ور‑را‑ياف ا‑تصبارم د‑وانّا‑فلّاون‑يتعدّان؟ ءيس‑ور‑را‑ياف ا‑تادجم وانّا‑ياون‑يوكُرن؟

⁸ ءيمّا كونّي ار‑تّاكُرم ار‑تّعدّام ف‑ينگراتون، واخّا‑نّيت تگام ايتماتن.

⁹ ءيس‑ور‑تسّينم ماياد؟ ءور‑راد‑كشمن مدّن أُخشنّين س‑تگلديت ن‑ربّي. اد‑ور‑تجلوم ءيخف‑نّون. ءور‑را‑سرس‑يكشم يان ءيتفسادن نغد يان ءيتعبادن ءيلاهات ن‑دّونيت‑اد نغد يان ءيتزنون نغد يان ءيتفسادن د‑يوتمان زوند نتّا

¹⁰ نغد يان ءيشتّان وييّاض نغد يان دار ءيعزّا ا‑يتامژ ما‑يگّوتن ءي‑يخف‑نس نغد يان ءيتنوفولن س‑تيسّي نغد يان ءيرگّمن نغد يان ءيتاكُرن.

¹¹ ءولا كونّي، كرا گيگون ءيكّا‑تّين ار‑يسكار غمكان، والاينّي ءيسيرد‑كُن سيديتنّغ ياسوع لماسيح س‑رّوح ن‑ربّي‑نّغ، ءيژلي‑كُن ءيسكر سّلامت غ‑گراتون د‑ربّي.

تمجّدات ربّي س‑دّات‑نّون

¹² كرا ن‑مدّن ار‑تّينين: «ءيحلّا داري كرايگاتّ كرا.» والاينّي ءور‑را‑ك‑ينفعا كرايگاتّ كرا. «ءيحلّا داري كرايگاتّ كرا،» والاينّي ءور‑راد‑ادجغ يات ا‑يّي‑يكرس زوند ءيسمگ‑نس.

¹³ ار‑تّينين مدّن: «ءيگا‑ومشّو وين‑وديس، ءيگ‑وديس وين‑ومشّو،» والاينّي ربّي را‑يهلك اديس ءولا امشّو. غمكاد ا‑س‑يبان ءيس‑ور‑تگي دّات‑نّغ تين لفساد، والاينّي تگا تين سيديتنّغ، ءيگ نتّا سيديس ن‑دّات‑نّغ.

¹⁴ ربّي ءيسّنكر‑د دّات ن‑سيديتنّغ زغ‑لموت، راد‑اغ‑د‑يسّنكر ءولا نكُّني س‑تحكيمت‑نس ءيتجهّدن.

¹⁵ ءيس‑ور‑تسّينم ماياد؟ كود يان گيگون، تگا دّات‑نس اگزّوم زغ‑يگزمان لّماسيح. ءيس‑ترام ا‑تاويم يان‑وگزّوم لّماسيح تزديم‑ت د‑دّات ن‑تمگّانت؟ حاشا.

¹⁶ ءيس‑ور‑تسّينم، يان ءيزدين د‑تمگّانت يوورّي ءيگا ديدس يات‑دّات؟ غمكلّي ءيتياران: «راد‑گن سين يان.»

¹⁷ والاينّي يان ءيزدين د‑سيديتنّغ يوورّي ءيگا نتّا ديدس يان‑رّوح.

¹⁸ روولات زغ‑كولّو ما‑يگان لفساد. دّنوب ياضني ءور‑ا‑سّيُخشانّ دّات ن‑بنادم، والاينّي يان ءيتفسادن، هاتي ار‑يسّيُخشان ءولا دّات‑نس.

¹⁹ ءيس‑ور‑تسّينم دّات‑نّون ءيس‑تگا تيگمّي تامژلايت، ءيزدغ گيس رّوح لقودوس لّي‑اون‑يفكا ربّي. ءور‑تگيم وين ءيخف‑نّون،

²⁰ اشكو نتّان ا‑كُن‑يسغان، ءيفك فلّاون اتيگ‑نّون. ءيلّا فلّاون غيلاد ا‑تمجّدم ربّي س‑دّات‑نّون.