1 kurintus 5 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

سّوفغات وانّا ءيسكارن ما‑يُخشنّ

¹ اشكو سفلدغ ءيس‑دارون لفساد يُخشنّ باهرا، ءوگُّار ن‑ماد‑سكارن غويلّي ءور‑سّينّين اغاراس ن‑ربّي. هان ءيلّا غ‑گراتون يان‑ورگاز ار‑يگان د‑تمغارت ن‑باباس.

² ءيلّا فلّاون ا‑تالّام، والاينّي كونّي ار‑تسّفورّوگم. ءيلّا فلّاون ا‑تسّوفغم غوالّي ءيسكارن غايان، ا‑ور‑سول‑ديدون‑يتمونو.

³ واخّا‑د‑فلّاون‑ياگّوگ‑وودم‑ينو ءيلّا‑ن‑ديدون‑وول‑ينو. ها‑نكّي زوند ءيغ‑ديدون‑لّيغ، ءوتغ لحوكم س‑يسم ن‑سيديتنّغ ياسوع ف‑ورگاز لّي‑يسكارن غايلّي باهرا يُخشنّ.

⁴ ءيغ‑تمونم كولّوكن غيلاد، ءيلّا‑ديدون‑وول‑ينو تيلي ديدون ءولا تاحكيمت ءيتجهّدن ن‑سيديتنّغ ياسوع،

⁵ ءيقّان‑كُن‑د ا‑ن‑تدحيم ارگاز‑ان غ‑وفوس ن‑شيطان، باش ا‑تياوهلاكنت شّهوات ن‑دّات‑نس تنجم رّوح‑نس غ‑واسّ لّي‑غ‑را‑د‑ياشك سيديتنّغ ياسوع.

⁶ هان ءور‑شوين ءيسفورّوگن‑نّون. ءيس‑ور‑تسّينم ءيزد «تاخميرت ءيدروسن ا‑يسّكتاين لعجين ءيگّوتن.»؟

⁷ سّيتّيات زغ‑گيگون تاخميرت‑ان تاقديمت، باش ا‑بدّا‑تگم ارخصيص لّجديد غ‑ور‑تلّي‑تخميرت. اشكو ءيلكم‑د لعيد ن‑وسورف‑نّغ، ءيتياوغراس‑ولقّاغ‑نّغ لّي‑يگان لماسيح.

⁸ ييلي فلّانّغ ا‑نمون ف‑لعيد س‑ورخصيص ن‑وفولكي د‑لحقّ، ءورد اغروم ءيكتين س‑تخميرت تاقديمت ن‑تنوّاشت د‑لخُشانت.

⁹ ءوريغ‑اون‑ين‑ياد يات‑تبرات، ءينيغ‑اون گيس ا‑تّانفم ءي‑ويلّي تفسادنين.

¹⁰ والاينّي ءور‑ريغ ا‑تانفم ءي‑مدّن ن‑دّونيت‑اد لّي‑تفسادنين نغد مدّن ن‑دّونيت‑اد لّي‑دار‑يعزّا اد‑تامژن ما‑يگّوتن ءي‑يخف‑نسن، نغد غويلّي گيسن تاكُرنين نغد غويلّي گيسن تعبادنين ءيلاهات ياضني. اشكو ءور‑يژضار يان ا‑يانف ءي‑كولّو مدّن‑ان ابلا‑اكُّ‑يفّوغ دّونيت.

¹¹ والاينّي ءوريغ‑اون تابرات‑ان اد‑اون‑ينيغ ا‑تّانفم ءي‑وانّا ءيگان ءيخف‑نس د‑گماتون امومن والاينّي ار‑يتفساد نغد ار‑يتامژ ما‑يگّوتن ءي‑يخف‑نس نغد ار‑يتعباد ءيلاهات ياضني نغد ار‑يرگّم غ‑وييّاض نغد ار‑يسّنوفول ءيخف‑نس س‑تيسّي ءيكتين نغد ار‑يتاكُر. وان غواد، انفات‑اس. ءولا تيرمت، ا‑ور‑تّ‑ديدس‑تدروم.

¹² ايت‑برّا، ءور‑را‑فلّاسن‑حكامغ نكّي، والاينّي ايت‑ومناگّار لّماسيح، ءيس‑ور‑فلّاون‑يلّي ا‑فلّاسن‑تّحكامّ؟

¹³ ربّي ا‑را‑يحكام ف‑ويلّي لّانين غ‑برّا، ءيمّا كونّي «سّوفغات وانّا يُخشنّ زغ‑گراتون.»