1 kurintus 4 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

ءيرقّاسن لّماسيح

¹ غمكاد ا‑س‑يخصّا اد‑اغ‑تّمنادم ءيس‑نگا غير ءيخدّامن لّماسيح، نگ ويد دار ءيفل ربّي لامانت ن‑ولمّود‑نس ءينتلن.

² ءيمّا اخدّام، ءيلّا فلّاس ا‑يكمّل تاووري لّي‑اس‑يفل سيديس.

³ نكّي ءور‑يّي‑يهمّا ءيغ‑فلّا‑تحكامّ كونّي نغد كرا لّمحكاما ن‑دّونيت‑اد. ءور‑نّيغ يات ف‑يخف‑ينو، ءيس‑شويغ ءولا ءيس‑أُخشنغ.

⁴ سوانگمغ ءيس‑ور‑گيگي‑يلّي كرا لّعيب، والاينّي ءور‑راد‑ينيغ ءيس‑فولكيغ، اشكو ءور‑يلّي ما‑يژضارن ا‑فلّا‑يحكام ابلا سيديتنّغ واحدوت.

⁵ ماياد ا‑ف‑كُن‑يخصّا ا‑ور‑تّينيم ف‑يان ءيس‑يُخشن، اشكو ءور‑تا‑د‑يلكيم‑وزمز لّحوكم. والاينّي غاكود نّا‑د‑يوشكا سيديتنّغ را‑يفاو كولّو ما‑يرگسن غ‑تيلّاس، ءيسّبايّن‑د ءولا ءيسوينگيمن لّي‑نتلنين غ‑وولاون ن‑مدّن. غاكودان ا‑را‑يفك ربّي رّضا‑نس ءي‑كود يان د‑ما‑ت‑يد‑يوشكان.

⁶ واي‑ايتما، ساولغ غمكاد ف‑يخف‑ينو ءولا ف‑ابولُس باش ا‑تيسّانم مامنك ا‑كُن‑يخصّا ا‑تّمنادم غ‑مدّن. ريغ ا‑زگينّغ‑تلمدم «ا‑ور‑تّفّوغم زغ‑ما‑يتياران،» ءولا ءيلّا گيگون ما‑يسّفورّوگن ءولا ما‑يتحگارن.

⁷ اشكو ما‑ك‑يبضان د‑وييّاض؟ ما‑دارك‑يلّان بلا‑ياك‑ت‑يفكا ربّي؟ والاينّي لّيغد ربّي اد‑اك‑ت‑يفكان، ماخ ايلّيغ ا‑تسّفورّوگت زوند ءيغد ءيخف‑نّك ا‑د‑يكّا؟

⁸ ها‑كونّي غيلاد تشبعام، ءيگّوت دارون لخير. ها‑كونّي بلا‑نّغ توورّيم تگام زوند ءيگلدان. امار يوفان ا‑تگم ءيگلدان ن‑صّاحت باش ا‑ديدون‑نتحكام غ‑تگلديت‑نّون.

⁹ اشكو ءيرواس‑يّي ءيس‑اغ‑ن‑يسّبيدّ ربّي نكُّني‑اد ن‑يرقّاسن غ‑تغوردين ن‑كولّو مدّن زوند ءيغ‑فلّانّغ‑يتّوت لحوكم لّموت، باش ا‑كولّو‑گينّغ‑سّموقّولن لمالايكا ن‑يگنوان ءولا مدّن ن‑دّونيت.

¹⁰ نكُّني نگا ‹ءينافالن› ف‑يسم لّماسيح، ءيمّا كونّي تگام ‹ايت‑لعاقل› غ‑لماسيح. نكُّني نضعف، ءيمّا كونّي تدوسم. نكُّني ار‑اغ‑تحگارن مدّن، ءيمّا كونّي ار‑كُن‑توقّارن.

¹¹ سول س‑غيلاد ار‑نتقاما س‑لاژ ءولا ءيريفي. ءيدربالن ا‑نلسّا، د‑يباريقن ا‑نشتّا، ءولا دارنّغ مانيغ ا‑نتگاوار.

¹² ار‑نتنهاتاف ار‑نتخدام س‑يفاسّن‑نّغ. غاكود نّا‑ياغ‑رگّمن مدّن ار‑نتضالاب ربّي ا‑تن‑يبارك. غاكود نّا‑ياغ‑سّرفوفونّ ار‑نتصبار.

¹³ غاكود نّا‑فلّانّغ‑سّكيركيسن ار‑نترارا اوال ءيفولكين. سول س‑غيلا نگا دارسن زوند ارّاس لّي‑ن‑لوحن مدّن غ‑ومدّوز، نگ دارسن زوند امازير ن‑دّونيت‑اد.

¹⁴ ءوريغ‑اون‑ين ماياد، ءورد ا‑كُن‑سرس‑شّحشّامغ، والاينّي ءوصّاغ‑كُن زوند تاروا عزّانين.

¹⁵ ءيگّوت دارون ماد‑اون‑يسّلمادن اغاراس لّماسيح، والاينّي ءور‑گّوتن ءيد‑باباتون. اشكو نكّي ا‑يوورّين گيغ باباتون غ‑لماسيح ياسوع زغ‑غاكود لّيغ‑اون‑ين‑يويغ لخبار ءيفولكين.

¹⁶ ضالبغ‑كُن غيلاد ا‑يّي‑تضفورم غ‑ماد‑سكارغ.

¹⁷ ماياد ا‑ف‑راد‑اون‑ين‑ازنغ تيموتاوس. ءيگا ءيوي ءيعزّان غ‑سيديتنّغ، ار‑بدّا‑يسكار كولّو ما‑فلّاس‑يلّان. راد‑اون‑د‑يسّكتاي تينباضين‑ينو لّي‑س‑ا‑تّيدوغ غ‑وغاراس لّماسيح ياسوع، ار‑سرسنت‑سّلمادغ غ‑كولّو ءيمناگّارن ن‑ايتماتن غ‑كرايگاتّ ماني.

¹⁸ والاينّي سّنغ ءيس‑يلّا غ‑گراتون ما‑يسّفورّوگن، غالن ءيس‑ور‑را‑ن‑دارون‑اشكغ.

¹⁹ والاينّي را‑ن‑اشكغ غ‑مايد‑د‑ياكمورن ءيغ‑يرا سيديتنّغ. غاكودان ا‑راد‑ژرغ ءيد‑بو‑يسفورّوگن‑ان ءيسّانغ ءيزد تاحكيمت ءيتجهّدن ا‑دارسن‑يلّان نغد غير ءيواليون.

²⁰ اشكو تاگلديت ن‑ربّي ءور‑تلّي س‑يواليون، والاينّي تاحكيمت ءيتجهّدن ا‑س‑تلّا.

²¹ مامنك ا‑ترام اد‑اون‑ين‑سرس‑اشكغ، ءيزد س‑وكوراي نغد س‑تايري ن‑وول‑ينو ءيهنّان؟