1 kurintus 3 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

ءيخدّامن ن‑ربّي

¹ ءيمّا كونّي اي‑ايتما، غ‑ووسّان‑ان ءور‑ژضارغ اد‑ديدون‑ساولغ غمكلّي ساوالغ د‑ويلّي دار رّوح لقودوس، اشكو سول تمژّيم غ‑لماسيح، عزّونت‑دارون‑تغاوسيوين ن‑دّونيت‑اد.

² غير اكُّفاي اد‑اون‑فكيغ، اشكو ءور‑تا‑تژضارم ءي‑ومشّو. سول س‑غيلاد ءور‑اس‑تژضارم،

³ اشكو ار‑سول‑تسكارم زوند مدّن ن‑دّونيت‑اد. اشكو ءيغ‑ا‑يتّيري كرا ا‑ياگُر كرا ار‑تّژيم ءي‑نگراتون، ءيبان گيگون ءيزد وين دّونيت ا‑تگام ار‑تسكارم زوند غمكلّي كولّو سكارن مدّن ن‑دّونيت.

⁴ اشكو كرا گيگون ار‑يتّيني: «گيغ وين بولُس.» كرا گيگون ار‑يتّيني: «گيغ وين ابولُس.» ءيغ‑ا‑تسكارم غمكان، زوند مدّن ن‑دّونيت ا‑تگام.

⁵ ما‑يگا ابولُس ءولا بولُس؟ ءيخدّامن كا‑نگا، تامنم ف‑يمي‑نّغ س‑مكلّي ءيفكا سيديتنّغ ءي‑كود يان گينّغ.

⁶ نكّي ژّيغ تاسغارت، ابولُس ءيسّوا‑تّ، والاينّي ربّي ا‑ستّ‑يسّمقّورن.

⁷ غوالّي ءيژّان ءولا غوالّي ءيسّوان ءور‑يگي يات. والاينّي ربّي، نتّان ا‑يسّمقّورن.

⁸ غوالّي ءيژّان د‑والّي ءيسّوان، يان اد‑گان. كود يان، راد‑اس‑يفك ربّي تيغراد‑نس ف‑تووري لّي‑يسكر.

⁹ نكُّني نگا ويد تخدامنين د‑ربّي. ءيمّا كونّي تگام ءيگر ن‑ربّي، تگم تيگمّي لّي‑اس‑نبنّو.

¹⁰ ربّي ءيبارك گيگي ءيفك‑يّي ا‑ن‑دارون‑سرسغ لّساس زوند ءيغ‑گيغ لمعلّم ابنّاي. غيلاد ار‑فلّاس‑بنّون مدّن ياضني، والاينّي ءيلّا ف‑كود يان ا‑ستّ‑يتاوي غ‑مامنك ا‑يبنّو.

¹¹ اشكو ءور‑يژضار يان ا‑يسرس كرا لّساس ياضني ابلا لّساس لّي‑يتّرسن، ا‑ت‑يگان د‑ياسوع لماسيح.

¹² ءيغ‑ا‑يبنّو يان ف‑لّساس‑ان س‑وورغ نغد نّوقرت نغد ءيژران غُلانين نغد اكشّوض نغد اساغور نغد اليم،

¹³ را‑دي‑تبان‑تووري ن‑تبنّايت‑نس. اشكو تابنّايت ن‑كود يان را‑تّيارام س‑لعافيت غ‑واسّ لّي‑غ‑را‑د‑ياشك لماسيح. را‑تبان ءيس‑تدوس نغد ءوهو.

¹⁴ وانّا مي ءور‑يجدير مايلّي ءيبنا ف‑لّساس‑ان، راد‑اس‑يفك ربّي تيغراد‑نس.

¹⁵ ءيمّا وانّا مي ءيجدر مايلّي ءيبنا راد‑اس‑لاح. ءور‑راد‑اس‑ييلي يات، والاينّي را‑ينجم نتّا زوند ءيغ‑نّيت‑ينجم ءي‑لعافيت.

¹⁶ ءيس‑ور‑تسّينم ءيزد تيگمّي تامژلايت ن‑ربّي ا‑تگام، ءيزدغ گيگون رّوح ن‑ربّي؟

¹⁷ والاينّي تيگمّي ن‑ربّي، ءيغ‑تّ‑يهلك كرا ن‑يان را‑ت‑يهلك ربّي. اشكو تّياوژلاي‑تگمّي ن‑ربّي ا‑تگ تين ربّي، د‑كونّي تيگمّي‑نس ا‑تگام.

¹⁸ ا‑ور‑اكُّ‑يجلّو يان ءيخف‑نس. وانّا ءيغالن ءيس‑يطّاف لعاقل ن‑دّونيت‑اد، ءيخصّا‑ت ا‑يوورّي زوند ءيغ‑ور‑يسّين يات باش ا‑يطّاف لعاقل ءيصحان.

¹⁹ اشكو تاحكيمت ن‑دّونيت‑اد، تگا زوند انوفل دار ربّي. غمكلّي ءيتياران: «ربّي ار‑يقُّاي ايت‑لعاقل غ‑تيلّاي‑نسن.»

²⁰ ءيتيارا‑داغ: «ءيسّن سيديتنّغ ءيس‑خوان ءيسوينگيمن ن‑ايت‑لعاقل.»

²¹ ءيخصّا‑كُن ا‑ور‑تسّفورّوگم ف‑ما‑يسكر غواد ءولا غوان. اشكو كولّو ما‑يلّان، كونّي ا‑مي‑يلّا،

²² ءيگ‑ييت بولُس نغد ابولُس نغد بطرُس، ءيگ‑ييت دّونيت نغد تودرت نغد لموت، ءيگ‑ييت ما‑يلّان غيلاد نغد ما‑را‑ييلي. كونّي ا‑مي‑يلّا،

²³ تيليم ءي‑لماسيح، ييلي لماسيح ءي‑ربّي.