1 kurintus 2 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تابرّاحت ن‑بولُس غ‑دار ايت‑كورينتوس

¹ غاكود لّيغ‑ن‑دارون‑وشكيغ اي‑ايتما، ءورد س‑يواليون غزّيفنين ءولا س‑لعاقل ن‑بنادم ا‑س‑ا‑ياون‑تبرّاحغ ف‑لحقّ لّي‑اغ‑د‑يسّبايّن ربّي.

² والاينّي سكرغ‑د ف‑ا‑ور‑اون‑ساوالغ ف‑كرا ابلا ف‑ياسوع لماسيح د‑لموت‑نس ف‑وگّجدي.

³ غاكود لّيغ‑ن‑دارون‑وشكيغ، ضعفغ ار‑ترگيگييغ طيّر‑يّي باهرا.

⁴ ءورد س‑يواليون شوانين ءولا س‑لعاقل ن‑بنادم ا‑س‑ا‑ياون‑ساوالغ ار‑اون‑تبرّاحغ، والاينّي س‑تميتار ن‑رّوح لقودوس ءولا تاحكيمت ءيتجهّدن.

⁵ غمكان اد‑سكارغ باش ا‑ور‑تامنم س‑لماسيح ف‑سّيبت لّعاقل ن‑بنادم والاينّي ف‑سّيبت ن‑تحكيمت ءيتجهّدن ن‑ربّي.

تاحكيمت ن‑ربّي

⁶ س‑صّاحت، س‑لعاقل ا‑س‑ا‑نساوال ءي‑ويد مقّورنين غ‑وغاراس ن‑ربّي، والاينّي ءور‑يگي لعاقل ن‑دّونيت‑اد نغد وين ءينمغورن ن‑دّونيت‑اد لّي‑راد‑لاح.

⁷ والاينّي ار‑نساوال س‑تحكيمت ن‑ربّي لّي‑ينتلن غايد ءيزرين ءيسّبايّن‑ت‑يد غيلاد. اشكو ربّي، ءور‑تا‑يخلق دّونيت، ءيقصاد اد‑اغ‑يشّكشم س‑لمجد‑نس.

⁸ ءور‑يلّي يان غ‑ينمغورن ن‑دّونيت ءيسّن ماياد. مراد ءيس‑سّنّ ماياد، ءيكون ءور‑اكُّ‑راد‑نغن باب لّمجد ف‑وگّجدي.

⁹ والاينّي ءيتيارا: «ءور‑جّو‑يژري يان ءولا ءيسفلد يان ءولا ءيسوانگم لعاقل ن‑بنادم ف‑ما‑يجّوجاد ربّي ءي‑ويلّي‑تي‑تّيرينين.»

¹⁰ ءيمّا غيلاد ءيسّبايّن‑اغ‑ت‑يد ربّي س‑تحكيمت ن‑رّوح‑نس. اشكو رّوح لقودوس ار‑يسيگّيل كولّو ما‑يلّان، ييسّان ءولا تيغاوسيوين ن‑ربّي لّي‑نتلنين.

¹¹ ما‑يسّنّ ءيسوينگيمن لّي‑رگسنين غ‑وول ن‑بنادم؟ ءور‑تن‑يسّين ابلا رّوح ن‑بنادم لّي‑گيس‑يلّان. غمكاد ا‑يگا ءولا دار ربّي. ءور‑يلّي ما‑يسّنّ ءيسوينگيمن ن‑ربّي ابلا رّوح ن‑ربّي.

¹² ءيمّا نكُّني ءور‑گينّغ‑تلّي رّوح ن‑دّونيت‑اد، والاينّي ءيلّا گينّغ رّوح لّي‑اغ‑د‑يوزن ربّي باش ا‑نيسّان كولّو ماد‑اغ‑ياكّا ربّي.

¹³ ار‑نساوال ف‑ماياد س‑مكلّي‑اغ‑يمالا رّوح لقودوس، ءورد س‑يواليون لّعاقل ن‑بنادم. ار‑نسّلماد غويلّي‑غ‑يلّا رّوح لقودوس ف‑تغاوسيوين ن‑رّوح لقودوس.

¹⁴ يان دار ءور‑يلّي رّوح ن‑ربّي، ءور‑را‑يقبل تيوافكيو ن‑رّوح‑نس. ءور‑يژضار ا‑تنت‑يفهم، را‑يغال ءيزد انوفل اد‑گانت، اشكو س‑رّوح ا‑س‑ا‑تنت‑نتفهام.

¹⁵ وانّا‑غ‑يلّا رّوح ن‑ربّي ار‑يتفهام كولّو ما‑يلّان، ءيمّا نتّا ءور‑را‑ت‑فهمن مدّن ياضني.

¹⁶ ءيتيارا: «ما‑يسّنّ ءيسوينگيمن ن‑سيديتنّغ باش اد‑اس‑يمالا ما‑ت‑يد‑يقّانّ؟» ءيمّا نكُّني، لّان گينّغ ءيسوينگيمن لّماسيح.