1 kurintus 16 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

ءيسكر بولُس ف‑ومودّو س‑كورينتوس

¹ ءيمّا لمعاونت لّي‑را‑تازنم ءي‑يمژلاين ن‑ربّي غ‑وروشاليم، ءيلّا فلّاون ا‑تسكارم غمكلّي ءوصّاغ ءيمناگّارن غ‑تمازيرت ن‑گالاطيّا.

² كرايگاتّ اسّ لّحدّ ءيلّا ف‑كود يان گيگون ا‑يسّيتّي كرا غ‑ما‑يومژ غ‑تغراد‑نس، ءونشك نّا‑مي‑يژضار، ءيحضو‑ت، باش ا‑ور‑يخصّا ا‑تسّمونم ءيقاريدن غاكود نّا‑ن‑دارون‑وشكيغ.

³ لّيغ‑ن‑روحغ راد‑فكغ تيبراتين ن‑تواسّنا ءي‑ويلّي تستيم، ازنغ‑تن ا‑ن‑اوين تاوافكا‑نّون س‑وروشاليم.

⁴ ءيغ‑يّي‑د‑يقّان ءولا نكّي، را‑ن‑ديدسن‑مونغ.

⁵ را‑ن‑دارون‑اشكغ لّيغ كّيغ تامازيرت ن‑ماكيدونيّا، اشكو ماكيدونيّا ا‑راد‑كغ زوار.

⁶ ريغ ا‑ن‑دارون‑گاورغ، حاقّان را‑ن‑دارون‑زّريغ تاگرست، تعاونم‑يّي ءيلمّا اد‑كمّلغ ف‑ومودّو‑نو س‑ينّاس راد‑فتوغ تيگيرا.

⁷ ءور‑ريغ ا‑ن‑دارون‑زّريغ غير كرا ن‑ووسّان دروسنين غيلاد، والاينّي ريغ ا‑ن‑دارون‑گاورغ كيگان ءيغ‑يرا ربّي.

⁸ مايان ا‑ف‑راد‑قاماغ غ‑افسوس ارد ءيزري لعيد ن‑وين سمّوس ءيد‑مراو،

⁹ اشكو ربّي ءيرژم غ‑لگدّام‑ينو يان‑يمي يوسعان اد‑سكارغ تاووري ءيهيّان واخّا‑نّيت گّوتن غويلّي‑اغ‑تضاضّانين.

¹⁰ ءيغ‑ن‑يوشكا تيموتاوس، اويات‑ستّ گيس ف‑ا‑ور‑يحشم غ‑دارون، اشكو تاووري ن‑سيديتنّغ ا‑يسكار ءولا نتّا زوند نكّي.

¹¹ ا‑ت‑ور‑يحگر يان، والاينّي عاونات‑ت ا‑يكمّل ف‑ومودّو‑نس س‑سّلامت باش ا‑د‑يوورّي س‑داري. اشكو ها‑يّي ار‑سرس‑تقلغ نتّا د‑ايتماتن ياضني.

¹² ءيمّا گماتنّغ ابولُس، ساولغ‑اس س‑لمعقول نّيغ‑اس را‑يفولكي ا‑ن‑يمون د‑ايتماتن ياضني س‑دارون، والاينّي ءور‑اكُّ‑يري ا‑ن‑ياشك غيلاد. را‑ن‑دارون‑ياشك غاكود نّا‑يوفا.

¹³ ضوفات تزگام غ‑وغاراس لّماسيح، تزعمّ تدوسم.

¹⁴ كولّو ما‑تسكارم، سكارات‑ت س‑لحنانت.

¹⁵ واي‑ايتما، تسّنم ءيزد ستيفاناس د‑ايت‑تگمّي‑نس ا‑يزوارن ءيس‑ومژن اغاراس لّماسيح غ‑تمازيرت ن‑اخايا، فكن ءيخفاون‑نسن اد‑تخدامن ءي‑يمژلاين لّماسيح.

¹⁶ ضالبغ‑كُن غيلاد ا‑تسفليدم س‑مدّن زوند غويد ءولا كولّو وانّا ءيتخدامن ار‑يتنهاتاف ديدنّغ ف‑تووري‑اد.

¹⁷ فرحغ غيلاد غ‑د‑يوشكا ستيفاناس د‑فورتوناتوس د‑اخايكوس اشكو عمّرن ادغار‑نّون لّي‑داري‑يخوان،

¹⁸ سّفجّيجن ءول‑ينو ءولا نكّي غمكلّي سّفجّيجن وينّون. توقّارات مدّن زوند غويد.

¹⁹ ار‑ن‑فلّاون‑تسلّامن ءيمناگّارن ن‑ايتماتن غ‑تمازيرت ن‑اسيّا. ار‑ن‑باهرا‑فلّاون‑يتسلّام اكيلا د‑بريسكيلّا س‑يسم ن‑سيديتنّغ، نتني د‑ومناگّار لّي‑يتمونون غ‑تگمّي‑نسن.

²⁰ ار‑ن‑فلّاون‑تسلّامن ايتماتن كولّوتن. نسالّامات ءي‑نگراتون س‑ونسالّام ن‑تاگُمات.

²¹ نكّي بولُس، س‑وفوس‑ينو ا‑س‑اون‑ين‑وريغ سّلام‑اد.

²² ا‑يتّوت لحوكم ن‑ربّي ف‑وانّا ءور‑يتّيرين سيديتنّغ. ‹ماراناتا›. (اشك‑يد ا‑سيديتنّغ.)

²³ اد‑اون‑تيلي لباراكا ن‑سيديتنّغ ياسوع لماسيح.

²⁴ ار‑كُن‑باهرا‑تّيريغ كولّوكن غ‑تامونت لّماسيح ياسوع.