1 kurintus 15 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تانكرا لّماسيح زغ‑لموت

¹ واي‑ايتما، ريغ اد‑اون‑د‑سّكتيغ لخبار ءيفولكين لّي‑س‑اون‑ين‑تبرّاحغ. تسفلدم سرس تزگام گيس

² تنجمّ ف‑سّيبت‑نس ءيغ‑سول‑تغويم غ‑واوال ن‑تبرّاحت‑ينو. هان ءيغ‑ور‑يگي غمكان، هان ليمان‑نّون بلا لفايتّ.

³ اشكو اوال ءيهيّان لّي‑يّي‑د‑يلكمن، سّلكمغ‑اون‑ت‑ين ءولا كونّي، ءينيغ‑اون ءيس‑يمّوت لماسيح ا‑ياسي دّنوب‑نّغ غمكلّي ءيتياران غ‑وارّاتن ن‑ربّي.

⁴ ءيتياومضال، ءيتيالال غ‑ويس كراض‑ووسّان غمكلّي ءيتياران.

⁵ ءيبان‑د غاكودان ءي‑بطرُس ءيبان‑د ءيلمّا ءي‑يرقّاسن س‑سين د‑مراو.

⁶ ءيبان‑د ءيلمّا ءي‑وگُّار ن‑سمّوس ءيد‑ميّا زغ‑ايتماتن غ‑يات‑توال. ءيگّوت گيسن ماد‑سول‑يسولن والاينّي كرا ءيمّوت.

⁷ ءيبان‑د ءيلمّا ءي‑ياعقوب، ءيبان‑د ءيلمّا ءي‑يرقّاسن كولّوتن.

⁸ غ‑يسيگُّرا ءيبان‑يّي‑د ءولا نكّي زوند ءيغ‑گيغ يان ءيلولن بلا ازمز‑نس.

⁹ نكّي مژّيغ غ‑يرقّاسن. ءور‑اكُّ‑ستهلّاغ اد‑يّي‑تّينين ارقّاس، اشكو كّيغ‑تّين ار‑سّرفوفونغ امناگّار ن‑ربّي.

¹⁰ والاينّي ربّي ءيسكر‑يّي افولكي ءيفك‑يّي اد‑گغ ماد‑گيغ غيلاد. ءورد بلا لفايتّ اد‑يّي‑يسكر افولكي، اشكو وورّيغ ار‑تخدامغ ءوگُّار ن‑كولّو وييّاض، واخّا ءورد نكّي ا‑ت‑يسكارن والاينّي لباراكا ن‑ربّي لّي‑داري‑يلّان.

¹¹ زوند نكّي زوند نتني، غمكاد ا‑س‑ا‑نتبرّاح، غمكاد ا‑س‑تومنم.

تانكرا ن‑ويلّي مّوتنين

¹² «ءينكر‑د لماسيح زغ‑لموت.» غمكاد ا‑يگا‑واوال ن‑تبرّاحت‑نّغ. ءيمّا كونّي، مامنك ا‑را‑ييري كرا گيگون ا‑يتّيني «غويلّي مّوتنين ءور‑ژضارن اد‑د‑نكرن»؟

¹³ ءيغ‑ور‑يژضار بنادم اد‑د‑ينكر زغ‑لموت، ءور‑د‑اكُّ‑ينكير لماسيح.

¹⁴ والاينّي ءيغ‑ور‑د‑ينكير لماسيح، ءور‑يلّي ما‑ف‑ا‑نتبرّاح ءولا ءيلّا ما‑س‑ا‑تّامنم.

¹⁵ ءيغ‑ور‑ا‑نكّرن غويلّي مّوتنين، ءور‑اكُّ‑يسّنكير ربّي لماسيح. ءيغ‑ور‑ا‑نكّرن غويلّي مّوتنين، ها‑ياغ ار‑نسّكيركيس ف‑ربّي، اشكو ار‑نتّيني ءيسّنكر‑ت‑يد.

¹⁶ ءيغ‑ور‑يژضار بنادم ا‑د‑ينكر زغ‑لموت، ءور‑د‑ينكير لماسيح.

¹⁷ والاينّي ءيغ‑ور‑د‑ينكير لماسيح، هاتين تومنم بلا لفايتّ، تيليم سول غ‑دّو لحوكم ن‑دّنوب‑نّون.

¹⁸ ءيغ‑ور‑د‑ينكير لماسيح، تّهلكن كولّو ويلّي سرس ءومنّين مّتن.

¹⁹ مراد ءيس‑يحودّا رّجا‑نّغ غ‑لماسيح غير ءي‑تودرت‑اد، نكُّني ا‑را‑د‑قّانّ ءيمطّاون ءوگُّار ن‑كولّو مدّن.

²⁰ والاينّي س‑لحقّ ءينكر‑د لماسيح زغ‑لموت ءيگ امنزو غ‑ويلّي طّاسنين.

²¹ ف‑سّيبت ن‑يان‑ورگاز ا‑س‑تلّا لموت. ءيمّا غيلاد ف‑سّيبت ن‑يان‑ورگاز ياضني ا‑س‑تلّا‑تنكرا زغ‑لموت.

²² راد‑كولّو‑نمّت ف‑سّيبت ن‑ما‑يسكر ادام، راد‑كولّو‑ننكر ف‑سّيبت ن‑ما‑يسكر لماسيح.

²³ را‑د‑ينكر كرايگاتّ يان س‑توالا‑نس. لماسيح ا‑يزوارن ءيگ امنزو. تيگيرا‑نس راد‑نكرن غويلّي گانين وينس غاكود نّا‑د‑يوورّي س‑دّونيت‑اد،

²⁴ ءيروح‑د ءيلمّا ءيسيگُّرا، ءيهلك لماسيح كولّو لارواح ءولا سّولطات ءولا لقوّات ن‑يگنوان ءيرار‑د تاگلديت ءي‑ربّي باباس.

²⁵ را‑يحكام لماسيح ارد ءيگ ربّي كولّو ءينوّاشن‑نس غ‑دّو ءيضارن‑نس.

²⁶ انوّاش امگُّارو لّي‑را‑يهلك ا‑ت‑يگان د‑لموت.

²⁷ اشكو ءيتيارا: «ءيرور‑د كولّو ما‑يلّان غ‑دّو ءيضارن‑نس.» نسّن ءيس‑ور‑را‑ييلي ربّي غ‑دّو ءيضارن‑نس، والاينّي ربّي ا‑را‑يرار كولّو ما‑يلّان غ‑دّو ءيضارن لّماسيح.

²⁸ غاكود لّيغ را‑ييلي كولّو غ‑دّو لّحوكم ن‑يوس ن‑ربّي، را‑يفك ءيخف‑نس غ‑دّو لحوكم ن‑والّي‑د‑يرورن كولّو ما‑يلّان غ‑دّو لحوكم‑نس. غمكاد ا‑س‑را‑يحكام ربّي ف‑كولّو ما‑يلّان.

²⁹ والاينّي ءيغ‑ور‑راد‑د‑نكرن غويلّي مّوتنين، ماخ ايلّيغ ا‑تّيرين كرا ن‑مدّن اد‑دّمن س‑ودوم ن‑وامان ءي‑ويلّي‑اسن‑مّوتنين؟ ما‑لّفايتّ ا‑راد‑اسن‑ييلي غ‑ودوم‑ان ءيغ‑ور‑راد‑د‑نكرن زغ‑لموت؟

³⁰ ءولا نكُّني، ماخ ايلّيغ ا‑نتّيري ا‑بدّا‑نسكار ف‑لموت؟

³¹ واي‑ايتما، ار‑ن‑تمناگّارغ د‑لموت كرايگاتّ اسّ. نّيغ‑اون‑ت اشكو تعزّام داري باهرا غ‑تامونت لّماسيح ياسوع سيديتنّغ.

³² والاينّي ما‑راد‑يّي‑ييلي ءيغ‑مّاغّ د‑لوحوش غ‑تمدينت ن‑افسوس غير باش اد‑رضوغ ءيخف‑ينو؟ ءيغ‑ور‑راد‑نكرن غويلّي مّوتنين را‑ياف ا‑نسكار غمكلّي تّينين مدّن: «ا‑نشّ نسو غاسّاد اشكو ازكّا تلّا لموت.»

³³ اد‑ور‑تجلوم ءيخف‑نّون. «گار تامونت ا‑يژّريژن ءول ءيزدّيگن.»

³⁴ وورّياد‑د س‑وغاراس ءينمن، تانفم ءي‑كولّو ما‑يگان دّنوب. هان ءيلّا گيگون ما‑ور‑اكُّ‑يسّينّ ربّي. ءيس‑كُن‑ور‑باهرا‑يشّحشّيم غايان؟

دّات ن‑ايت‑يگنّا

³⁵ والاينّي را‑يّي‑يسقسا كرا ن‑يان: «مامنك ا‑راد‑نكرن غويلّي مّوتنين؟ مامنك ا‑را‑تگ دّات لّي‑س‑راد‑نكرن؟»

³⁶ والاينّي ءيس‑ور‑تطّافت لعاقل؟ امود نّا‑تلوحت ءور‑را‑د‑ينكر ءيغ‑ور‑ياد‑يمّوت.

³⁷ ءورد اگُلاس ا‑ن‑تلوحت غ‑واكال، والاينّي غير يان‑واقّا ءيمژّين ن‑يردن نغد وين كرا ن‑يمندي ياضني.

³⁸ والاينّي راد‑اس‑يفك ربّي دّات لّي‑يقصاد نتّا، ءيفك ءي‑كرايگاتّ امود دّات لّي‑اس‑يگان.

³⁹ اشكو تيفيّي ءورد‑يات ا‑تگا. تلّا‑تفيّي ن‑بنادم تيلي تين لبهايم تيلي تين ءيگضاض تيلي ءولا تين ءيسلمان.

⁴⁰ ءيلّا ما‑يزدغن غ‑يگنوان، ييلي ما‑يزدغن ف‑واكال. ءيلّا‑وفولكي ن‑ما‑يزدغن غ‑يگنوان، ييلي‑وفولكي ن‑ما‑يزدغن ف‑واكال.

⁴¹ ييلي‑وفولكي ن‑تافوكت ييلي‑وفولكي ن‑وايّور ييلي‑وفولكي ن‑يتران، ءيژلي‑ولا‑وفولكي ن‑يتري ف‑يتري.

⁴² غمكاد ا‑را‑تگ‑تنكرا ن‑ويلّي مّوتنين. تمّوت دّات لّي‑يضرن غ‑واكال، والاينّي ءور‑را‑سار‑تمّت دّات لّي‑را‑د‑ينكر.

⁴³ تّياومضال تخسر، تنكر‑د تفولكي. تّياومضال تضعف، تنكر‑د س‑لقوّا.

⁴⁴ تّياومضال دّات ن‑دّونيت‑اد، تنكر‑د تگ دّات ن‑يگنّا. نسّن ءيس‑تلّا دّات ن‑دّونيت‑اد تيلي ءولا تين‑يگنّا.

⁴⁵ غمكاد ا‑يتياران غ‑وارّا ن‑ربّي: «ارگاز امزوارو ادام يوورّي ءيگا يا‑لّخلق ءيدّرن.» ءيمّا ادام امگُّارو ءيگا يان‑رّوح ءيسّدّرن.

⁴⁶ ءورد باب ن‑رّوح ا‑د‑يزوارن والاينّي باب ن‑دّات ن‑دّونيت‑اد، ءيگُّرو‑اس‑د ءيلمّا باب ن‑رّوح.

⁴⁷ ارگاز امزوارو ءيتياوسكار زغ‑يدقّي، ءيگ وين‑واكال. ءيمّا ارگاز ويس سين ءيگا زغ‑يگنّا.

⁴⁸ زوند وين‑واكال اد‑گان ايت‑واكال، والاينّي زوند وين‑يگنّا اد‑گان ايت‑يگنّا.

⁴⁹ غيلاد نگا زوند وين‑واكال، تيگيرا را‑نگ زوند وين‑يگنّا.

⁵⁰ ريغ اد‑اون‑ينيغ اي‑ايتما، ءور‑تژضار دّات ن‑تفيّي د‑يدامّن ا‑توورت تاگلديت ن‑ربّي، ءولا ءيژضار ما‑يگان وين لموت ا‑يوورت ما‑راد‑بدّا‑يدّر.

^51-52 راد‑اون‑ينيغ كرا ءينتلن. ءور‑راد‑كولّو‑نمّت، والاينّي راد‑اغ‑كولّو‑يبدّل ربّي، حاينا غ‑نّفّار ءيگُّران، ءور‑تا‑تمّوسّي تيط. اشكو را‑يتّوت نّفّار نكرن‑د غويلّي مّوتنين ف‑اد‑دّرن س‑تودرت ءيدومن. غاكودان راد‑اغ‑يبدّل.

⁵³ اشكو ءيقّان‑د دّات‑اد ءيتركامن ا‑تّياوبدّال س‑ما‑راد‑بدّا‑يدوم، ءيقّان‑د دّات‑اد ءيتمتاتن ا‑تّياوبدّال س‑ما‑راد‑بدّا‑يدّر.

⁵⁴ غاكودان غ‑يوورّي ءيدوم ما‑يتركامن ءيدّر ما‑يتمتاتن، را‑ييلي ما‑يتياران غ‑وارّا ن‑ربّي: «ننرا لموت، ءور‑سول‑فلّانّغ‑تلّي.» «وا‑لموت، ما‑تنريت؟ وا‑لموت، ما‑سول‑يسّيويد‑وساقس‑نّم؟»

⁵⁶ اساقس لّموت ا‑ت‑يگان د‑دّنوب. ءيمّا تاودا ن‑دّنوب ا‑ستّ‑يسكرن د‑شّرع.

⁵⁷ والاينّي ار‑باهرا‑نتالغ ربّي اشكو ءيفكا‑ياغ ا‑ننرو كولّو مايان ف‑وودم ن‑سيديتنّغ ياسوع لماسيح.

⁵⁸ واي‑ايتما عزّانين، ماياد ا‑ف‑راد‑اون‑ينيغ: دوسات تزگام ار‑بدّا‑تّلهوم س‑تووري ن‑سيديتنّغ، تيسّانم ءيس‑ورد بلا لفايتّ ا‑س‑ا‑تّنهاتافم س‑يسم ن‑سيديتنّغ.