1 kurintus 14 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

سكارات ف‑ما‑را‑يسّدوس امناگّار

¹ سكارات كولّو س‑لحنانت، تيريم باهرا اد‑اون‑يلينت‑توافكيو ن‑رّوح لقودوس، س‑وگُّار ا‑تّينيم س‑ماد‑اون‑يمالا ربّي.

² يان ءيساوالن س‑يواليون ءيغريبن، ربّي اين‑د‑ا‑يساوال ءورد مدّن، اشكو ءور‑سّينّ مدّن لمعنا ن‑يواليون‑نس. نتّا س‑تحكيمت ن‑رّوح لقودوس ا‑س‑ا‑يساوال ف‑ما‑ينتلن.

³ ءيمّا يان ءيتّينين س‑ماد‑اس‑يمالا ربّي ار‑يساوال ءي‑مدّن باش ا‑تن‑يتعاوان نتني، ار‑تن‑يزّعام ار‑يسّفجّيج ءولاون‑نسن.

⁴ يان ءيساوالن س‑يواليون ءيغريبن، ار‑يسّدوس غير ءيخف‑نس، ءيمّا يان ءيتّينين س‑ماد‑اس‑يمالا ربّي ار‑يسّدوس ايتماتن ن‑ومناگّار كولّوتن.

⁵ ريغ ا‑كولّو‑تساوالم س‑يواليون ءيغريبن، والاينّي ريغ ءوگُّار ا‑تّينيم س‑ماد‑اون‑يمالا ربّي. يان ءيتّينين س‑ماد‑اس‑يمالا ربّي يوگُر يان ءيساوالن س‑يواليون ءيغريبن ءيغ‑ور‑يلّي ما‑يژضارن ا‑يسّبايّن لمعنا ن‑يواليون‑ان باش ا‑يسّدوس ايتماتن ن‑ومناگّار.

⁶ واي‑ايتما، ما‑لّفايتّ ا‑را‑ييلي ءيغ‑ن‑دارون‑وشكيغ ار‑ساوالغ غير س‑يواليون ءيغريبن؟ لفايتّ ءور‑را‑تيلي ابلا ءيغ‑اون‑ين‑سّلكمغ كرا ن‑واوال زغ‑ربّي نغد كرا ن‑تواسّنا نغد كرا‑يّي‑يملا ربّي نغد كرا ن‑ولمّود.

⁷ ژرات تاعوّاتّ ءولا رّيباب، ءورد بنادم اد‑گان، والاينّي ءيغ‑ور‑نگادّان ما‑را‑ييسّان ما‑يقصاد‑وعوّاد ءولا بو‑رّيباب؟

⁸ ءولا نّفّار، ءيغ‑ور‑ينم‑واوال‑نس ما‑را‑ينكر ءيسكر ف‑يميغ؟

⁹ ءولا كونّي، ما‑را‑يفهم ما‑تّينيم ءيغ‑ا‑تساوالم س‑يواليون ءيغريبن؟ ءيغ‑ور‑ا‑تّبان لمعنا ن‑ما‑تّينيم، ار‑تساوالم غير غ‑لهاوا.

¹⁰ نسّن ءيس‑گّوتن ءيواليون لّي‑س‑ا‑ساوالن مدّن غ‑تميزار ن‑دّونيت كولّوتنت. كرايگاتّ اوال ءيطّاف كرا لّمعنا،

¹¹ والاينّي يان سري ءيساوالن، راد‑دارس‑گغ ابرّاني ءيغ‑ور‑سّينغ لمعنا ن‑ما‑يتّيني، ءيگ داري ابرّاني ءولا نتّا.

¹² ءيمّا كونّي، سّنغ ءيس‑ا‑باهرا‑تّيريم تيغاوسيوين ن‑رّوح لقودوس، والاينّي ءيريات س‑وگُّار ا‑تسكارم ف‑ما‑را‑يسّدوس امناگّار ن‑ايتماتن.

¹³ ماياد ا‑ف‑يلّا ف‑كود يان ءيساوالن س‑يواليون ءيغريبن ا‑يضالب ربّي اد‑اس‑يسّبايّن لمعنا‑نسن.

¹⁴ ءيغ‑ا‑تژالّاغ س‑يواليون ءيغريبن، هاتي ءول‑ينو ا‑يتژالّان ءيمّا لعاقل‑ينو ءور‑اس‑يلّي يات.

¹⁵ ما‑راد‑سكارغ؟ راد‑تژالّاغ زغ‑وول‑ينو، ژّالّغ ءولا س‑لعاقل‑ينو. راد‑تاسيغ امارگ زغ‑وول‑ينو، اسيغ امارگ ءولا س‑لعاقل‑ينو.

¹⁶ والاينّي ءيغ‑ا‑تّشكارت ربّي غير زغ‑وول‑نّك ءيسفلد‑اك يان ءور‑يسّينّ ما‑يلّان، مامنك را‑ييژضار ا‑ييني «امين» ءيغ‑ور‑يسّين ما‑ف‑ا‑تّشكارت ربّي؟

¹⁷ واخّا تفولكي‑تژالّيت‑نّك ءور‑سرس‑تعاونت غوالّي ياضني.

¹⁸ ءيمّا نكّي شكرغ‑ت ءي‑ربّي، ار‑ساوالغ س‑يواليون ءيغريبن ءوگُّار‑نّون كولّوكن.

¹⁹ والاينّي يوف داري اد‑ينيغ سمّوس ءيواليون س‑لعاقل‑ينو غ‑ومناگّار باش اد‑سّلمادغ وييّاض، ءوگُّار ن‑مراو ءيد‑والف ن‑يواليون ءيغريبن.

²⁰ واي‑ايتما، ا‑ور‑تسوينگيمّ زوند تاروا مژّينين. ءيلّا فلّاون ا‑تمژّيم غ‑ما‑يُخشنّ، والاينّي ءيمغورات غ‑لعاقل‑نّون.

²¹ ءيتيارا غ‑وارّا ن‑ربّي: «ف‑يمي ن‑ايت‑يواليون ءيغريبن ءولا ف‑ينفورن ن‑يبرّانيين ا‑ف‑راد‑ساولغ س‑مدّن‑ينو، والاينّي ءور‑را‑سري‑سفلدن. غمكاد ا‑س‑ينّا سيدي ربّي.»

²² ماياد ا‑ف‑نسّن ءيواليون ءيغريبن ءور‑گين تاماتارت ءي‑ويلّي ءومنّين، والاينّي گان تاماتارت ءي‑ويلّي دار ءيدروس ليمان. ءيمّا اينّا ءيملا ربّي ا‑ت‑يتّيني يان ءي‑وييّاض، را‑يگ تاماتارت ءي‑ويلّي ءومنّين، ءورد ويلّي دار ءيدروس ليمان.

²³ والاينّي ءيغ‑مونّ ايت‑ومناگّار كولّوتن ار‑كولّو‑ساوالن س‑يواليون ءيغريبن، ما‑را‑يجرو؟ ءيغ‑ن‑كشمن كرا ن‑مدّن ءور‑سّينّ ما‑يلّان نغد كرا ن‑مدّن دار ءيدروس ليمان، راد‑ينين «كرا ن‑رّوح ا‑گيگون‑يلّان.»

²⁴ والاينّي ءيغ‑ا‑كولّو‑تّينيم س‑ماد‑اون‑ين‑يمالا ربّي، ءيغ‑ن‑يكشم كرا ن‑يان دار ءيدروس ليمان نغد كرا ن‑يان ءور‑يسّينّ ما‑يلّان، را‑يسّحسّو س‑دّنوب‑نس ييسّان ءيس‑فلّاس‑يلّا لحوكم،

²⁵ ءيبان كولّو ما‑ينتلن غ‑وول‑نس. را‑يضر س‑واكال يالغ ربّي ييني «س‑صّاحت ءيلّا ربّي غ‑وامّاس‑نّون.»

سكارات كولّو س‑تنباطّ ءيزگان

²⁶ ما‑را‑نسكار اي‑ايتما؟ غاكود نّا‑تمونم ءي‑نگراتون كود يان را‑دارس‑تيلي كرا ن‑تالغات نغد كرا ن‑ولمّود نغد كرا‑ياس‑يسّبايّن ربّي نغد كرا ن‑يواليون ءيغريبن نغد لمعنا ن‑يواليون ءيغريبن. كولّو ما‑تسكارم، ءيلّا فلّاون ا‑سرس‑تسّدوسم ايت‑ومناگّار.

²⁷ ءيغ‑يلّا ما‑يران ا‑يساول س‑يواليون ءيغريبن، ءيخصّا ا‑ور‑ساوالن ءوگُّار ن‑سين مدّن نغد كراض، كود يان س‑توالا‑نس. ءيخصّا يان ا‑يسّبايّان لمعنا ن‑يواليون‑نسن.

²⁸ والاينّي ءيغ‑ور‑يلّي ما‑يژضارن ا‑يسّبايّن لمعنا، ءيلّا فلّاسن اد‑فسّان غ‑وامّاس ن‑ومناگّار ءيساول كود يان س‑يخف‑نس ءولا س‑ربّي.

²⁹ ادجات سين مدّن نغد كراض ا‑تّينين س‑ماد‑اسن‑يمالا ربّي، ار‑توزّانّ وييّاض اوال‑نسن.

³⁰ والاينّي ءيغ‑يسّبايّن ربّي كرا ياضني ءي‑يان ءيگاورن غين، ءيلّا ف‑والّي ءيساوالن ا‑يفسّا.

³¹ اشكو تژضارم ا‑كولّو‑تّينيم ماد‑اون‑يمالا ربّي يان س‑يان باش اد‑كولّو‑تلمدم تزعمّ.

³² ءيمّا وانّا ءيتّينين س‑ماد‑اس‑يمالا ربّي، ءيلّا فلّاس ا‑يتنباض غ‑رّوح‑نس.

³³ اشكو ربّي ءور‑يگي بو‑يروّاين. بو‑سّلامت ا‑يگا.

³⁴ ءيلّا ف‑تمغارين اد‑تفسّانت غ‑دارون غمكلّي تفسّانت غ‑كولّو ءيمناگّارن ن‑يمژلاين. ءور‑اسنت‑يتياوفكا اد‑ساوالنت. غمكلّي ءيتّيني شّرع ن‑موسا، ءور‑يزري ا‑تّحكامنت ف‑وييّاض.

³⁵ ءيغ‑رانت اد‑يسّانّت كرا، ءيلّا فلّاسنت اد‑سقسانت ءيرگازن‑نسنت غ‑تگمّي. ءيغ‑تساول‑تمغارت غ‑وامّاس ن‑ومناگّار، هان لعيب اين تسكر.

³⁶ ما‑تنّام؟ ءيزد دارون ا‑زغ‑د‑يوشكا‑واوال ن‑ربّي؟ ءيزد كونّي واحدوكن كا‑ت‑يسّنّ؟

³⁷ وانّا گيگون ءيتّينين ءيس‑ا‑ياس‑يمالا ربّي اوال نغد تلّا‑دارس‑تحكيمت ن‑رّوح لقودوس، ءيقّان‑ت‑يد ا‑ييني ءيزد لوصيت ن‑سيديتنّغ ايد‑اون‑ين‑وريغ.

³⁸ ءيغ‑ور‑يقبيل ماياد، ءور‑يتياوقبال نتّا.

³⁹ ءيمّا غيلاد اي‑ايتما، ءيريات باهرا ا‑تّينيم س‑ماد‑اون‑يمالا ربّي. ا‑ور‑تحصارم يان ءيساوالن س‑يواليون ءيغريبن،

⁴⁰ والاينّي سكارات كولّو غمكلّي‑د‑يقّانّ س‑تنباطّ ءيزگان.