1 kurintus 13 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

لحنانت

¹ ءيغ‑ا‑ساوالغ س‑يواليون ن‑بنادم ءولا وين لمالايكا د‑نكّي ءور‑ا‑تحنّوغ، ءور‑گيغ ابلا زوند نّاقوس د‑تقرقاوين س‑تصتنّانايت د‑وقّريان.

² ءيغ‑ژضارغ ا‑تّينيغ س‑ماد‑يّي‑يمالا ربّي، ءيغ‑سّنغ لمعنا ن‑كولّو ما‑ينتلن ءولا كولّو ما‑يلّان، ءيغ‑ومنغ ايلّيغ سّيتّيغ يورار بلا‑دا‑تحنّوغ، ءور‑گيغ يات.

³ ءيغ‑فكيغ كولّو ما‑داري‑يلّان فكغ ءولا دّات‑ينو ار اجدّار بلا‑دا‑تحنّوغ، ءور‑راد‑يّي‑ييلي يات.

⁴ ءيمّا يان غ‑تلّا لحنانت، ار‑يتصبار ار‑يتفولكي د‑وييّاض. ءور‑ا‑يتحساد ءولا‑دا‑يسّيمغور اگايّو‑نس ءولا‑دا‑يتفشّيش.

⁵ ءور‑يباسّل ءولا‑دا‑يترضو ءيخف‑نس ءولا‑دا‑يتقلاقال د‑وييّاض ءولا‑دا‑د‑يسوينگيم لعيب لّي‑گيس‑سكرن.

⁶ ءور‑ا‑يتفراح س‑ما‑يُخشنّ، والاينّي ار‑يتفراح س‑لحقّ.

⁷ ار‑كولّو‑يتاسي ار‑كولّو‑يتامن ار‑كولّو‑يترجو ار‑كولّو‑يتصبار.

⁸ لحنانت ءور‑دارس تّمي. را‑د‑ياشك يان‑وزمز غ‑ور‑را‑ييلي ما‑يتّينين س‑ماد‑اس‑يمالا ربّي، ءولا ءيلّا ما‑يساوالن س‑يواليون ءيغريبن، ءولا ءيلّا ما‑يطّافن تاواسّنا.

⁹ اشكو تحودّا‑تواسّنا لّي‑دارنّغ‑يلّان، ءيحودّا ماد‑اغ‑يمالا ربّي.

¹⁰ والاينّي ءيغ‑د‑يوشكا ما‑ور‑دار تّمي، را‑يسّيتّي ما‑يحودّان.

¹¹ غاكود لّيغ گيغ احشمي ار‑ساوالغ زوند احشمي ار‑سّحسّوغ زوند احشمي ار‑سوينگيمغ زوند احشمي، والاينّي لّيغ وورّيغ گيغ ارگاز فلغ‑ن تيغاوسيوين ن‑يحشماي.

¹² اشكو كولّو مايد نژرّا غيلاد، ءيگا زوند ءيغ‑ا‑نتمناد غ‑لمري ءيلّاسن، ءيمّا غ‑وزمز‑ان را‑نژر ءودم س‑وودم. سّنغ غيلاد ءيميكّ، ءيمّا غ‑وزمز‑ان راد‑يسّانغ كولّو غمكلّي‑يّي‑يسّن ربّي.

¹³ ءيمّا غيلاد، ءيقاما‑سول ليمان د‑رّجا د‑لحنانت، نتني س‑كراض، والاينّي تامزواروت گيسن ا‑ستّ‑يگان د‑لحنانت.