1 kurintus 12 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تيوافكيو زغ‑رّوح لقودوس

¹ ءيمّا تيغاوسيوين ن‑رّوح لقودوس اي‑ايتما، ريغ ا‑تيسّانم لحقّ فلّاسنت.

² سوانگماد‑د مامنك ا‑تجلام غ‑ووسّان لّي‑غ‑ور‑تا‑تسّينم ربّي، ييلي گيگون ما‑كُن‑يتاوين ا‑تّعبادم لاصنام ءيژنژام.

³ غايان ا‑ف‑ريغ ا‑تيسّانم ماياد: يان ءيساوالن س‑تحكيمت ن‑رّوح ن‑ربّي ءور‑را‑ييني «تلّا نّعلت ف‑ياسوع،» ءولا ءيژضار كرا ن‑يان ا‑يتّيني «ياسوع ءيگا سيدي» ابلا س‑تحكيمت ن‑رّوح لقودوس.

⁴ گّوتنت‑توافكيو، والاينّي يان‑رّوح ا‑يلّان.

⁵ گّوتنت‑تووريو، والاينّي يان سيديتنّغ ا‑يلّان.

⁶ گّوتن ءيسكّيرن، والاينّي يان‑ربّي ا‑تن‑يسكارن غ‑كرايگاتّ يان.

⁷ ار‑ياكّا ءي‑كود يان تاحكيمت ن‑رّوح لقودوس ا‑سرس‑يتعاوان وييّاض.

⁸ يان، ار‑اس‑ياكّا اوال لّفهمت س‑رّوح لقودوس. يان ياضني، ار‑اس‑ياكّا اوال ن‑تواسّنا س‑رّوح لقودوس.

⁹ يان ياضني، ار‑اس‑ياكّا س‑رّوح‑اد ا‑باهرا‑يامن. يان ياضني، ار‑اس‑ياكّا س‑رّوح‑اد ا‑يجّوجّي ءيموضان.

¹⁰ ار‑ياكّا ءي‑يان ا‑يسكار لمعجيزات، ار‑ياكّا ءي‑يان ا‑يتّيني س‑ماد‑اس‑يمالا ربّي، ار‑ياكّا ءي‑يان ا‑يتاكُز ما‑يگان وين رّوح لقودوس زغ‑وين لارواح ياضني. ار‑ياكّا ءي‑يان ا‑يساوال س‑يواليون ءيغريبن، ار‑ياكّا ءي‑يان ا‑ييسّان لمعنا ن‑يواليون ءيغريبن.

¹¹ والاينّي كولّو ماياد، ار‑ت‑يسكار رّوح لقودوس لّي‑يگان يان، ار‑ياكّا ءي‑كود يان غمكلّي ءيتّيري نتّا.

ءيگزمان ن‑دّات

¹² كرايگاتّ دّات تطّاف ءيگزمان گّوتنين. غمكاد ا‑يگا لماسيح ءولا نتّا. واخّا يات‑دّات اد‑دارس‑يلّان، گّوتن ءيگزمان‑نس.

¹³ اشكو ندّم كولّواغ س‑ودوم ن‑يان‑رّوح باش ا‑نوورّي نگ يات‑دّات، نگ‑ييت ايت‑يودايا نغد ايت‑تميزار ياضني، نگ‑ييت ءيسمگان نغد وين ءيخف‑نّغ. كولّواغ زغ‑يان‑رّوح ا‑زغ‑اغ‑يسّوا.

¹⁴ اشكو دّات تطّاف ءيگزمان گّوتنين. ءورد غير يان‑وگزّوم ا‑تگا.

¹⁵ ءيغ‑ينّا‑وضار «ءور‑گيغ زغ‑دّات اشكو ءور‑گيغ افوس،» ءيزد س‑صّاحت ءورد دّات ا‑زغ‑يگا؟

¹⁶ ءيغ‑ينّا‑ومژّوغ «ءور‑گيغ زغ‑دّات اشكو ءور‑گيغ تيط،» ءيزد س‑صّاحت ءورد دّات ا‑زغ‑يگا؟

¹⁷ مراد ءيس‑تگا دّات كولّو تيط، ما‑س‑را‑تسفليد؟ مراد ءيس‑تگا دّات كولّو امژّوغ، ما‑س‑را‑تكضّو؟

¹⁸ والاينّي ءيسكر ربّي ءيگزمان ن‑دّات، كرايگاتّ اگزّوم غمكلّي‑ت‑يرا نتّا.

¹⁹ مراد ءيس‑كولّو‑نگا يان‑وگزّوم، ءور‑را‑تيلي دّات.

²⁰ والاينّي نسّن ءيس‑گّوتن ءيگزمان، مونّ كولّوتن غ‑يات‑دّات.

²¹ ءور‑را‑تيژضار تيط ا‑تيني ءي‑وفوس «ءور‑ك‑حتاجّاغ،» ءولا‑را‑ييژضار‑وگايّو ا‑ييني ءي‑يضارن «ءور‑كُن‑حتاجّاغ.»

²² ءور‑ا‑تّينين غمكان اشكو ءيگزمان لّي‑ف‑نغال ءيس‑ضعفن، نحتاجّا‑تن باهرا.

²³ ءولا ءيگزمان لّي‑نتحگار، ار‑تّ‑گيسن‑نتاوي س‑وگُّار. ءولا ءيگزمان لّي‑اغ‑شّحشّامنين، ار‑اسن‑نسّلسا ءيبردان لّي‑ور‑د‑يقّانّ ا‑تن‑نسّلس ءي‑يگزمان ياضني.

²⁴ غمكاد ا‑ف‑يسّنگادّا ربّي دّات، ءيفك لوقر س‑وگُّار ءي‑يگزمان لّي‑ف‑نغال ءور‑گين يات.

²⁵ ءيسكر غمكاد باش اد‑كولّو‑تمعاوانّ ءيگزمان ن‑دّات، ا‑ور‑سار‑بضون ءي‑نگراتسن.

²⁶ ءيغ‑يلّا يان‑وگزّوم يوضن، راد‑اضنّ ءيگزمان كولّوتن. ءيغ‑يتياووقّار يان‑وگزّوم، راد‑فرحن ءيگزمان كولّوتن.

²⁷ كونّي تگام دّات لّماسيح، د‑كرايگاتّ يان گيگون ءيگا اگزّوم غ‑دّات‑نس.

²⁸ غمكاد ا‑يسكر ربّي غ‑يگزمان ن‑ومناگّار: ءيمزوورا گان ءيرقّاسن. ويس سين گان غويلّي ءيتّينين س‑ماد‑اسن‑يمالا ربّي. ويس كراض گان ءيمسلمدن. ءيلين‑داغ غويلّي سكارنين لمعجيزات، د‑ويلّي دار تاوافكا اد‑جّوجّين ءيموضان، د‑ويلّي تعاوانّين د‑ويلّي تگوّادنين د‑ويلّي ساوالنين س‑يواليون ءيغريبن.

²⁹ والاينّي ءيزد ءيرقّاسن اد‑گان كولّوتن؟ ءيس‑گان كولّوتن ويد ءيتّينين كرا‑ياسن‑يمالا ربّي؟ ءيس‑گان كولّوتن ءيمسلمدن؟ ءيس‑گان كولّوتن ويد سكارنين لمعجيزات؟

³⁰ ءيس‑گان كولّوتن ويد جّوجّينين ءيموضان؟ ءيس‑گان كولّوتن ويد ساوالنين س‑يواليون ءيغريبن؟ ءيس‑گان كولّوتن ويد سّبايّانّين لمعني ن‑يواليون ءيغريبن؟

³¹ ءوهو، والاينّي ءيريات باهرا اد‑اون‑يلينت‑توافكيو تيمزوورا. ءيمّا غيلاد راد‑اون‑ملغ يان‑وغاراس لّي‑يوفن كولّو مايان.