1 kurintus 11 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تاژالّيت ءولا تادولي ن‑وگايّو

¹ ضفورات‑يّي غ‑ماد‑سكارغ غمكلّي تضفورغ لماسيح غ‑ما‑يسكار.

² هاتي فرحغ سرون اشكو ار‑تسكارم س‑كولّو ماد‑اون‑نّيغ ار‑تزّگام المّود لّي‑اون‑ين‑سّلكمغ.

³ والاينّي ريغ ا‑تيسّانم ماياد: ءيگا لماسيح ءيخف ن‑كرايگاتّ ارگاز، ءيگ‑ورگاز ءيخف ن‑تمغارت‑نس، ءيگ ربّي ءيخف لّماسيح.

⁴ ارگاز نّا‑يدالن اگايّو‑نس ءيغ‑ا‑يتژالّا نغد ءيغ‑ا‑يتّيني س‑ماد‑اس‑يمالا ربّي، هاتي ار‑يشّحشّام غوالّي ءيگان ءيخف‑نس.

⁵ ءيمّا تامغارت نّا‑ور‑يدالن اگايّو‑نس ءيغ‑ا‑تّژالّا نغد ءيغ‑ا‑تّيني س‑ماد‑اس‑يمالا ربّي، نتّات ار‑تشّحشّام غوالّي ءيگان ءيخف‑نس. را‑يگ غايان زوند ءيغ‑تسّماكّرد اگايّو‑نس.

⁶ تامغارت نّا‑ور‑يدالن اگايّو‑نس، را‑ياف ا‑تلاسّ ازّار‑نس. ءيمّا غايان، لفضحت ا‑را‑يگ ءي‑يات ءيلاسّن ازّار‑نس نغد تسّماكّرد اگايّو‑نس. غمكان ا‑س‑يبان ءيس‑فلّاس‑يلّا ا‑تي‑تدل.

⁷ ارگاز، ءيلّا فلّاس ا‑ور‑يدال اگايّو‑نس اشكو ربّي ءيخلق ارگاز ف‑صّورت‑نس، ءيبان گيس لمجد ن‑ربّي. ءيمّا تامغارت، ءيبان گيس لمجد ن‑ورگاز.

⁸ غ‑يسيزوار ءور‑يتياوسكار‑ورگاز زغ‑تمغارت، والاينّي تّياوسكار‑تمغارت زغ‑ورگاز.

⁹ ءور‑يتياوسكار‑ورگاز ف‑سّيبت ن‑تمغارت، والاينّي تامغارت ا‑يتياوسكارن ف‑سّيبت ن‑ورگاز.

¹⁰ ماياد ا‑ف‑يلّا ف‑تمغارت ا‑تّاسي تاماتارت‑اد ف‑يخف‑نس، باش ا‑تمالا ءيس‑تگا تين‑ورگاز‑نس. ءيقّان‑تّ‑يد ماياد ف‑سّيبت لّمالايكا.

¹¹ والاينّي نسّن ءيس‑ور‑نگارانت‑تمغارين د‑يرگازن غ‑تامونت ن‑سيديتنّغ، ءولا نگاران ءيرگازن د‑تمغارين.

¹² اشكو تّياوسكار‑تمغارت زغ‑ورگاز، ار‑يتلول‑ورگاز زغ‑تمغارت. كولّو مايان، ربّي ا‑ت‑يقصادن.

¹³ ما‑تنّام كونّي؟ ءيس‑را‑يفولكي ءيغ‑تژّولّا‑تمغارت ءي‑ربّي د‑وگايّو‑نس ءور‑يديل؟

¹⁴ ءيس‑ور‑تسّينم، ارگاز نّا‑دار‑يغزّيف‑وازّار، ءور‑را‑تي‑توقّارن مدّن.

¹⁵ والاينّي تفولكي‑تمغارت نّا‑دار ازّار ءيغزّيفن، اشكو ءيفكا‑ياس ربّي ازّار‑نس زوند يات‑تملسيت.

¹⁶ ءيغ‑يلّا ما‑يران ا‑ديدنّغ‑يتژي ف‑ماياد، ءور‑راد‑اس‑ينيغ ابلا: غمكاد ا‑نسكار نكُّني ءولا كولّو ءيمناگّارن ن‑ربّي.

ءيمنسي ن‑سيديتنّغ

¹⁷ ءيمّا غيلاد را‑كُن‑وصّاغ ف‑كرا ن‑تغاوسيوين ياضني، ءور‑ژضارغ ا‑كُن‑فلّاسنت‑الغّ. اشكو غاكود نّا‑تمناگّارم ءور‑ا‑تسكارم لخير والاينّي لخُشانت ا‑تسكارم.

¹⁸ تاغاوسا تامزواروت ا‑ستّ‑يگان: سفلدغ ءيس‑ا‑تاطّوم غاكود نّا‑ن‑تمناگّارم. ءيرواس‑يّي ءيس‑ورد تيكركاس ايان،

¹⁹ اشكو ءيقّان‑د ا‑ياطّو كرا ف‑كرا باش ا‑گيگون‑يبان مانوي‑ف‑يرضا ربّي.

²⁰ والاينّي لّيغ ا‑ن‑تمناگّارم ءورد ءيمنسي ن‑سيديتنّغ ا‑تشتّام.

²¹ اشكو كرايگاتّ يان ار‑يتزاياد ار‑يشتّا بلا‑دا‑يتقل س‑وييّاض، ار‑گيگون‑يتّيلي كرا ياغ لاژ، ار‑يتّيلي كرا ءينوفل س‑تيسّي.

²² ماخ، ءور‑دارون تيگُمّا‑نّون ا‑گيسنتي‑تشتّام ار‑گيسنتي‑تسّام؟ ءيس‑تحگرم امناگّار ن‑ربّي تيريم ا‑تشّحشّامّ غويلّي ءور‑دار يات؟ ما‑راد‑اون‑ينيغ؟ ءيس‑ترام ا‑كُن‑الغّ ف‑وان غايان؟ ءوهو، ءور‑را‑كُن‑فلّاس‑الغّ.

²³ مايلّي‑يّي‑د‑يملا سيديتنّغ، ها‑يّي مليغ‑اون‑ت. سيديتنّغ ياسوع، غ‑يض‑ان غ‑را‑ينز، ياسي تانگولت

²⁴ ءيشكر ربّي ءيبّي‑تّ ييني: «ختاد تگا دّات‑ينو، تّياوفكا ف‑سّيبت‑نّون. سكارات ماياد ا‑يّي‑د‑سرس‑تسوينگيمّ.»

²⁵ ياسي ءولا لكاس غمكاد غ‑يسيگُّرا ن‑يمنسي ييني: «لكاس‑اد ءيگا لعهد لّجديد غ‑گراتون د‑ربّي س‑يدامّن‑ينو. سكارات ماياد غاكود نّا‑زگيس‑تسّام، ا‑يّي‑د‑سرس‑تسوينگيمّ.»

²⁶ ءيمّا غيلاد غاكود نّا‑غ‑ا‑تشتّام زغ‑تنگولت‑اد ار‑تسّام زغ‑لكاس‑اد، ار‑تاكّام توگّا ف‑لموت ن‑سيديتنّغ ارد‑د‑يوورّي.

²⁷ والاينّي يان ءيشّان زغ‑تنگولت ن‑سيديتنّغ نغد ءيسوا زغ‑لكاس‑نس بلا‑دا‑ت‑يتوقّار، لحوكم ن‑ربّي ا‑را‑فلّاس‑ييلي اشكو ءيسكر زغ‑دّات ن‑سيديتنّغ د‑يدامّن‑نس زوند ءيغ‑ور‑گين يات.

²⁸ ءيلّا ف‑كرايگاتّ يان ا‑زوار‑يارم ءيخف‑نس، ءيشّ ءيلمّا زغ‑تنگولت ءيسو زغ‑لكاس.

²⁹ اشكو وانّا ءيشّان ءيسو بلا ءيسوانگم لمعنا ن‑دّات ن‑سيديتنّغ، هاتي لحوكم ن‑ربّي ا‑را‑يزّوگز ف‑يخف‑نس ءيغ‑يشّا ءيسو.

³⁰ ماياد ا‑ف‑گيگون‑يگّوت ما‑يضعفن ءيهرش، ييلي ما‑يمّوتن.

³¹ ءيغ‑ا‑نسيگّيل غ‑وولاون‑نّغ، ءور‑را‑فلّانّغ‑يتّوت لحوكم.

³² والاينّي ءيغ‑ا‑فلّانّغ‑يتحكام سيديتنّغ، ار‑اغ‑يتربّا باش ا‑ور‑نتياوهلاك س‑لهالاك ن‑دّونيت‑اد.

³³ ءيمّا كونّي اي‑ايتما، غاكود نّا‑تمناگّارم ا‑تشّم، ءيلّا ف‑كود يان ا‑يقل س‑وايّاض.

³⁴ ءيغ‑يلّا ماد‑باهرا‑ياغ لاژ ءيخصّا‑ت ا‑يشّ غ‑تگمّي‑نس، ا‑ور‑فلّاون‑يتّوت لحوكم ن‑ربّي لّيغ ا‑تمناگّارم. ءيمّا تيغاوسيوين ياضني، را‑كُن‑فلّاسنت‑وصّاغ غاكود نّا‑ن‑دارون‑وشكيغ.