1 kurintus 10 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

انفات ءي‑يلاهات ن‑دّونيت‑اد

¹ واي‑ايتما، ريغ ا‑ور‑تتّوم ما‑يجران ءي‑يمزوورا‑نّغ غايد ءيزرين. نتني كولّوتن ءيسّنتال‑تن‑ومدلو، زرين كولّو غ‑وامّاس ن‑ومدا،

² دّمن كولّو س‑يسم ن‑موسا غ‑ومدلو د‑ومدا.

³ ار‑كولّو‑شتّان تيرمت زغ‑يگنّا،

⁴ ار‑كولّو‑سّان تيسّي زغ‑يگنّا، اشكو ار‑سّان زغ‑وژرو ن‑يگنّا لّي‑بدّا‑ديدسن‑يتمونون. لماسيح ا‑يگان اژرو‑ان.

⁵ والاينّي ما‑گيسن‑يگّوتن، ءور‑فلّاسن‑يرضي ربّي، مّتن جلون ءيمضّالن‑نسن غ‑لخلا.

⁶ غايلّي‑س‑اسن‑تگُّرا ار‑اغ‑يمالا ا‑ور‑نتّيري ما‑يُخشنّ غمكلّي تّيرين نتني،

⁷ ءولا‑دا‑نتعباد ءيلاهات ياضني زوند كرا گيسن غمكلّي ءيتياران: «سكيوسن مدّن ار‑شتّان ار‑سّان، نكرن ار‑تحوشن.»

⁸ ا‑ور‑نتفساد زوند كرا گيسن، ءيتياوهلاك گيسن سين ءيد‑مراو د‑كراض ن‑يد‑والف (000‏.23) غ‑يان‑واسّ.

⁹ ءيلّا فلّانّغ ا‑ور‑نتارم ربّي زوند كرا گيسن، نغن‑تن ءيلگمّاضن.

¹⁰ ا‑ور‑نتنگموگ زوند كرا گيسن، ءيهلك‑تن لمالاك لّموت.

¹¹ غايلّي‑س‑اسن‑تگُّرا، ءيجرا غمكان باش اد‑اغ‑يمل ا‑ور‑نسكار زوند نتني، ءيتيارا كولّو ف‑سّيبت‑نّغ باش ا‑نرار لعاقل نكُّني لّي‑يزّراين ءيسيگُّرا ن‑دّونيت.

¹² وانّا ءيتّينين ءيس‑يزگا، ءيرار لعاقل ا‑ور‑يضر.

¹³ ءور‑فلّاون‑تزري كرا ن‑تاسّاست ابلا ختالّي كولّو ءيزراين ف‑مدّن. ءيمّا ربّي ءيزگا‑بدّا غ‑واوال‑نس، ءور‑را‑كُن‑يادج ا‑تّيارامّ ءوگُّار ن‑ما‑مي‑تژضارم. هاتي غاكود نّا‑تزرايم غ‑تاسّاست راد‑اون‑يمل مامنك ا‑ستّي‑تنروم تنجمّ زغ‑گيس.

¹⁴ واي‑ايتما عزّانين، ماياد ا‑ف‑ا‑ياون‑تّينيغ، تانفات ءي‑يلاهات ن‑دّونيت‑اد.

¹⁵ ار‑سرون‑ساوالغ زوند ايت‑لعاقل. سوانگمات د‑يخف‑نّون غ‑ما‑راد‑اون‑ينيغ.

¹⁶ هاتي لكاس امباركي لّي‑ف‑ا‑نتشكار ربّي، غاكود نّا‑زگيس‑نسّا ار‑نكشّم غ‑تامونت ن‑يدامّن لّماسيح. ءولا تانگولت ن‑وغروم لّي‑نتبّي، غاكود نّا‑زگيس‑نشتّا ار‑نكشّم غ‑تامونت ن‑دّات لّماسيح.

¹⁷ يات‑تنگولت ا‑يلّان اشكو يان ا‑نگا نكُّني لّي‑يگّوتن، ار‑كولّو‑نطّاف تاغامت غ‑تنگولت‑ان.

¹⁸ سوانگمات غ‑ماد‑سكارن ايت‑يودايا. غويلّي شتّانين تيغرسيو ار‑كشّمن غ‑تامونت ن‑وژرو ن‑تغرسي.

¹⁹ والاينّي ماد‑قصادغ غ‑واوال‑اد؟ ءيس‑تگا كرا، تيفيّي ن‑تغرسيو لّاصنام؟ نغد ءيس‑گان كرا، لاصنام؟

²⁰ ءوهو، والاينّي تيغرسيو لّي‑مي‑قّرسن ايت‑لاصنام ار‑تنت‑اكّان ءي‑لجنون ءورد ءي‑ربّي. ءور‑ريغ ا‑تكشّمّ كونّي غ‑ما‑يگان وين لجنون.

²¹ ءور‑را‑تيژضارم ا‑تسّام زغ‑لكاس ن‑سيديتنّغ د‑لكاس لّجنون. ءور‑را‑تيژضارم ا‑تشتّام زغ‑لميدا ن‑سيديتنّغ د‑لميدا لّجنون.

²² ءيس‑ترام ا‑ستّي‑تسّطيّارم ءي‑سيديتنّغ؟ ءيس‑فلّاس‑تجهّدم كونّي؟

²³ ار‑تّينين مدّن: «ءيحلّا كرايگاتّ كرا.» والاينّي ءور‑را‑ينفعا كرايگاتّ كرا. «ءيحلّا كرايگاتّ كرا،» والاينّي ءور‑راد‑اغ‑يسّدوس كرايگاتّ كرا.

سيگّيلات ما‑يفولكين ءي‑وييّاض

²⁴ ا‑ور‑يسيگّيل يان غير ما‑يفولكين ءي‑يخف‑نس، والاينّي ا‑ت‑يسيگّيل ءي‑وييّاض.

²⁵ ءيحلّا‑ياون ا‑تشتّام تيفيّي نّا‑ينزّان غ‑سّوق بلا‑دا‑فلّاس‑تسقسام ءولا تشكّام غ‑وول‑نّون،

²⁶ اشكو «اكال وين ربّي ا‑يگا، ءولا كولّو ما‑گيس‑يلّان.»

²⁷ ءيغ‑اون‑يعرض كرا ن‑يان ءور‑يسّينّ ربّي، ءيغ‑ترام ا‑ديدس‑تمونم، شتّايات اينّا‑ياون‑ين‑يسرس بلا تسقسام ءولا تشكّام غ‑وول‑نّون.

²⁸ والاينّي ءيغ‑اون‑ينّا كرا ن‑يان «تيفيّي‑اد تگا تين لاصنام،» ءيلّا فلّاون ا‑ستّ‑ور‑تشّم. اشكو ءيغ‑تّي‑تشّام، ءورد افولكي اين تسكرم ءي‑والّي‑اون‑ت‑ينّان، اشكو را‑ييلي شّكّ.

²⁹ شّكّ‑اد را‑ييلي غ‑وول‑نس نتّا ءورد ءول‑نّون. والاينّي ماخ ايلّيغ راد‑كّيسغ ءي‑يخف‑ينو ماد‑يّي‑يحلّان ف‑سّيبت ن‑يان ءيشكّان؟

³⁰ ءيغ‑ا‑تشكارغ ربّي ف‑ماد‑شتّاغ، ماخ ايلّيغ را‑يّي‑تژين مدّن ف‑مايلّي‑ف‑ا‑تشكارغ ربّي؟

³¹ والاينّي كولّو ما‑تشتّام ءولا كولّو ما‑تسّام ءولا كولّو ما‑تسكارم، ءيلّا فلّاون ا‑سرس‑تمالام لمجد ن‑ربّي.

³² ا‑ور‑تّي‑تسّطيّارم ءي‑ايت‑يودايا ءولا ايت‑تميزار ياضني ءولا ايت‑ومناگّار ن‑ربّي.

³³ سكارات زوند نكّي، ار‑ن‑تگّاغ تيقّي‑نو ا‑بدّا‑ترضوغ كولّو مدّن. ءور‑ا‑سيگّيلغ غير ما‑يفولكين ءي‑يخف‑ينو والاينّي ار‑سيگّيلغ ما‑يفولكين ءي‑وييّاض، باش اد‑وورّين نجمن.