1 kurintus 1 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ زغ‑بولُس ارقّاس لّماسيح ياسوع غمكلّي ءيرا ربّي لّي‑يّي‑يژلين ءي‑تووري‑اد، د‑زغ‑گماتنّغ سوستانيس.

² ءي‑ايت‑ومناگّار ن‑ربّي غ‑تمدينت ن‑كورينتوس، ا‑تن‑يگان د‑ويلّي ءيژلي ربّي ف‑وودم لّماسيح ياسوع اد‑گن ءيمژلاين‑نس، زوند كولّو وييّاض غ‑كرايگاتّ ماني لّي‑زاوگنين غ‑يسم ن‑سيديتنّغ ياسوع لماسيح، ءيگ سيديتسن ءيگ سيديتنّغ ءولا نكُّني.

³ اد‑اون‑تيلي لباراكا د‑سّلامت زغ‑ربّي باباتنّغ د‑سيديتنّغ ياسوع لماسيح.

لباراكات ف‑وودم لّماسيح

⁴ ار‑بدّا‑فلّاون‑تشكارغ ربّي‑نو ف‑سّيبت لّباراكا لّي‑س‑كُن‑يبارك ف‑وودم لّماسيح ياسوع،

⁵ اشكو ءيفكا‑ياون كولّو تيميخار لّماسيح ايلّيغ دارون تگّوت‑تواسّنا د‑يواليون شوانين.

⁶ ربّي ءيزّگا گيگون توگّا لّي‑اون‑ين‑نيوي ف‑لماسيح.

⁷ ءور‑اون‑لاح يات غ‑توافكيو ن‑رّوح غيلاد غ‑ا‑تّقلم س‑سيديتنّغ ياسوع لماسيح ارد‑د‑يوورّي ءيبايّن.

⁸ نتّان ا‑را‑كُن‑يسّدوس ار ءيسيگُّرا ف‑ا‑ور‑گيگون‑ييلي كرا لّعيب غ‑واسّ لّي‑غ‑را‑د‑يوورّي سيديتنّغ ياسوع لماسيح.

⁹ ربّي ءيقاما‑بدّا غ‑واوال‑نس. نتّان اد‑اون‑د‑يغران ا‑تكشمّ غ‑تامونت ن‑ياسوع لماسيح سيديتنّغ.

امشاشكا ن‑ينگراتون

¹⁰ واي‑ايتما، را‑كُن‑ضالبغ غيلاد س‑يسم ن‑سيديتنّغ ياسوع لماسيح، ا‑د‑كولّو‑تمشاشكام بلا‑دا‑تاطّوم ءي‑نگراتون. ءيلّا فلّاون ا‑تگم يان غ‑يسوينگيمن‑نّون د‑تنباضين‑نّون.

¹¹ والاينّي اي‑ايتما، ءينّا‑يّي كرا زغ‑ايت‑تگمّي ن‑خلوّي ءيس‑ا‑تّژيم ءي‑نگراتون.

¹² تسّنم ما‑ف‑ا‑ساوالغ. كرا گيگون ار‑يتّيني: «گيغ وين بولُس.» كرا گيگون ار‑يتّيني: «گيغ وين ابولُس.» كرا گيگون ار‑يتّيني: «گيغ وين بطرُس.» كرا گيگون ار‑يتّيني: «گيغ وين لماسيح.»

¹³ والاينّي را‑كُن‑سقساغ، ءيس‑يبضا لماسيح؟ ءيزد بولُس ا‑فلّاون‑يمّوتن ف‑وگّجدي؟ ءيزد س‑يسم ن‑بولُس ا‑س‑تدّمّ غ‑وامان؟

¹⁴ ها‑يّي شكرغ ءي‑ربّي اشكو ءور‑سّدّيمغ يان گيگون ابلا كريسبوس د‑گايوس،

¹⁵ ف‑ا‑ور‑ييني كرا ن‑يان ءيزد س‑يسم ن‑بولُس ا‑س‑يدّم.

¹⁶ سّنغ ءيس‑سّدّمغ ايت‑تگمّي ن‑ستيفاناس ءولا نتني، ءيمّا وييّاض ءور‑سّينغ ءيس‑سّدّمغ كرا ياضني.

¹⁷ اشكو لماسيح ءور‑يّي‑يوزن اد‑سّدّمغ مدّن، هاتي يوزن‑يّي اد‑اسن‑تبرّاحغ س‑لخبار ءيفولكين. ءورد ءيواليون لّعاقل ا‑س‑ا‑تبرّاحغ، ف‑ا‑ور‑رارغ لموت لّماسيح ف‑وگّجدي بلا لفايتّ.

تاحكيمت د‑ونوفل

¹⁸ اشكو لخبار ن‑وگّجدي ءيگا زوند انوفل دار ويلّي تياوهلاكنين، والاينّي تاحكيمت ءيتجهّدن ن‑ربّي ا‑دارنّغ‑يگا نكُّني لّي‑ينجمن.

¹⁹ ءيتيارا غ‑وارّا ن‑ربّي: «راد‑خلوغ لعاقل ن‑ايت‑لعاقل، سّضرغ لفهمت ن‑ايت‑لفهمت.»

²⁰ ما‑يگا باب لّعاقل؟ ما‑يگا باب ن‑تغري؟ ما‑يگا باب ن‑يواليون ن‑دّونيت‑اد؟ ها‑ربّي ءيرور لعاقل ن‑دّونيت‑اد ءيگا انوفل.

²¹ اشكو ربّي س‑تحكيمت‑نس ا‑س‑يقصاد غ‑مدّن ن‑دّونيت‑اد ا‑ور‑يژضارن اد‑وورّين ءيسّانّ ربّي س‑لعاقل‑نسن، والاينّي ءيرضا ا‑يجّنجم وينّا ءومنّين س‑تبرّاحت‑نّغ لّي‑ف‑ا‑تّينين «تگا انوفل.»

²² ايت‑يودايا ار‑زگينّغ‑تضالابن لمعجيزات. ايت‑تميزار ياضني ار‑زگينّغ‑تّيرين ءيواليون لّعاقل.

²³ ءيمّا نكُّني ار‑اسن‑نتبرّاح ف‑لماسيح لّي‑يمّوتن ف‑وگّجدي. اوال‑اد ءيگا تابايضّرت ءي‑ايت‑يودايا، ءيگ انوفل دار ايت‑تميزار ياضني.

²⁴ والاينّي لخبار‑اد ف‑لماسيح ءيگا تاژضّارت ن‑ربّي ءولا تاحكيمت ن‑ربّي غ‑دار‑ويلّي مي ءيغرا، گن‑ييت ايت‑يودايا نغد ايت‑تميزار ياضني.

²⁵ اشكو مايد مي تّينين ‹انوفل› ن‑ربّي، يوگُر لعاقل ن‑بنادم، ءولا مايد مي تّينين ‹ضّعف› ن‑ربّي، يوگُر تادواست ن‑بنادم.

²⁶ واي‑ايتما، سوانگماد‑د ما‑ستّين‑تكّام تگام‑ت لّيغ‑اون‑د‑يغرا ربّي. ءيدروس گيگون ما‑يطّافن تاحكيمت غمكلّي غالن مدّن ن‑دّونيت‑اد. ءيدروس گيگون ما‑ن‑يلّان س‑واوال. ءيدروس گيگون ما‑يگان يوس ن‑تگمّي ءيمقّورن.

²⁷ والاينّي ربّي ءيستي مايلّي ءيگان انوفل دار ايت‑دّونيت‑اد، باش ا‑يشّحشّم غويلّي ءيتّينين ءيس‑دارسن لعاقل. ءيستي ما‑يضعفن دار ايت‑دّونيت‑اد باش ا‑يشّحشّم غويلّي دوسنين.

²⁸ ربّي ءيستي مايلّي حگرن لوحن‑ت‑ين ايت‑دّونيت‑اد، ءيستي مايلّي دارسن ءور‑يگين يات، باش ا‑يسّضر ماد‑دارسن‑يگان كرا ءيهيّان.

²⁹ غمكاد ا‑يقصاد ربّي باش ا‑ور‑ياف بنادم ما‑ف‑ا‑يتالغ ءيخف‑نس غ‑لگدّام ن‑ربّي.

³⁰ نتّان اد‑اون‑يفكان ا‑تگم وين لماسيح. ءيفك‑اغ تاحكيمت لّماسيح، ءيفك‑اغ افولكي لّماسيح، ءيژلي‑اغ س‑وژلاي لّماسيح، ءيفوكّو‑اغ ف‑وودم لّماسيح.

³¹ ماياد ا‑ف‑يتيارا: «وانّا ءيران ا‑يالغ، يالغ سيديتنّغ.»