1 bṭrus 5 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تاوروت ن‑ربّي

¹ راد‑ضالبغ ءيمغارن غ‑گراتون، نكّي‑اد ءيگان امغار زوند كونّي، گغ ءينيگي ف‑ورفوفن لّماسيح، طّافغ تاغامت غ‑لمجد لّي‑را‑د‑يبان.

² ضالبغ‑كُن ا‑تكسم تاوروت ن‑ربّي لّي‑يفل غ‑گر ءيفاسّن‑نّون. تگابلم‑تّ ءورد س‑بزّز والاينّي س‑لفرح غمكلّي ءيرا ربّي، ءورد باش ا‑تامژم كرا ءي‑يخف‑نّون والاينّي س‑نّييت ءيصفان.

³ ا‑ور‑تسّيمغورم ءيخف‑نّون ف‑ويلّي‑اون‑يفكا ربّي، والاينّي مالات ءي‑تووروت افولكي لّي‑س‑ا‑تسكارم باش اد‑سكارن ءولا نتني غمكان.

⁴ غاكود لّيغ را‑د‑ياشك‑ومكسا ءيمقّورن راد‑اون‑يفك تّاج لّمجد لّي‑ور‑را‑سار‑يمدو.

⁵ غمكان ءولا كونّي ا‑يعيّالن، ءيلّا فلّاون ا‑تسفليدم س‑يمغارن‑نّون. بكيسات كولّوكن س‑تبانّكا ن‑صّبر باش ا‑تّخدامّ ءي‑نگراتون. اشكو ءيتيارا: «ربّي ار‑يتضاضّا وانّا ءيسّيمغورن ءيخف‑نس، ار‑يتباراك وانّا ءيژّيمژاين ءيخف‑نس.»

⁶ كنوات غ‑دّو‑وفوس ءيتجهّدن ن‑ربّي باش ا‑كُن‑يالّ غ‑وزمز نّا‑يرا.

⁷ لوحات‑ن كولّو تيغوفيوين‑نّون ف‑ربّي اشكو ار‑گيگون‑يتهلّا.

⁸ امژات غ‑يخف‑نّون ترارم لعاقل، اشكو ار‑يتلّي‑ونوّاش‑نّون ءيبليس زوند ءيزم، ار‑يندّر ار‑يسيگّيل س‑ما‑يقُّاي.

⁹ ضاضّات ءيبليس تزگام غ‑ليمان‑نّون، تيسّانم ءيزد ايتماتون غ‑دّونيت كولّوتّ ار‑زراين غ‑ترفوفنت زوند كونّي.

¹⁰ والاينّي ربّي لّي‑بدّا‑يران اد‑اغ‑يبارك، ءيغرا‑ياون‑د ا‑تكشمّ س‑لمجد‑نس ءيدومن غ‑تامونت لّماسيح. تيگيرا ن‑ما‑ترفوفنم يان ءيميكّ، را‑كُن‑ياوي س‑سّلامت ءيكمّلن ءيسّدوس‑كُن ءيزّگا‑كُن ءيسّبيدّ‑كُن ف‑لّساس ءيصحان.

¹¹ نتّان ا‑مي‑تلّا لقوّا غيلاد ءولا كولّو مايد‑د‑يفتان، امين.

¹² تابرات‑اد ءيگزّولن ءوريغ‑اون‑تّ‑ين ف‑وفوس ن‑سيلوانوس لّي‑داري‑يگان گما ءيفولكين ءيزگان. اراغ‑تّ‑ين باش ا‑كُن‑زّعامغ، ملغ‑اون ءيزد غمكاد ا‑تگا لباراكا ن‑ربّي س‑لحقّ. زگايات غ‑لباراكا‑ياد.

¹³ ار‑ن‑فلّاون‑تسلّامن ايتماتون غ‑تمدينت ن‑بابيل، ءيژلي‑تن ربّي غمكلّي‑كُن‑يژلي كونّي. ار‑ن‑فلّاون‑يتسلّام ءيوي مارقُس ءولا نتّا.

¹⁴ نسالّامات ءي‑نگراتون س‑ونسالّام ن‑تاگُمات. اد‑اون‑تيلي سّلامت كولّوكن كونّي لّي‑يگان وين لماسيح.