1 bṭrus 4 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تودرت لّجديد

¹ مايان ا‑ف‑راد‑اون‑ينيغ، لّيغ ءيرفوفن لماسيح غ‑دّات‑نس، ءيلّا فلّاون ا‑تبكيسم ا‑ترفوفنم ءولا كونّي. اشكو وانّا ءيرفوفنّ غ‑دّات‑نس ءور‑سول‑ا‑يتلهو س‑دّنوب.

² ءور‑سول‑ا‑يزّراي ءوسّان‑نس غ‑ما‑يتّيري بنادم ءي‑يخف‑نس، والاينّي ار‑يزّراي ماد‑اس‑يقامان غ‑دّونيت‑اد غ‑ما‑يرضان ربّي.

³ غايد ءيزرين تكّام‑تّين ار‑تسكارم ما‑يعزّان دار غويلّي ءور‑سّينّين ربّي، ءيمّا غيلاد يوودا‑كُن غ‑ما‑يُخشنّ. هان نتني ار‑تفسادن ار‑تشتهون، ار‑سّنوفولن ءيخف‑نسن س‑تيسّي، ار‑تمونون ف‑لخُشانت، ار‑سكارن لعيب ءي‑نگراتسن، ار‑تعبادن ءيلاهات ن‑دّونيت‑اد س‑تجلخيت‑نسن.

⁴ ار‑گيگون‑تعجّابن ار‑كُن‑رگّمن، اشكو ءور‑ا‑تّيريم ا‑ديدسن‑تّمونوم ف‑تيلّاي‑نسن.

⁵ والاينّي ءيقّان‑تن‑د لحساب غ‑دار غوالّي يوجادن ا‑يوت لحوكم ف‑ويلّي دّرنين ءولا غويلّي مّوتنين.

⁶ مايان ا‑ف‑يدّا لماسيح ا‑ياوي لخبار ءيفولكين ءي‑ويلّي مّوتنين ءولا نتني لّي‑ف‑يضر لحوكم لّموت ن‑دّات غمكلّي ءيطّار ف‑كولّو مدّن، باش اد‑وورّين دّرن س‑تودرت ن‑رّوح غمكلّي ءيدّر ربّي.

لحنانت ءولا لمعاونت

⁷ هاتي ياكمور‑د ءيسيگُّرا ن‑كولّو ما‑يلّان. رارات لعاقل تغويم غ‑يخف‑نّون باش ا‑تّژالّام ار‑تضالابم ربّي.

⁸ والاينّي تاغاوسا ءيهيّان ا‑ستّ‑يگان، ا‑تّحنّوم ءي‑نگراتون، اشكو لحنانت ار‑تسّنتال كيگان د‑دّنوب.

⁹ سّمرحبات س‑ينگراتون غ‑تگُمّا‑نّون بلا‑دا‑تّنگموگم.

¹⁰ ءيلّا ف‑كرايگاتّ يان ا‑يسكار س‑توافكا ن‑رّوح نّا‑ياس‑يفكا ربّي، ار‑سرس‑يتعاوان وييّاض س‑نّييت ن‑وول‑نس، باش ا‑كولّو‑تّمعاوانم ءي‑نگراتون س‑لباراكات ن‑ربّي لّي‑گّوتنين.

¹¹ وانّا ءيساوالن، ءيلّا فلّاس ا‑يساوال س‑ماد‑اس‑يمالا ربّي. وانّا ءيتعاوانّ، ءيلّا فلّاس ا‑يتعاوان وييّاض س‑تژضّارت لّي‑اس‑ياكّا ربّي. غمكاد ا‑س‑راد‑كولّو‑الغن مدّن ربّي ف‑ما‑تسكارم س‑يسم ن‑ياسوع لماسيح. نتّان ا‑مي‑يلّا لمجد د‑لقوّا غيلاد ءولا كولّو مايد‑د‑يفتان، امين.

تارفوفنت ف‑سّيبت لّماسيح

¹² واي‑ايتما عزّانين، ا‑ور‑تّعجّابم غ‑لعافيت ن‑ترفوفنت لّي‑كُن‑يتارمن، زوند ءيغ‑اون‑يجرا كرا ءيگان لجديد.

¹³ والاينّي فرحات لّيغ تكشمّ د‑لماسيح غ‑ترفوفنت، باش ا‑تفرحم س‑وگُّار غاكود لّيغ را‑د‑يبان لمجد‑نس ءي‑كولّو مدّن.

¹⁴ ءيمباركين ا‑تگام ءيغ‑ا‑كُن‑رگّمن ف‑سّيبت ن‑ما‑تگام وين لماسيح، اشكو ءيگّوز‑د فلّاون رّوح لّمجد لّي‑يگان رّوح ن‑ربّي.

¹⁵ والاينّي ءيخصّا ا‑ور‑يرفوفن يان گيگون ف‑سّيبت ن‑ما‑ينغا نغد يوكُر نغد ءيفّوغ زغ‑لقانون نغد ءيكشم ما‑يگان وين وييّاض.

¹⁶ والاينّي ءيغ‑يرفوفن ف‑سّيبت ن‑ما‑يگا اماسيحي، ءيلّا فلّاس ا‑ور‑يحشم، والاينّي ا‑يالغ ربّي اشكو مدّن ار‑اس‑تگّان ءيسم لّي‑يگان وين لماسيح.

¹⁷ هاتي غيلاد ءيلكم‑د‑وزمز لّي‑غ‑را‑يوت ربّي لحوكم، را‑ت‑يوت زوار ف‑ايت‑تگمّي‑نس. والاينّي ءيغ‑سرنّغ‑يبدا نكُّني، ما‑س‑را‑تگُّرو ءي‑ويلّي اگُينين لخبار ءيفولكين ن‑ربّي؟

¹⁸ غمكلّي ءيتياران: «ءيغ‑يشقا ا‑ينجم يان ءيفولكين ما‑را‑يجرو ءي‑يان ءيرورن تيغوردين‑نس س‑ربّي ءولا يان ءيسالان دّنوب؟»

¹⁹ ماياد ا‑ف‑راد‑ينيغ ءي‑كولّو وينّا رفوفنّين ف‑ما‑يرا ربّي: فكات ءيخفاون‑نّون غ‑وفوس ن‑والّي‑كُن‑يخلقن لّي‑بدّا‑يزگان غ‑واوال‑نس، تزايدم ار‑تسكارم افولكي.