1 bṭrus 3 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تيمغارين د‑يرگازن

¹ غمكان ءولا كونّينتي ا‑تيمغارين، ءيلّا فلّاونت ا‑تسفليدمت س‑يرگازن‑نّونت. اشكو ءيغ‑ور‑يري‑ورگاز اوال ن‑ربّي، را‑سرس‑يوورّي بلا‑ياس‑تنّيت يات لّيغ ا‑يتمناد مامنك ا‑تسكارت،

² اشكو را‑يژر مامنك ا‑يغوس‑وول‑نّم س‑لوقر ءيگّوتن.

³ والاينّي ا‑ور‑يگ‑وفولكي‑نّونت افولكي ن‑يژري غ‑دار مدّن، زوند تالّامين ن‑وازّار نغد ءيكُلان ن‑وورغ نغد تيملسا غُلانين.

⁴ والاينّي ءيخصّا ا‑يگ‑وفولكي‑نّونت افولكي ءينتلن ن‑وول ءيهنّان ءيعمّرن س‑لحنانت. ءور‑سار‑يضر‑وفولكي‑اد، ءيعزّو باهرا دار ربّي.

⁵ اشكو غمكان ا‑ستّين كّانت‑تمغارين تيمومنين لّي‑ترجونين غ‑ربّي غايد ءيزرين. غمكان ا‑س‑ا‑سّفولكينت ءيخفاون‑نسنت ار‑سفليدنت س‑يرگازن‑نسنت.

⁶ غمكان‑نّيت ا‑تگا سارا، ار‑تسفليد س‑يبراهيم ار‑اس‑تّيني «سيدي.» ءولا كونّينتي غيلاد، ءيستيس ن‑سارا ا‑تگامت، ءيغ‑ا‑تسكارمت افولكي بلا‑دا‑تّيكساضمت يات.

⁷ غمكان ءولا كونّي ا‑يرگازن، ءيلّا فلّاون ا‑تسوينگيمّ غ‑تمغارين‑نّون، تزدغم ديدسنت بلا‑دا‑تتّوم ءيس‑ور‑باهرا‑دوسنت زوند كونّي، ار‑تنتي‑تّوقّارم اشكو وورتنت ءولا نتنتي ديدون لباراكا ن‑تودرت ءيدومن. سكارات غمكان باش ا‑ور‑دارون‑ييلي ما‑يتحصارن تيژولّا‑نّون ءي‑ربّي.

تارفوفنت ف‑سّيبت ن‑وفولكي

⁸ ءيمّا غيلاد راد‑اون‑ينيغ، ا‑كولّو‑تگم يان غ‑ما‑تسوينگيمّ ءولا ما‑س‑ا‑تسّحسّوم، ار‑تّحوبّوم ءي‑نگراتون س‑تايري ن‑ايتماتن، ار‑دي‑تّادرم ءي‑يخف‑نّون ار‑تّحنّوم ءي‑نگراتون.

⁹ ءيغ‑يلّا ماد‑اون‑يسكرن كرا يُخشنّ، اد‑اس‑ور‑ترارم س‑لخُشانت. ءيغ‑يلّا ما‑كُن‑يرگمن، اد‑اس‑ور‑ترارم س‑ترگّام، والاينّي ءينيات‑اس: «ا‑ك‑يبارك ربّي.» اشكو ءيغرا‑ياون‑د ربّي اد‑اون‑تيلي لباراكا.

¹⁰ ءيتيارا: «وانّا ءيران ا‑يزّري تودرت‑نس س‑لفرح ءيژر ءوسّان لّخير، ءيلّا فلّاس ا‑يكّيس ما‑يُخشنّ زغ‑يلس‑نس، ءيكّيس تيكركاس زغ‑يمي‑نس.

¹¹ ءيلّا فلّاس ا‑يفل كولّو كرا ءيگان لخُشانت ار‑يسكار افولكي، ار‑يسيگّيل س‑سّلامت ار‑گيس‑يتازّال.

¹² اشكو سيديتنّغ ار‑يتگابال غويلّي‑ف‑يرضا، ار‑يسفليد ءي‑ماد‑اس‑تّينين. ءيمّا غويلّي سكارنين ما‑يُخشنّ، ار‑تن‑يتضاضّا.»

¹³ مانوا را‑كُن‑يسّرفوفن ءيغ‑ترام ا‑تسكارم افولكي؟

¹⁴ والاينّي ءيغ‑يدّا ارد ترفوفنم ف‑سّيبت لّحقّ، هاتي ءيمباركين ا‑تگام. ا‑ور‑تّيكساضم يان ءولا‑دا‑تّاسيم تاغوفت،

¹⁵ والاينّي گات لماسيح د‑سيديس ن‑وول‑نّون، توجادم غ‑كرايگاتّ تاساعت ا‑دي‑ترارم اوال ءي‑كولّو وانّا‑كُن‑يسقسان ف‑رّجا لّي‑گيگون‑يلّان.

¹⁶ والاينّي ساولات ديدس س‑صّبر د‑لوقر ءولا س‑وول ءيغوسن زغ‑كولّو كرا ءيگان لعيب، باش اد‑تحشامن ءينوّاشن‑نّون ءيغ‑ا‑گيگون‑رگّمن ف‑وفولكي لّي‑تسكارم س‑يسم لّماسيح.

¹⁷ اشكو يوف‑اون ا‑ترفوفنم ءيغ‑يرا ربّي ف‑سّيبت ن‑وفولكي لّي‑تسكارم، ءولا ترفوفنم ف‑سّيبت ن‑كرا تسكرم يُخشن.

¹⁸ اشكو لماسيح، يات‑توال ا‑يمّوت ف‑سّيبت ن‑دّنوب، ءيمّت غوالّي ءيفولكين ف‑سّيبت ن‑ويلّي أُخشنّين، باش اد‑اغ‑د‑يرار ءي‑ربّي. نغان‑ت مدّن غ‑دّات‑نس، ءيسّدّر‑ت ربّي غ‑رّوح‑نس.

¹⁹ ءيدّو ءيلمّا ياوي لخبار ءي‑لارواح تياوكرّافنين،

²⁰ ا‑تن‑يگان د‑ويلّي رورنين تيغوردين‑نسن س‑ربّي غ‑ووسّان لّي‑غ‑ديدسن‑يصبر باهرا. غ‑ووسّان‑ان ا‑غ‑يسكر نوح اناو، نجمن گيس كرا ن‑مدّن دروسنين زغ‑وامان، تام مدّن اد‑گان.

²¹ مايلّي ءيجران غ‑ووسّان‑ان ءيرواس ءي‑ودوم غ‑وامان لّي‑س‑تنجمّ كونّي، ءورد س‑يريد ن‑يركان ن‑دّات‑نّون والاينّي ءيگا تاماتارت ن‑يس‑يوورّي ءيغوس‑وول‑نّون، تفكم ءيخف‑نّون ءي‑ربّي، تنجمّ ف‑سّيبت ن‑ما‑د‑ينكر ياسوع لماسيح زغ‑لموت.

²² نتّان ا‑يكشمن ءيلمّا س‑يگنّا، ءيسكيوس غيلاد ف‑وفاسي ن‑ربّي، ءيلين كولّو لمالايكا د‑سّولطات د‑لقوّات ن‑يگنوان غ‑دّو‑وفوس‑نس.