1 bṭrus 2 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

اژرو ءيدّرن

¹ ف‑ماياد ا‑ف‑راد‑اون‑ينيغ، لوحات‑ن س‑كولّو ما‑يگان تانوّاشت ءولا تيكركاس. ا‑ور‑تسكارم غ‑لگدّام ن‑مدّن ما‑ور‑تگيم. اد‑اون‑ور‑طيّر ف‑وييّاض طّافنين كرا ترام ءي‑يخف‑نّون، ءولا‑دا‑ترگّمّ غ‑يان.

² والاينّي گات زوند تاروا بحرا لولنين، تيريم ا‑تسوم اكُّفاي ن‑واوال ءيغوسن، باش ا‑سرس‑تيمغورم تنجمّ اجنجم ءيكمّلن.

³ اشكو «تمضيم افولكي ن‑سيديتنّغ.»

⁴ اكموراد‑د غيلاد س‑والّي ءيگان اژرو ءيدّرن. لوحن‑ت‑ين مدّن، والاينّي ءيژلي‑ت ربّي، ءيعزّو دارس.

⁵ فكات ءيخف‑نّون ءي‑لماسيح زوند ءيژران دّرنين، باش ا‑سرون‑يبنّو يات‑تگمّي ن‑رّوح، ا‑ن‑گيس‑تسراسم غ‑لگدّام ن‑ربّي تيوافكيو ن‑رّوح لّي‑س‑را‑يترضو اشكو ار‑اس‑تنتي‑تاكّام س‑يسم ن‑ياسوع لماسيح.

⁶ غمكلّي ءيتياران، ءينّا ربّي: «هاتي را‑ن‑زّوگزغ غ‑گر مدّن‑ينو يان‑وژرو ءيمقّورن ءيگان وين‑وغژو. ژليغ‑ت ءيعزّو داري. وانّا سرس يومنّ ءور‑سار‑تي‑تُگراژ.»

⁷ مايان ا‑ف‑دارون‑يعزّا كونّي لّي‑سرس‑يومنّ. والاينّي ءيتيارا‑داغ ف‑ويلّي ءور‑رينين اد‑امنّ، ءينّا ربّي فلّاسن: «اژرو لّي‑ن‑لوحن ءيبنّاين، نتّان ا‑يوورّين ءيگا ءيخف ن‑وغژو.»

⁸ ءيتيارا‑داغ: «اژرو‑اد را‑يگ تابايضّرت ءي‑مدّن، ءيگ ءيفير لّي‑را‑تن‑يسّكنوكي.» نتني ار‑طّارن غيلاد اشكو اگُين اد‑سكارن س‑واوال ن‑ربّي. غمكان ا‑تن‑د‑يقّانّ.

مدّن تياوژلاينين ن‑ربّي

⁹ ءيمّا كونّي، تگام مدّن تياوژلاينين، تگم ايت‑تگلديت ن‑ربّي، ار‑ن‑تسراسم غ‑لگدّام‑نس تيوافكيو لّي‑س‑ا‑يترضو. تگم ايت‑ربّي، ءيژلي‑كُن ا‑تگم وينس، باش ا‑تّاويم لخبار ءي‑مدّن ف‑كولّو ما‑يسكر غوالّي‑اون‑د‑يغران زغ‑تيلّاس س‑تيفاوت لّمجد‑نس.

¹⁰ غايد ءيزرين ءور‑تگيم يات، ءيمّا غيلاد ايت‑ربّي ا‑تگام. غايد ءيزرين ءور‑تسّينم رّحمت ن‑ربّي، ءيمّا غيلاد رّحمت‑نس ا‑فلّاون‑يلّان.

ءيخدّامن ن‑ربّي

¹¹ واي‑ايتما عزّانين، ضالبغ‑كُن غيلاد ا‑تگم ءيخف‑نّون د‑يغريبن د‑يبرّانيين غ‑دّونيت‑اد، تلوحم س‑ما‑تّيري دّات ن‑بنادم، اشكو تيغاوسيوين ن‑دّات ار‑تمّاغنت د‑وول ءيصفان.

¹² سكارات افولكي غ‑گر‑ويلّي ءور‑سّينّين ربّي. واخّا ءيغ‑ا‑گيگون‑رگّمن راد‑ژرن ءيس‑يفولكي كولّو ما‑تسكارم، ءينين ءيلمّا ءيزد ربّي اد‑دار لحقّ غ‑واسّ لّي‑غ‑را‑د‑ياشك ا‑يوت لحوكم.

¹³ سفليدات ف‑سّيبت ن‑سيديتنّغ س‑كرايگاتّ سّولطا ءيتحكامن غ‑دار مدّن. سفليدات س‑ومزوارو لّي‑يگان اگلّيد،

¹⁴ ءولا س‑ويلّي‑د‑يتازن اد‑وتن لعقوبيت ف‑ويلّي سكارنين ما‑يُخشنّ، الغن غويلّي سكارنين افولكي.

¹⁵ اشكو ربّي ءيرا گيگون ا‑بدّا‑تسكارم ما‑يفولكين، باش ا‑ور‑افن مدّن فسّوسنين سّيبت ما‑س‑ا‑گيگون‑ساوالن س‑تنوّاشت‑نسن ءيخوان.

¹⁶ زّريات ءوسّان‑نّون مكنّا ترام، والاينّي ا‑ور‑تّينيم د‑يخف‑نّون: «ها‑ياغ نژضار ا‑نسكر مكنّا نرا. نكرات ا‑نسكر ما‑يُخشنّ.» زّريات ءوسّان‑نّون غمكلّي‑د‑يقّانّ ءيخدّامن ن‑ربّي.

¹⁷ ءوقّرات كولّو مدّن، ار‑تّيريم ايتماتون غ‑لماسيح. تاويات‑ستّ باهرا غ‑ربّي، ار‑تّوقّارم اگلّيد.

ءيخدّامن د‑يد‑سيديتسن

¹⁸ وا‑يخدّامن، سفليدات س‑يد‑سيديتون ار‑تن‑بدّا‑تّوقّارم. ءورد غير غويلّي رخانين شوانين والاينّي سفليدات ءولا س‑ويلّي شقانين.

¹⁹ اشكو ربّي را‑يبارك يان ءيرفوفنّ ءيصبر ءي‑لباضل ف‑سّيبت ن‑ما‑س‑يرا ا‑يرضو ربّي.

²⁰ والاينّي ما‑لّفايتّ دارون ءيلّان ءيغ‑تسكرم ما‑يُخشنّ تصبرم ءي‑وكوراي لّي‑تشّام ف‑سّيبت لّخُشانت‑نّون؟ والاينّي ءيغ‑تسكرم افولكي ترفوفنم تصبرم، را‑كُن‑يبارك ربّي.

ارفوفن لّماسيح

²¹ ربّي ءيغرا‑ياون‑د ا‑تزّرايم ماياد، اشكو لماسيح ءيرفوفن ءولا نتّا ف‑سّيبت‑نّون، ءيمل‑اون ما‑يفولكين باش ا‑تضفورم لاترت‑نس.

²² ءيتيارا فلّاس: «ءور‑اكُّ‑يسكير كرا ن‑دّنب. ءور‑جّو‑كّينت‑تكركاس ءيمي‑نس.»

²³ لّيغ‑ت‑رگمن، ءور‑اسن‑د‑يرور س‑ترگّام. لّيغ‑ت‑سّرفوفنّ ءور‑تن‑يهدّيد، والاينّي ءيتعنّا س‑ربّي لّي‑يتحكامن س‑لحقّ.

²⁴ نتّان ا‑يوسين دّنوب‑نّغ غ‑دّات‑نس ف‑وگّجدي، باش ا‑نمّت ءي‑دّنوب ندّر ءي‑ما‑يرضان ربّي. س‑تيگّاس‑نس ا‑س‑تجّيم.

²⁵ غايد ءيزرين تجلام زوند ءولّي، ءيمّا غيلاد توورّيم‑د س‑دار‑ومكسا لّي‑يتگابالن ءولاون‑نّون.