1 bṭrus 1 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ زغ‑بطرُس ارقّاس ن‑ياسوع لماسيح، ءي‑يمژلاين ن‑ربّي لّي‑اكوتنين، گن ءيغريبن غ‑تميزار ن‑بونتوس ءولا گالاطيّا ءولا كابادوكيّا ءولا اسيّا ءولا بيتينيّا.

² ءيژلي‑كُن ربّي باباتنّغ س‑تحكيمت ن‑رّوح لقودوس غمكلّي ءيقصاد زغ‑يسيزوار، باش ا‑تسكارم س‑يواليون ن‑ياسوع لماسيح تغوسم س‑يدامّن‑نس. اد‑اون‑تيگات لباراكا د‑سّلامت.

رّجا ءيدّرن

³ ار‑باهرا‑نتالغ ربّي باباس ن‑سيديتنّغ ياسوع لماسيح، اشكو س‑رّحمت‑نس ءيگّوتن ا‑س‑اغ‑يفكا ا‑نلال تالاليت ن‑تودرت لّجديد. ءيعمّر‑اغ س‑رّجا ءيدّرن لّيغ‑د‑يسّنكر ياسوع لماسيح زغ‑لموت.

⁴ ءيفك‑اغ يا‑لّوورت لّي‑ور‑را‑يفنو ءولا را‑يخسر ءولا را‑يمدو، ءيحضا‑ياون‑ت غ‑يگنّا.

⁵ س‑تحكيمت‑نس ءيتجهّدن ا‑س‑ا‑كُن‑يسّنتال كونّي لّي‑سرس‑ومنّين، ارد تنجمّ س‑وجنجم ءيكمّلن لّي‑راد‑اون‑ييلي غ‑يسيگُّرا ن‑دّونيت.

⁶ فرحات س‑كولّو ماياد، واخّا ءيغ‑د‑يقّان اد‑اون‑طيّر يات‑تاساعت ف‑سّيبت ن‑تنوكموت ءولا تاسّاست لّي‑كُن‑يتارمن.

⁷ ءيزري فلّاون مايان باش ا‑تيسّانم ءيس‑يصحا ليمان‑نّون. اشكو ءيعزّا ليمان‑نّون باهرا، ءوگُّار ن‑وورغ لّي‑يفنّون واخّا‑دا‑يتصفو س‑لعافيت. اشكو غمكان ا‑س‑را‑كُن‑يالغ ربّي ءيسّاتّوي‑كُن ءيسّيمغور‑كُن غاكود لّيغ را‑د‑ياشك ياسوع لماسيح ءيبايّن.

⁸ نتّان، واخّا ءور‑جّو‑تي‑تژريم، ءيعزّا دارون باهرا. واخّا ءور‑ا‑تي‑تّمنادم غيلاد، تومنم سرس. ار‑سرس‑تّفراحم س‑لفرح ءيگّوتن ايلّيغ ءور‑اكُّ‑توفيم ءيواليون ماد‑اس‑تّينيم.

⁹ اشكو ربّي ءيفكا‑ياون غيلاد مايلّي ترام غ‑ليمان‑نّون، ءيفك‑اون اجنجم ن‑يخف‑نّون.

¹⁰ هاتي لانبيا لّي‑ساولنين غايد ءيزرين ف‑لباراكا لّي‑راد‑اون‑ييلي، ار‑سوينگيمن ار‑سقسان ف‑وجنجم‑اد.

¹¹ ار‑سقسان مان ازمز ا‑غ‑را‑ييلي ءولا مامنك ا‑را‑يگ‑وزمز لّي‑ف‑ا‑يتّيني رّوح لّماسيح لّي‑گيسن‑يلّان لّيغ ا‑ياسن‑يمالا ارفوفن لّي‑غ‑را‑يزري لماسيح ءولا لمجد لّي‑راد‑اس‑ييلي تيگيرا.

¹² والاينّي ءيسّبايّن‑اسن‑د ربّي ءيس‑ورد ف‑سّيبت ن‑يخف‑نسن ا‑ف‑ا‑ساوالن ف‑تغاوسيوين‑اد والاينّي ف‑سّيبت‑نّون. ءيمّا غيلاد تسفلدم ف‑كولّو ماياد ف‑يمي ن‑ويلّي‑اون‑ين‑يوينين لخبار ءيفولكين، ار‑دارون‑تبرّاحن س‑تحكيمت ن‑رّوح لقودوس لّي‑د‑يتيازانّ زغ‑يگنّا. ءيمّا تيغاوسيوين‑اد، ءولا لمالايكا ار‑باهرا‑تّيرين اد‑يسّانّ مامنك اد‑گانت.

ءوغوس ن‑وول

¹³ ف‑مايان ا‑ف‑راد‑اون‑ينيغ، بكيسات ءيخف‑نّون ترارم لعاقل، تزگام باهرا غ‑رّجا لّي‑س‑ا‑تّرجوم ف‑لباراكا لّي‑راد‑اون‑ييلي غاكود لّيغ را‑د‑ياشك ياسوع لماسيح ءيبايّن.

¹⁴ سكارات س‑واوال ن‑ربّي، غمكلّي سكارن تاروا س‑واوال ن‑ايت‑دارسن. ا‑ور‑سول‑تّلهوم س‑غايلّي ستّين تكّام ار‑تّيريم ءي‑يخف‑نّون لّيغ ءور‑تا‑تسّينم لحقّ.

¹⁵ والاينّي سكارات كولّو س‑وول ءيغوسن، غمكلّي ءيغوس ربّي لّي‑اون‑د‑يغران.

¹⁶ اشكو ءيتيارا ءينّا ربّي: «ءيلّا فلّاون ا‑تغوسم، اشكو گيغ نكّي واد ءيغوسن.»

¹⁷ تميارم كونّي ا‑تّينيم: «وا‑ربّي باباتنّغ،» والاينّي ا‑ور‑تتّوم ءيزد نتّان ا‑يتراران ءي‑كرايگاتّ يان ف‑ما‑يسكار، ءور‑ا‑يتمناد ءودماون. اويات‑ستّ گيس باهرا كولّو ءوسّان‑اد تزّرايم زوند ءيغريبن غ‑دّونيت.

¹⁸ اشكو تسّنم ءيس‑كُن‑د‑يفرا زغ‑تنباضين خوانين لّي‑اون‑د‑فلن ءيمزوورا‑نّون. اشكو ءورد س‑ما‑يفنّون زوند نّوقرت نغد ءورغ ا‑س‑كُن‑د‑يفرا،

¹⁹ والاينّي س‑يدامّن عزّانين لّماسيح زوند ءيدامّن ن‑يان‑ولقّاغ ءيغوسن بلا لعيب.

²⁰ ماياد، ءيقصاد‑ت سرس ربّي لّيغ ءور‑تا‑يخلق يات، يازن‑ت‑يد ءيلمّا ءيبايّن‑د ف‑سّيبت‑نّون غ‑ووسّان‑اد گُّرانين.

²¹ هاتي ف‑سّيبت لّماسيح ا‑س‑تومنم س‑ربّي لّي‑ت‑يد‑يسّنكرن زغ‑لموت ءيسّاتّوي‑ت س‑لمجد. د‑غمكاد ا‑س‑يزگا ليمان‑نّون د‑رّجا‑نّون غ‑ربّي.

²² هاتي تسّغوسم ءولاون‑نّون لّيغ تومژم اغاراس لّحقّ، ار‑تّحوبّوم ايتماتون س‑نّييت ءيصفان. ءيمّا غيلاد، تحنّوات ءي‑نگراتون زغ‑تّمي ن‑وول‑نّون.

²³ اشكو تلولم تالاليت ن‑تودرت لّجديد، ءورد س‑وامود لّي‑يفنّون والاينّي س‑وامود لّي‑ور‑را‑يفنو، ا‑ت‑يگان د‑واوال ن‑ربّي، ءيگ اوال ءيدّرن ءيقاما‑بدّا.

²⁴ اشكو ءيتيارا: «بنادم ءيگا زوند توگا، تگ لهيبت‑نس زوند اجدّيگ ن‑توگا. تسلّاو توگا ياسوس‑وجدّيگ،

²⁵ ءيمّا اوال ن‑سيديتنّغ ءيزگا‑بدّا.» اوال‑اد ءيگا لخبار ءيفولكين لّي‑مي‑تسفلدم.