zakaryah 8 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

lwrt idumn i‑willi‑d‑iqaman

¹ yašk‑iyi‑d‑daġ‑wawal n‑sidi rbbi n‑lmlayka yini:

² «ha ma‑inna siditun rbbi n‑lmlayka. riġ awrir n‑ṣiyun a‑ig winu, riġ‑t s‑tayri irġan.

³ ha ma‑inna walli bdda illan. ra‑n‑wrriġ s‑ṣiyun zdġġ ġ‑urušalim. ra‑ttinim ġakudan i‑urušalim ‹tamdint n‑laman›, tinim‑as ‹awrir n‑sidi rbbi n‑lmlayka› ula ‹awrir amẓlay›.

⁴ «ha ma‑inna siditun rbbi n‑lmlayka. rad‑daġ‑skiwisn ifqqirn d‑tfqqirin ġ‑tswak n‑urušalim, kud yan ra‑yasi aɛkkaz ġ‑ufus‑ns ašku yuwssr.

⁵ tiswak n‑tmdint rad‑ɛmmrnt s‑iḥšmiyn d‑tḥšmiyin ar‑kullu‑tlɛabn.

⁶ «ha ma‑inna siditun rbbi n‑lmlayka. ġ‑uwssan‑an iġ‑a‑ttinin ġwilli iqaman zġ‑mddn‑nun ‹ur‑iẓḍar a‑yili›, is‑rad‑iniġ nkki ‹ur‑ra‑yili›? siditun rbbi n‑lmlayka a‑t‑innan.

⁷ «ha ma‑inna siditun rbbi n‑lmlayka. rad‑jjnjmġ mddn‑inu zġ‑tsgiw n‑usġlay n‑tafukt ar tisgiw n‑umṭar‑ns,

⁸ awiġ‑tn‑d ad‑zdġn ġ‑tuẓẓunt n‑urušalim. rad‑gn ntni mddn‑inu, gġ rbbi‑nsn, ssafuġ‑asn tayri‑nu idumn ula afulki‑nu ikmmln.

⁹ «ha ma‑inna siditun rbbi n‑lmlayka. wa kunni‑ad isflidn i‑iwaliwn n‑lanbiya lli‑illan ġ‑gratun zġ‑wass lli‑ġ‑ittrs llsas n‑tgmmi tamẓlayt, ssdusat ifassn‑nun ar‑tbnnum tigmmi‑ad n‑siditun rbbi n‑lmlayka.

¹⁰ ġayd izrin ur‑tlli lfaytt ġ‑twuri n‑bnadm ula tin lbhaym, ula illa laman ġ‑inuwwašn‑nun i‑yan iffuġn ula yan ikšmn, ašku udjġ kud yan a‑itẓi d‑wayya.

¹¹ imma ġilad ur‑rad‑skrġ i‑willi iqaman ġ‑mddn‑nun ġmklli skrġ ġayd izrin. inna‑t siditun rbbi n‑lmlayka.

¹² ašku rad‑kkrzn ġ‑lhna, tfk ddilit aḍil‑ns, ifk‑wakal ṣṣabt‑ns, fkn‑d ignwan tiġli‑nsn. rad‑skrġ kullu mayan i‑willi‑d‑iqaman ġ‑mddn‑nun, baš ad‑asn‑ig lwrt idumn.

¹³ way‑ayt‑yahuda d‑ayt‑israyil, wah̬h̬a sttin ikka iga ism‑nun lɛar ar‑srs‑rggmn ayt‑tmizar n‑ddunit, ra‑kʷn‑jjnjmġ tgm‑asn lbaraka imqqurn. ad‑ur‑tiksaḍm. ssdusat ifassn‑nun.

¹⁴ «ašku ha ma‑inna siditun rbbi n‑lmlayka. ġakud lliġ a‑yyi‑stt‑ssṭiyarn imzwura‑nun, qṣadġ a‑kʷn‑utġ s‑tagat išqan, d‑nkki ur‑wrriġ ġ‑wawal‑inu. inna‑t siditun rbbi n‑lmlayka

¹⁵ imma ġilad qṣadġ ad‑daġ‑skrġ afulki ġ‑urušalim ula ġ‑ayt‑yahuda. ad‑ur‑tiksaḍm.

¹⁶ ha ma‑fllawn‑illan ġilad a‑ti‑tskarm. a‑ttinim lḥqq i‑ngratun, ar‑ttḥkamm ġ‑usays‑nun s‑tnbaḍin n‑lḥqq da‑izzgan sslamt.

¹⁷ a‑ur‑ttnuwwam ġ‑uwlawn‑nun ma‑yʷh̬šnn i‑ngratun, ula da‑ttrḍum s‑tuggʷa n‑tkrkas. ašku wan tiġawsiwin‑an, kurhiġ‑tnt. rbbi siditun a‑t‑innan.»

¹⁸ yašk‑iyi‑d‑daġ‑wawal n‑sidi rbbi n‑lmlayka yini:

¹⁹ «ha ma‑inna siditun rbbi n‑lmlayka. han ussan n‑uẓum ġ‑wayyur wis kkuẓ d‑wis smmus d‑wis ssa d‑wis mraw, rad‑wrrin gn ussan n‑lfrḥ dar ayt‑yahuda, ar‑gisn‑ttmunum ar‑tfjjijm i‑ngratun. walaynni nniġ‑awn, iryat lḥqq ula sslamt.

²⁰ «ha ma‑inna siditun rbbi n‑lmlayka. ġ‑mayd yakmurn rad‑d‑aškin ayt‑tmizar aggugnin d‑imzdġn n‑tmdinin ggutnin,

²¹ ar‑ttidun mddn‑an zġ‑tmdint‑nsn s‑ṭayyaḍ ar‑ttinin i‑ngratsn: ‹nkrat a‑nmuddu ġil ġil a‑nsiggl rbbi da‑illan, nḍalb sidi rbbi n‑lmlayka a‑fllanġ‑irḍu. ha‑yyi ġilad umẓġ aġaras.›

²² ġakudan a‑rad‑d‑aškin ayt‑tmizar ggutnin d‑iqbiln tjhhdnin s‑urušalim, ar‑kullu‑siggiln rbbi n‑lmlayka, ḍalbn zġ‑gigi a‑fllasn‑rḍuġ.

²³ «ha ma‑inna siditun rbbi n‑lmlayka. tizi‑an rad‑d‑aškin mraw irgazn zġ‑kraygatt aqbil ula kraygatt tamazirt, amẓn ġ‑tmlsit n‑gu‑yahuda nna‑illan inin‑as: ‹adj‑aġ a‑dik‑nmun, ašku nsfld is‑didun‑illa rbbi.› »