zakaryah 4 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ssa n‑lqnadl ula snat tizutna

¹ iwrri‑d lmalak lli‑stt‑in‑ikkan ar‑sri‑isawal, issfaq‑iyi‑d zund yan iduyyn ġ‑iṭs.

² yini‑yyi: «ma‑tẓrit?» iniġ‑as: «ẓriġ‑n yat lḥska tga kullu urġ, tili f‑iggi‑ns yat ṭṭbla, ttrsn fllas ssa n‑lqnadl, d‑kraygatt lqndil iṭṭaf ssa n‑tiftilin.

³ ẓrġ‑n ula snat tizutna ġ‑tama n‑ṭṭbla, yat f‑tfasiyt‑ns d‑yat f‑tẓlmaṭṭ‑ns.»

⁴ zaydġ sqsaġ lmalak lli‑didi‑isawln: «mad‑gan ġwid a‑sidi?»

⁵ ijawb‑iyi: «is‑ur‑tssint mad‑gan?» iniġ‑as: «uhu a‑sidi.»

⁶ yini‑yyi ġakudan: «ha ma‑inna sidi rbbi i‑zarubbabil. urd s‑lquwwa ula s‑jjhd walaynni s‑rruḥ‑inu. inna‑t sidi rbbi n‑lmlayka.

⁷ mad‑akkʷ‑tgit kiyi ay‑adrar imqqurn? ra‑tasstwat zund azaġar ġ‑umnid n‑zarubbabil.» issbayyn‑d ilmma aẓru lli‑igan ih̬f n‑uġʷẓu, alln mddn awal‑nsn ġakudan ar‑ttinin: «lbaraka d‑lfrḥ.»

⁸ yašk‑iyi‑d‑daġ‑wawal n‑sidi rbbi yini:

⁹ «ifassn n‑zarubbabil a‑n‑isrsn aẓru n‑llsas i‑tgmmi‑ad, d‑ifassn‑ns a‑ra‑stt‑ikmml. ġakudan a‑ra‑tissanm izd sidi rbbi n‑lmlayka a‑yyi‑d‑srun‑yuznn.

¹⁰ han wanna iḥgrn ass nna‑d‑yiwin ma‑idrusn, ra‑iẓr lmizan n‑ifili ġ‑ufus n‑zarubbabil, ifrḥ bahra. ssa n‑lqnadl‑ad gan ntni alln n‑sidi rbbi lli‑itkkan kullu ddunit.»

¹¹ sqsaġ‑t ġakudan: «mad‑gant snat tizutna lli‑illan ġ‑tama n‑lḥska f‑tfasiyt‑ns ula taẓlmaṭṭ‑ns?»

¹² zaydġ sqsaġ‑t: «mad‑gan sin iṣṭṭwan n‑tizutna lli‑zġ‑tfta zzit iwrġn ġ‑snat jjɛbat n‑uwrġ?»

¹³ ijawb‑iyi: «is‑ur‑tssint mad‑gan?» iniġ‑as: «uhu a‑sidi.»

¹⁴ yini‑yyi ġakudan: «sin‑ad gan ġwilli ityawẓġurn s‑zzit ad‑qasan sidis n‑ddunit kullutt [yahušaɛ d‑zarubbabil].»