zakaryah 3 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

kkisat‑as timlsa rkanin

¹ iml‑iyi‑d sidi rbbi yahušaɛ lli‑igan amsakmur ihiyyan. ẓriġ‑t‑in ibidd ġ‑lgddam n‑lmalak n‑sidi rbbi. ibidd‑n ula šiṭan ġ‑tsga‑ns tafasiyt a‑srs‑yaštkka.

² yamr sidi rbbi šiṭan yini: «fssa a‑šiṭan. issfssa‑k rbbi da‑bdda‑illan ig walli iẓlin urušalim. is‑ur‑igi ġwad yat‑trgit lli‑d‑ityawkkasn zġ‑lɛafiyt?»

³ d‑ha yahušaɛ sul ibidd ġ‑lgddam n‑lmalak, d‑ntta ilsa timlsa rkanin.

⁴ yini lmalak i‑willi biddnin ġ‑lgddam‑ns: «kkisat‑as timlsa rkanin.» yini ilmma i‑yahušaɛ: «hati kkisġ fllak ddnub‑nk. rad‑ak‑lsġ ġilad timlsa ṣfanin.»

⁵ sawlġ‑d nkki ġakudan iniġ: «ad‑as‑gn rrẓẓa iġusn f‑ih̬f.» gn‑as yat rrẓẓa iġusn, lsn‑as ula timlsa. ha lmalak n‑sidi rbbi, sul ibidd ġin.

rad‑ssittiġ ddnub zġ‑wakal‑ad

⁶ isawl‑d lmalak n‑sidi rbbi s‑yahušaɛ iqawl‑as yini:

⁷ «ha ma‑yk‑d‑inna sidi rbbi n‑lmlayka. iġ‑tmunt bdda d‑uġaras‑inu, ar‑tskart kullu ma‑f‑a‑k‑tuṣṣaġ, han ra‑ttḥkamt ġ‑tgmmi‑nu tamẓlayt ar‑ttlhut s‑twuri n‑isaragn‑ns, fkġ‑ak ula lḥqq a‑di‑tkšmt s‑gr willi dari biddnin ġid.

⁸ sfld a‑yahušaɛ amsakmur ihiyyan, kiyi ula imddukkʷal‑nk lli‑iskiwisn ġ‑umnid‑nk, gn ula ntni tamatart f‑ma‑ra‑ijru. hati ra‑n‑aznġ ah̬ddam‑inu da‑igan alḍay

⁹ ẓrat aẓru lli‑n‑srsġ ġ‑umnid n‑yahušaɛ, ilint gis ssa n‑tsgiw. rad‑nqšġ f‑uẓru‑an, ssittiġ ddnub zġ‑wakal‑ad ġ‑yan‑wass. siditun rbbi n‑lmlayka a‑t‑innan.

¹⁰ ġassan ra‑d‑iġr kraygatt yan giwn i‑wadjar‑ns a‑dids‑iskiws ġ‑ddu ddilit‑ns ula ġ‑ddu tazart‑ns. inna‑yawn‑t‑id siditun rbbi n‑lmlayka.»