yuwil 2 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

wrryat‑d s‑rbbi da‑bdda‑illan

¹¹ isawl sidi rbbi s‑wawal n‑uqqryan ġ‑umnid n‑tmurġi‑ns. ur‑iẓḍar yan a‑iḥasb ikabarn‑ns. hatni tjhhdn bahra ar‑kullu‑skarn s‑wawal‑ns. hay‑ass n‑sidi rbbi iga wad ihiyyan issiwidn. manwa a‑rad‑as‑yiẓḍar?

¹² yini sidi rbbi: «wrryat‑d sri ġilad zġ‑ttmi n‑uwlawn‑nun, s‑uẓum d‑umṭṭa d‑tndra.

¹³ bbyayt ulawn‑nun urd timlsa‑nun.» nkrayt twrrim‑d s‑rbbi da‑bdda‑illan ig rbbi‑nun. ašku iga wad iḥnnan ar‑itrḥam. ur‑a‑izrab a‑iġḍb, tigat dars tayri izgan. yujad a‑iṣamḥ i‑wanna‑f‑tlla tagat.

¹⁴ ma‑issnn ma‑ra‑yili? a‑ur‑imil iwrri‑d iḥnnu fllawn, ibark giwn ard a‑n‑tssakmurm tiwafkiw n‑imndi ula tin tissi i‑rbbi da‑bdda‑illan ig rbbi‑nun.

¹⁵ utat nnffar ġ‑uwrir n‑ṣiyun [urušalim], tbrrḥm s‑wass n‑uẓum d‑umun.

¹⁶ ssmunat‑d mddn ad‑ġusn i‑umnaggar. awyat‑d ifqqirn, tssmunm‑d iḥšmiyn d‑wazzann ssumumnin. tinim i‑usli a‑d‑iffuġ zġ‑uḥanu‑ns, tffuġ‑d‑tslit zġ‑untal‑ns.

¹⁷ ad‑nkrn imsakmurn lli‑ganin ih̬ddamn n‑sidi rbbi, f‑ad‑biddn ġ‑tgmmi n‑rbbi ġ‑gr‑uġgʷmmi d‑tisi n‑tġrṣi, ar‑kullu‑allan ar‑aqran: «wa sidi rbbi, ḥnnu ġ‑mddn‑nk. ad‑ur‑tadjt ayt‑tmizar ad‑ḍṣṣan ġ‑mayd igan wink, ula da‑srnġ‑kkatn awal. ad‑ur‑tadjt iqbiln n‑ddunit a‑ttinin ‹manza rbbi‑nsn?› »

¹⁸ ġakudan a‑d‑issbayyn sidi rbbi tayri i‑tmazirt‑ns, iḥnnu ġ‑mddn‑ns.

¹⁹ isawl‑d walli bdda illan, yini i‑willi ganin wins: «rad‑awn‑in‑aznġ irdn d‑waman n‑waḍil d‑zzit ard kullu tšbɛm. ur‑sul‑ra‑kʷn‑rarġ tgm lɛar dar iqbiln n‑ddunit.

²⁰ ra‑n‑fllawn‑ssaggugġ tamurġi n‑ššamal, ṭṭayġ‑tt s‑mani irufan ih̬wu. luḥġ‑n ikabarn‑ns imzwura ġ‑umda immutn, luḥġ‑n ikabarn‑ns imggura ġ‑umda umlil. ġmklli tssattuy ih̬f‑ns s‑uflla a‑ra‑tattuy tuȷ̈̇ȷ̈̇uṭ‑ns d‑waḍu‑ns yʷh̬šnn.

²¹ «ad‑ur‑tiksaḍt ay‑akal. nkr tfrḥt tfjjijt, ašku s‑ṣṣaḥt sidi rbbi iskr lɛjayb.

²² ad‑ur‑tiksaḍmt a‑tiwra n‑tagant, ašku zgzawn igʷdlan ġ‑lh̬la. ha taṣġart ar‑takka lġllt, ar‑bahra‑ttaru tazart ula ddilit n‑waḍil.

²³ «frḥayt ay‑ayt‑ṣiyun, tfjjijm s‑sidi rbbi lli‑igan rbbi‑nun. ašku irḍa fllawn s‑unẓar amzwaru, iffi fllawn inẓritn, amzwaru ula amggʷaru zund ġayd izrin.

²⁴ imikk rad‑gudin irdn ggutnin ġ‑inrarn, ɛmmrn ih̬aban s‑waman n‑waḍil d‑zzit.

²⁵ rad‑awn‑h̬lfġ isggʷasn lli‑awn‑tšša‑tmurġi, maylli tšša tad itaylaln ula tad itakʷin ula tad ithlakn ula tad itbbin, iga‑tt lɛskr‑inu iggutn lli‑n‑uznġ s‑wammas‑nun.

²⁶ «ra‑tšttam zġ‑ma‑iggutn tšbɛm, ar‑ttalġm ism n‑rbbi da‑bdda‑illan, ig rbbi‑nun lli‑awn‑iskrn lɛjayb. d‑ur‑sar‑sul‑illi ma‑iššḥššamn mddn‑inu.

²⁷ ra‑tissanm is‑lliġ ġ‑wammas n‑ayt‑israyil, tissanm izd nkkin a‑igan ‹walli bdda illan› gġ rbbi‑nun, d‑ur‑illi yan abla nkki. d‑ur‑sar‑sul‑illi ma‑iššḥššamn mddn‑inu.

ra‑n‑ffiġ rruḥ‑inu f‑kullu mddn

²⁸ «tigira n‑mayan ra‑n‑ffiġ rruḥ‑inu f‑kullu mddn. rad‑sawaln tarwa‑nun d‑istitun s‑iwaliwn lli‑rad‑asn‑malaġ. rad‑twargan ifqqirn‑nun s‑mad‑asn‑ssbayyanġ. rad‑tisfiwn iɛyyaln‑nun mad‑asn‑malaġ.

²⁹ hati ġ‑uwssan‑an ra‑n‑zzugzġ rruḥ‑inu ula f‑ih̬ddamn d‑th̬ddamin.

³⁰ rad‑skarġ lɛjayb ġ‑ignwan ula f‑wakal, ilin idammn d‑lɛafiyt d‑imdla n‑wawwu iggutn.

³¹ ra‑tllas tafukt, izggʷaġ‑wayyur zund idammn, iruḥ‑d‑ilmma‑wass ihiyyan issiwidn n‑rbbi da‑bdda‑illan.

³² kullu wanna izawgn ġ‑ism n‑walli bdda illan, hati ra‑injm. ašku ra‑yili kra injmn ġ‑uwrir n‑ṣiyun ula ġ‑urušalim, ġmklli‑s‑inna sidi rbbi. yili ġ‑gr willi iqaman ddrn, kra mi‑d‑iġra walli bdda illan.»