yunah 4 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

isawl‑d sidi rbbi s‑yunah

¹ imma yunah ṭiyr‑as f‑mayan, iwrri iqlaql bahra.

² iẓẓall i‑sidi rbbi yini: «wa sidi rbbi, is‑urd ġayan a‑s‑nniġ lliġ sul lliġ ġ‑tmazirt‑inu, ur‑ta‑ffuġ ad‑rwlġ s‑taršiš, ašku ssnġ is‑tgit rbbi iḥnnan ar‑ttrḥamt, ur‑a‑tzrabt a‑tġḍbt, tigat dark tayri izgan, ar‑di‑ttwrrit zġ‑tagat nna‑tqṣadt.

³ ġilad amẓ rruḥ‑inu a‑sidi rbbi, ašku yuf‑iyi ad‑mmtġ ula ddrġ.»

⁴ yini‑as‑d sidi rbbi: «is‑ifulki a‑tqlaqlt?»

⁵ iffuġ yunah zġ‑tmdint, iskiws ġ‑tsga lli‑iwalan asġlay n‑tafukt. iskr ġin yan‑untal, igawr ġ‑umalu‑ns a‑iẓr ma‑ra‑ijru i‑tmdint.

⁶ iskr sidi rbbi ġakudan yat‑tṣġart n‑tburzignt, issġli‑tt a‑di‑tk iggi i‑yunah tssmulu‑as, tssifsas f‑tmmara‑ns. ifrḥ yunah bahra s‑tburzignt‑an.

⁷ walaynni lliġ‑d‑ifaw‑wass, yazn‑d rbbi yat‑tbh̬h̬uyt ar‑tštta ġ‑tburzignt‑lli aylliġ tqqur.

⁸ lliġ‑d‑ilmma‑tġli tafukt, yazn‑d sidi rbbi yan‑uẓawaḍ igan ašrqi iḥman, tut tafukt ġ‑ih̬f n‑yunah aylliġ imlalliy, yiri a‑immt, yini: «yuf‑iyi ad‑mmtġ ula ddrġ.»

⁹ isawl‑d rbbi s‑yunah yini: «is‑ifulki a‑tqlaqlt f‑ssibt n‑tburzignt?» irar‑as: «ifulki, ašku ha‑yyi qlaqlġ ar lmut.»

¹⁰ yini‑as‑d sidi rbbi ġakudan: «ẓr kiyi, tqama‑gik‑tburzignt lli‑ur‑tqasat ula tssimġurt‑stt. han tmġi‑d ġ‑yan‑iyḍ, tmmt ġ‑wayya.

¹¹ mamnk a‑ur‑gigi‑tqama ninwah lli‑igan tamdint imqqurn, nttat lli‑ġ‑illa uggʷar n‑miyya d‑sin id‑mraw n‑walf (120 000) n‑mddn, ur‑ssinn afasi‑nsn zġ‑uẓlmaḍ‑nsn, ilint gis ula lbhaym ggutnin?»