yunah 3 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

idda yunah s‑ninwah

¹ yašk‑id‑daġ‑wawal n‑sidi rbbi s‑yunah yini‑as:

² «nkr tddut s‑tmdint‑an imqqurn lli‑igan ninwah, tɛlmt‑stt s‑wawal‑ad lli‑rad‑ak‑mlġ.»

³ inkr yunah iddu s‑ninwah ġmklli‑s‑as‑inna sidi rbbi. ninwah tga yat‑tmdint imqqurn ġ‑dar rbbi. wanna srs ikšmn, ra‑gis‑iqama kraḍ‑uwssan.

⁴ ikšm yunah s‑tmdint, izri gis yan‑wass, ibdu ar‑itɛlam ar‑ittini: «ġ‑wis kkuẓ id‑mraw (40) n‑wass ra‑th̬lu ninwah.»

⁵ nkrn ayt‑ninwah ġakudan, amnn awal n‑rbbi, brrḥn s‑uẓum, lsn kullu lh̬iš zġ‑umqqur ar amẓẓi.

⁶ lliġ ilkm‑wawal‑an agllid n‑ninwah, inkr zġ‑lɛrš‑ns, ikks timlsit n‑tgldit, ils ula ntta lh̬iš, igawr ġ‑iġd.

⁷ issufġ‑d yan lamr ar‑srs‑tbrraḥn ġ‑ninwah kullutt ar‑ttinin: «s‑lamr n‑ugllid d‑inmġurn‑ns, iqqan‑d kullu mddn ula lbhaym ad‑kksn amššu ula tissi, gn‑iyt ulli ula imugayn, ad‑ur‑šttan ula da‑ssan.

⁸ yili f‑mddn ula lbhaym ad‑lsn lh̬iš, ar‑ttalln awal‑nsn s‑jjhd ar‑aqran s‑rbbi. yili f‑kud yan a‑ifl lh̬ʷšant lli‑itsala ula taɛddiyt lli‑imyur.

⁹ a‑ur‑imil iwrri‑d rbbi f‑lġaḍab‑ns ijddrn iḥnnu ginġ a‑ur‑nhlk.»

¹⁰ lliġ iẓra rbbi maylli skrn ula mamnk ad‑fln lh̬ʷšanat‑nsn, iḥnnu gisn. ur‑fllasn‑izzugz tagat lli‑s‑asn‑inna.