yunah 1 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

irwl yunah zġ‑uwdm n‑sidi rbbi

¹ yuška‑d‑wawal n‑sidi rbbi s‑yunah yus n‑amittay yini‑as:

² «nkr tddut s‑ninwah, s‑tmdint‑an imqqurn, tɛlmt imzdġn‑ns, ašku lkmnt‑iyi‑d lh̬ʷšanat lli‑tsalan.»

³ inkr yunah ġakudan a‑irwl s‑taršiš zġ‑uwdm n‑sidi rbbi. ihuwwd s‑yafa s‑tama n‑umda, yaf‑n gis yan‑wanaw ra‑imuddu s‑taršiš. ifru atig‑ns, ikšm srs a‑didsn‑imun s‑taršiš baš a‑yaggug zġ‑uwdm n‑sidi rbbi.

⁴ yazn‑d sidi rbbi ġakudan yan‑waḍu itjhhdn bahra f‑umda, tnkr yat lfrtunt išqan bahra ġ‑umda aylliġ ira‑wanaw a‑irẓ.

⁵ iksaḍn ibaḥriyn bahra, kraygatt yan ar‑issġuyyu s‑rbbi‑ns. ar‑n‑tluḥn isittitn n‑wanaw ġ‑umda a‑fllas‑ssifsasn. imma yunah ntta, igguz yadlli s‑iyzdar n‑wanaw ign, yawi‑t‑in‑iyṭs iẓẓayn.

⁶ inkr rrays n‑wanaw iddu srs yini: «mah̬ aylliġ tgnt? nkr tġrt i‑rbbi‑nk a‑ur‑imil imnad ginġ a‑ur‑nhlk.»

ityawgar‑n yunah ġ‑umda

⁷ inin ilmma ibaḥriyn i‑ngratsn: «aškat‑d a‑d‑ngr aṣġar a‑nissan manwa igan ssibt n‑tagat‑ad.» grn‑d aṣġar, ttaġ‑d ġ‑yunah.

⁸ inin‑as ġakudan: «ml‑aġ manwa igan ssibt n‑tagat‑ad ġ‑nlla. ini‑aġ ma‑igan tawuri‑nk? mani‑di‑tkkit? gu‑mani a‑tgit? ma‑igan laṣl‑nk?»

⁹ yini‑asn: «gu‑ɛibr ad‑giġ. umnġ s‑rbbi da‑bdda‑illan, ig rbbi n‑ignna, ig walli iskrn imdwan d‑ikalln.»

¹⁰ lliġ sfldn i‑mayan, iksaḍn bahra. inin‑as: «ma‑iga ġayd tskrt?» ssnn ntni is‑d‑irwl zġ‑uwdm n‑rbbi da‑illan, ašku inna‑yasn‑t yad.

¹¹ iwrri‑umda iduyy s‑uggʷar, sqsan‑t ġakudan: «ma‑rad‑ak‑nskr a‑fllanġ‑ihddn‑umda?»

¹² yini‑asn‑d: «asyat‑iyi tluḥm‑iyi‑n ġ‑umda s‑ihddn. ašku ssnġ izd nkki a‑igan ssibba n‑lfrtunt‑ad išqan lli‑ġ‑tllam.»

¹³ agʷin irgazn, zaydn sul ar‑bahra‑kkatn s‑tʷgla ad‑wrrin s‑wakal. walaynni iduyy‑fllasn‑umda uggʷar n‑ġmklli iga, ur‑ẓḍarn ad‑wrrin.

¹⁴ gn ilmma taġuyit s‑sidi rbbi ar‑ttinin: «wa rbbi da‑bdda‑illan, ġir ad‑aġ‑ur‑thlkt f‑ssibt n‑tudrt n‑urgaz‑ad, ula trurt‑aġ atig f‑idammn ġusnin, ašku kiyi a‑iskrn ġaylli tqṣadt a‑rbbi da‑illan.»

¹⁵ asin ilmma yunah luḥn‑t‑in ġ‑umda, s‑ihddn‑umda, ur‑sul‑iduyy.

¹⁶ iksaḍn irgazn‑an bahra zġ‑rbbi da‑illan, ssakmurn‑as‑n tiġrṣi, ggalln‑as s‑nniyt‑nsn.

¹⁷ yazn‑d ilmma sidi rbbi yan‑uslm bahra imqqurn, iṣrṭ yunah. ik‑n yunah ġ‑waḥlig n‑uslm kraḍ‑uwssan d‑kraḍ‑waḍan.