yahušuɛ 9 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

lḥilt n‑ayt‑gibɛun

¹ izri ma‑izrin s‑fllas‑sfldn kullu igldan lli‑ḥkamnin ġ‑tsga‑yad n‑wasif n‑urdun, ġ‑tmizar n‑iwrar d‑igsarn ula kullu tamiw n‑umda imqqurn, ar awttu n‑lubnan, zġ‑gisn igldan n‑ayt‑ḥit d‑ayt‑amur d‑ayt‑kanɛan d‑ayt‑fariz d‑ayt‑ḥiwi d‑ayt‑yabus.

² munn‑d kullu ġakudan, mšaškan‑d f‑ad‑mmaġn d‑yahušuɛ d‑ayt‑israyil.

³ imma imzdġn n‑gibɛun, lliġ sfldn f‑ġaylli iskr yahušuɛ i‑tmdinin n‑ariḥa d‑ɛay,

⁴ skrn yat lḥilt zund iġ‑gan imazann zġ‑mani yaggugn. gn i‑iġʷyal‑nsn itlsan iqdimn, d‑wayddidn n‑waman n‑waḍil lli‑balanin stġn ttgnun.

⁵ lsn turẓiyin ttšanin d‑ibrdan bbinin. asin lɛwin gis aġrum iqqurn d‑ma‑iġmln.

⁶ aškin‑d s‑dar yahušuɛ ġ‑usras ġ‑gilgal, sawln‑as nttan d‑ayt‑israyil, inin‑as: «han tamazirt yaggugn a‑zġ‑d‑nuška. skrat didnġ ġilad yan lɛhd.»

⁷ rarn ayt‑israyil i‑ayt‑ḥiwi‑an: «walaynni ur‑nssin, yak ur‑tzdġm ġ‑tama‑nġ. mamnk a‑s‑rad‑didun‑nskr kra n‑lɛhd?»

⁸ inin ntni i‑yahušuɛ: «imqasan‑nk a‑nga.» isqsa‑tn yahušuɛ: «ayt‑mani a‑tgam? manizġ‑di‑tuškam?»

⁹ inin‑as: «tamazirt bahra yaggugn a‑zġ‑d‑nuška a‑sidi, ašku nsfld f‑ism n‑rbbi da‑illan ig rbbi‑nun, nsfld f‑kullu ma‑iskr ġ‑miṣr.

¹⁰ nsfld ula f‑ma‑iskr i‑sin igldan n‑ayt‑amur ġ‑tsga yaḍni n‑wasif n‑urdun, a‑tn‑igan d‑siḥun agllid n‑ḥašbun d‑ɛug agllid n‑bašan lli‑iḥkamn ġ‑ɛaštarut.

¹¹ han imġarn‑nġ d‑ayt‑tmazirt‑nġ kullutn uṣṣan‑aġ inin: ‹awyat didun lɛwin i‑uġaras, tddum a‑n‑didsn‑tmnaggarm tinim‑asn: nkkʷni imqasan‑nun a‑nga. skrat didnġ lɛhd.›

¹² ẓrat aġrum n‑lɛwin‑nġ, niwi‑t‑id zġ‑tgʷmma‑nġ sul irġa, ġass lliġ nffuġ a‑d‑nmuddu s‑darun. hati ġilad iqqur imruri.

¹³ hay‑ayddidn n‑waman n‑waḍil, ljdid ad‑gan ġ‑wass lli‑ġ‑tn‑nɛmmr. ẓrat‑tn ġila stġn. ha timlsa‑nġ ula turẓiyin‑nġ, balant kullu ġ‑uġaras ašku yaggug bahra.»

¹⁴ qllbn‑asn ayt‑israyil kra ġ‑lɛwin‑nsn, walaynni ur‑sqsan sidi rbbi.

¹⁵ iskr didsn yahušuɛ sslamt, ifk‑asn lɛhd a‑tn‑yadj ddrn, ggalln‑asn ula imġarn n‑tamunt.

¹⁶ zrin kraḍ‑uwssan tigira n‑mad‑didsn‑skrn lɛhd, s‑sfldn izd adjarn‑nsn ad‑gan, zdġn ġ‑tama‑nsn.

¹⁷ zaydn ayt‑israyil muddun kraḍ‑uwssan aylliġ lkmn timdinin‑nsn. gnt‑tmdinin‑nsn gibɛun d‑kafira d‑birut d‑qiryat‑yɛarim.

¹⁸ ur‑tn‑utn ayt‑israyil, ašku ggullan‑asn imġarn n‑tamunt s‑rbbi da‑illan ig rbbi n‑israyil, walaynni ar‑kullu‑tngmugn ayt‑israyil f‑imġarn.

¹⁹ sawln‑d kullu imġarn s‑tamunt‑nsn kullutt inin‑asn: «hati nggulla‑yasn s‑rbbi da‑illan ig rbbi n‑israyil. ġilad ur‑nẓḍar a‑n‑srsn‑ng afus.

²⁰ ġmkad a‑ra‑srsn‑nskr. ra‑tn‑nadj ddrn, a‑ur‑d‑fllanġ‑igguz h̬ziyt f‑ssibt n‑tgallit lli‑s‑asn‑nggulla.»

²¹ inin‑asn daġ imġarn: «adjat‑tn ddrn, gn darnġ willi‑d‑izddmn ar‑di‑taggʷmn i‑kullu tamunt.» skrn‑asn ġmklli‑s‑asn‑qawln imġarn.

²² imma yahušuɛ iġra‑yasn‑d s‑dars yini‑asn: «mah̬ aylliġ fllanġ tsskarksm tinim: ‹nkkʷni naggug‑n bahra fllawn›, d‑ha kunni tzdġm ġir ġ‑tama‑nġ?

²³ hati ġilad nnɛlt a‑fllawn‑illan, rad‑bdda‑tgm ismgan ar‑di‑tzddmm ikššuḍn ar‑di‑ttagʷmm aman i‑tzdġt n‑rbbi‑nu.»

²⁴ jawbn i‑yahušuɛ inin: «ašku nssn nkkʷnin imqasan‑nk izd s‑ṣṣaḥt rbbi da‑illan ig rbbi‑nun yuṣṣa ah̬ddam‑ns musa ad‑awn‑ifk akal‑ad kullut, ifnu kullu imzdġn‑ns ġ‑lgddam‑nun. nksuḍ bahra f‑tudrt‑nġ zġ‑giwn. mayan a‑f‑nskr ġmkan.

²⁵ ha‑yaġ ġilad ġ‑gr ifassn‑nk. aynna igan lḥqq d‑lmɛqul ġ‑iẓri‑nk, tskrt‑aġ‑t.»

²⁶ ġmkad ad‑asn‑iskr yahušuɛ, ifukku‑tn zġ‑ufus n‑ayt‑israyil, ur‑tn‑nġin.

²⁷ irar‑tn yahušuɛ ad‑gn ġwilli‑d‑izddmn ar‑di‑taggʷmn i‑tamunt n‑ayt‑israyil s‑dar tisi n‑tġrṣi n‑sidi rbbi ġ‑udġar‑ns amẓlay sul s‑ġassad.