yahušuɛ 8 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ayt‑israyil iwnn daġ s‑ɛay

¹ yini sidi rbbi i‑yahušuɛ: «ad‑ur‑ttiksaḍt ula da‑ttasit taġuft. nkr tawit dik kullu inmmaġn, tawnm s‑ɛay. ha‑yyi giġ agllid n‑ɛay d‑mddn‑ns d‑tmdint‑ns d‑wakal‑ns ġ‑ufus‑nk.

² ra‑tskrt i‑ɛay d‑ugllid‑ns ġmklli tskrt i‑ariḥa d‑ugllid‑ns. imma lh̬ir‑ns d‑lksibt‑ns, winun a‑rad‑gn, tawim‑tn teṭṭafm‑tn. zaydat trgsm ġ‑tġurdin n‑tmdint.»

³ inkr yahušuɛ d‑inmmaġn kullutn awnn s‑ɛay. isti yahušuɛ kraḍ id‑mraw n‑walf (30 000) ġ‑imdwas ḥaršnin yazn‑tn ġ‑iyḍ,

⁴ yuṣṣa‑tn yini: «zaydat trgsm ġ‑tġurdin n‑tmdint. ad‑ur‑bahra‑fllas‑taggugm. tzzgam ih̬f‑nun tujadm.

⁵ nkki d‑usmun‑inu, hati ra‑n‑nakmur s‑tmdint, ard‑d‑ffuġn ad‑d‑fllanġ‑akʷin zund tawala tamzwarut. ra‑nrwl ġakudan ġ‑umnid‑nsn.

⁶ ntni ra‑d‑ginġ‑ẓẓun ard‑n‑mattin zġ‑tmdint, ašku rad‑inin: ‹hatni rwln zund tawala tamzwarut.› ġmkan a‑ra‑zġ‑gisn‑nrwl.

⁷ tnkrm‑d kunni ġakudan zġ‑illiġ trgsm, tkšmm s‑tmdint tamẓm‑tt, ašku rbbi siditun iga‑tt ġ‑ifassn‑nun.

⁸ ġakud nna‑tumẓm tamdint, tssrġm gis lɛafiyt. skrat ġmklli‑s‑inna siditnġ, trarm lɛaql s‑mayd‑f‑kʷn‑uṣṣaġ.»

⁹ yazn‑tn yahušuɛ, ddun s‑illiġ rad‑rgsn, gawrn ġ‑gr bayt‑il d‑ɛay ġ‑tsga lli‑iwalan amṭar n‑tafukt. imma yahušuɛ insa ġ‑iḍ‑an ġ‑gr mddn‑ns.

¹⁰ ndid azkka inkr‑d yahušuɛ zikk ṣbaḥ, issmun‑d mddn‑ns, izwur‑asn ntta d‑imġarn n‑ayt‑israyil, awnn s‑ɛay.

¹¹ ḍfurn‑t inmmaġn lli‑dids‑illan, akmurn‑in s‑umnid n‑tmdint, srsn ġ‑tsga n‑ɛay lli‑iwalan asmmiḍ. tili yat talat tkka gratsn d‑ɛay.

¹² yazn ma‑itggan smmus id‑walf (5000) n‑urgaz ad‑rgsn ġ‑gr bayt‑il d‑ɛay ġ‑tsga n‑umṭar n‑tafukt.

¹³ lliġ bḍan mddn‑ns, yili‑yan‑ukabar ġ‑tsga n‑tmdint lli‑iwalan asmmiḍ, irgs wayya ġ‑tsga‑ns lli‑iwalan amṭar n‑tafukt. imma yahušuɛ insa ġ‑iḍ‑an ġ‑talat.

¹⁴ zikk ṣbaḥ, lliġ‑tn‑in‑iẓra‑ugllid n‑ɛay, iḥarru iffuġ‑d ntta d‑irgazn‑ns kullutn n‑ayt‑tmdint, skrn f‑imiġ d‑ayt‑israyil ġ‑uzaġar n‑wasif n‑urdun. ntta ur‑issin is‑illa ma‑irsgn ġ‑tġurdin n‑tmdint.

¹⁵ iskr yahušuɛ d‑usmun‑ns n‑ayt‑israyil zund iġ‑ksuḍn zġ‑ayt‑ɛay, rwln‑asn s‑lh̬la.

¹⁶ ar‑aqran ayt‑tmdint i‑ngratsn baš ad‑kullu‑ffuġn ẓẓun gisn. ffuġn‑d ġakudan kullutn ẓẓun ġ‑yahušuɛ, fln‑in tamdint‑nsn.

¹⁷ ur‑sul‑iqama ḥtta yan‑urgaz ġ‑tmdint n‑ɛay ula ġ‑bayt‑il. hatnin ffuġn‑d kullu ẓẓun ġ‑ayt‑israyil. fln‑in tamdint trẓm.

¹⁸ yini sidi rbbi i‑yahušuɛ: «mdi‑n aḥriš lli‑illan ġ‑ufus‑nk s‑ɛay, ašku afus‑nk a‑ġ‑ra‑stt‑gġ.» imdi‑n yahušuɛ aḥriš lli‑illan ġ‑ufus‑ns s‑tmdint.

¹⁹ ġmklli‑n‑imdi afus‑ns, nkrn willi rgsnin, azzln zġ‑illiġ llan, kšmn s‑tmdint amẓn‑tt. ḥarrun ssrġn gis lɛafiyt.

²⁰ grawln ayt‑ɛay tiġurdin ẓrn‑in awwu ġ‑tmdint iġli s‑ignwan. ur‑sul‑ẓḍarn ad‑rwln la s‑ġid ula ġin, ašku wrrin‑d fllasn ayt‑israyil lli‑irwln s‑lh̬la, gllbn‑d f‑willi gisn ẓẓanin.

²¹ lliġ iẓra yahušuɛ d‑ayt‑israyil is‑ttyamaẓ‑tmdint f‑ufus n‑willi rgsnin, ẓrn‑in awwu ġ‑tmdint iġli s‑uflla, gllbn‑d ar‑kkatn ġ‑irgazn n‑ɛay.

²² ffuġn‑d ilmma wiyyaḍ zġ‑tmdint. ilin ilmma ayt‑ɛay ġ‑wammas n‑ayt‑israyil zġ‑tsga‑yad ula h̬tan. ar‑gisn‑kkatn aylliġ ur‑sul‑iqama ma‑iddrn ula ma‑injmn.

²³ imma agllid n‑ɛay, umẓn‑t sul iddr, awin‑t‑id i‑yahušuɛ.

²⁴ lliġ nġan ayt‑israyil kullu irgazn n‑ɛay ġ‑lh̬la lli‑ġ‑gisn‑ẓẓan, fnun‑tn kullu s‑uwzzal imsidn, wrrin‑d ayt‑israyil s‑tmdint n‑ɛay, utn ma‑gis‑iqaman s‑uwzzal imsidn.

²⁵ willi mmutnin ġassan gan sin d‑mraw n‑walf (12 000) ġ‑irgazn wala timġarin, ašku ġunškan ad‑gan ayt‑ɛay.

²⁶ yahušuɛ ur‑d‑irur afus‑ns d‑uḥriš lli‑n‑imdi, aylliġ ifna kullu imzdġn n‑ɛay.

²⁷ imma lksibt d‑lh̬ir n‑tmdint, usin‑tn‑d ayt‑israyil ṭṭafn‑tn, ġmklli‑s‑inna sidi rbbi lliġ fllas yuṣṣa yahušuɛ.

²⁸ ġmkan a‑s‑ijdr yahušuɛ tamdint n‑ɛay, irar‑tt tga tawrirt n‑ih̬rubba, tqama ġmkan sul s‑ġassad.

²⁹ yagʷl agllid n‑ɛay ġ‑yat‑tṣġart ar tadggʷat. lliġ‑n‑tḍr tafukt, yuṣṣa yahušuɛ fllas. zzugzn‑d ddat‑ns zġ‑tṣġart, luḥn‑tt‑in ġ‑dar imi n‑tmdint, ssmunn‑d fllas yan‑ugudi imqqurn n‑iẓran, yili ġin sul s‑ġassad.

yahušuɛ ar‑yaqra f‑mddn‑ns

³⁰ ibnu yahušuɛ ġakudan yan‑ukrkur n‑tġrṣi ġ‑udrar n‑ɛibal i‑rbbi da‑bdda‑illan ig rbbi n‑ayt‑israyil,

³¹ ġmklli‑s‑inna musa ah̬ddam n‑sidi rbbi i‑ayt‑israyil. ibnu‑t ġmklli ityaran ġ‑warra n‑ulmmud n‑musa, s‑iẓran kmmlnin, ur‑jji‑tn‑yut‑uwzzal. zaydn ssattuyn fllas isakmurn jdrnin i‑sidi rbbi, ġrṣn i‑tġrṣiw n‑sslamt.

³² yara yahušuɛ ġ‑iẓran‑an almmud lli‑sttin ikka yura‑t musa, yara‑t ġin ġ‑iẓri n‑ayt‑israyil.

³³ biddn ayt‑israyil kullutn, gn‑iyt iġribn nġd ayt‑tqbilin, ntni d‑imġarn d‑ingabaln d‑lḥukkam‑nsn, ġ‑snat‑tamiw n‑ṣṣnduq n‑lɛhd n‑sidi rbbi ġ‑lgddam n‑imsakmurn n‑ayt‑lawi lli‑t‑itasin. ibidd mnaṣṣ gisn ġ‑tsga lli‑iwalan adrar n‑garizim, mnaṣṣ yaḍni ġ‑tsga lli‑iwalan adrar n‑ɛibal, baš ad‑dɛun s‑lbaraka i‑ayt‑israyil, ġmklli‑f‑yuṣṣa musa ah̬ddam n‑sidi rbbi ġ‑isizwur.

³⁴ izayd ilmma yahušuɛ ar‑yaqra kullu iwaliwn n‑ulmmud s‑lbarakat ula nnɛlat, ġmklli ityaran ġ‑warra n‑ulmmud.

³⁵ kullu maylli‑f‑yuṣṣa musa, iġra‑t‑id yahušuɛ f‑kullu tamunt n‑ayt‑israyil, ur‑n‑gis‑ifil ḥtta yan‑wawal. sfldnt‑as‑ula‑tmġarin ula iḥšmiyn ula iġribn lli‑izdġn ġ‑gratsn.