yahušuɛ 7 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tarula ġ‑umnid n‑ayt‑ɛay

¹ walaynni ɛṣan ayt‑israyil s‑ġaylli igan win lfna. ɛah̬an lli‑igan yus n‑karmi lli‑igan yus n‑zabdi lli‑igan yus n‑zaraḥ zġ‑tqbilt n‑yahuda, han yusi‑d kra zġ‑ġaylli ih̬za sidi rbbi. iwrri iznd lġaḍab n‑sidi rbbi f‑ayt‑israyil.

² yazn yahušuɛ kra n‑irgazn zġ‑ariḥa s‑tmdint n‑ɛay lli‑yakmurn s‑bayt‑awin, tlla ġ‑tama n‑bayt‑il ġ‑tsga n‑usġlay n‑tafukt. yini‑asn: «awnat taggʷm‑n s‑tmazirt‑an.» awnn ntni a‑n‑taggʷan tamdint n‑ɛay.

³ wrrin‑d ilmma s‑dar yahušuɛ inin‑as: «a‑ur‑tssawnt kullu mddn‑nġ s‑ɛay. qaddan sin id‑walf nġd kraḍ n‑urgaz ad‑awnn rẓn ayt‑ɛay. ad‑ur‑tssiḥlt kullu mddn‑ad s‑ġin, ašku drusn imzdġn‑ns.»

⁴ yawn ilmma ma‑itggan kraḍ id‑walf (3000) n‑urgaz zġ‑gr mddn‑an. imma ntni rwln‑d ġ‑umnid n‑ayt‑ɛay.

⁵ zaydn ayt‑ɛay nġn gisn ma‑itggan kraḍ id‑mraw d‑sḍis (36) n‑urgaz, ẓẓun‑d gisn zġ‑imi n‑tmdint ar šabarim, aylliġ lkmn agsar ar‑tn‑kkatn ġin. ha mayn ijran issfsi ul n‑mddn, ṭiyr‑asn bahra.

⁶ ibbi yahušuɛ malssa‑ns, iknu f‑uwdm‑ns ar akal ġ‑lgddam n‑ṣṣnduq n‑sidi rbbi ar tadggʷat, ntta ula imġarn n‑ayt‑israyil, zuzzrn agdrur f‑ih̬fawn‑nsn.

⁷ yini yahušuɛ: «aḥḥ a‑sidi rbbi, mah̬ aylliġ‑di‑tzzrit mddn‑ad zġ‑wasif n‑urdun? izd ġir f‑a‑yġ‑tluḥt ġ‑ufus n‑ayt‑amur ad‑aġ‑fnun? mra is‑nqnɛa s‑mad‑darnġ‑illan ġ‑tsga‑yan yaḍni n‑urdun nqama‑n gis.

⁸ wa sidi rbbi‑nu, ma‑rad‑iniġ ġila ġ‑rwln ayt‑israyil ġ‑umnid n‑inuwwašn‑nsn?

⁹ ha ra‑fllas‑sfldn ayt‑kanɛan d‑imzdġn n‑wakal‑ad kullutn, nkrn‑d ntni sutln‑aġ, sfiḍn ism‑nġ zġ‑ddunit. ula ism‑nk imqqurn, ma‑ra‑srs‑tskrt?»

ɛah̬an a‑iɛṣan rbbi

¹⁰ isawl‑d sidi rbbi yini i‑yahušuɛ: «nkr. mah̬ aylliġ tkʷnit f‑uwdm‑nk?

¹¹ han ayt‑israyil ɛṣan‑iyi, rẓn lɛhd lli‑f‑tn‑uṣṣaġ. usin‑d kra zġ‑ġaylli igan win lfna, akʷrn‑t sskarksn fllas, ḥḍun‑t ġ‑gr ifškan‑nsn.

¹² ġayan a‑f‑ur‑ẓḍarn ayt‑israyil ad‑biddn ġ‑umnid n‑inuwwašn‑nsn. rwln‑d zġ‑inuwwašn‑nsn ašku skrn ntni h̬ziyt. ur‑sul‑rad‑didun‑iliġ iġ‑ur‑tfnim ġaylli h̬ziġ zġ‑gratun.

¹³ nkr tssġust mddn, tinit‑asn: ‹ssġusat ih̬f‑nun i‑uzkka. ašku ha ma‑inna walli bdda illan ig rbbi n‑israyil. h̬ziyt a‑illan ġ‑wammas‑nun ay‑ayt‑israyil. ur‑ra‑tiẓḍarm a‑tbiddm ġ‑umnid n‑inuwwašn‑nun abla iġ‑tfnam h̬ziyt lli‑illan ġ‑gratun.›

¹⁴ ḥaḍrat‑d zikk ṣbaḥ s‑tqbilin‑nun. taqbilt nna‑ġ‑d‑yuška‑uṣġar n‑rbbi siditun, ra‑di‑tḥaḍr s‑tagʷmatin‑ns. tagʷmat nna‑ġ‑d‑yuška‑uṣġar, ra‑di‑tḥaḍr s‑takatin‑ns. ayt‑takat nna‑ġ‑d‑yuška, rad‑d‑ḥaḍrn yan s‑yan.

¹⁵ wanna‑ġ‑d‑yuška‑uṣġar, nttan a‑igan h̬ziyt. iqqan‑d a‑ijdr s‑lɛafiyt ntta ula kullu ma‑dars‑illan, ašku irẓa lɛhd‑inu, iskr lɛar i‑israyil.»

¹⁶ ndid azkka inkr‑d yahušuɛ zikk ṣbaḥ issḥaḍr‑d ayt‑israyil taqbilt s‑taqbilt, yašk‑id‑uṣġar ġ‑tqbilt n‑yahuda.

¹⁷ issḥaḍr‑d taqbilt n‑yahuda, yašk‑id‑uṣġar ġ‑tagʷmat n‑ayt‑zaraḥ. issḥaḍr‑d tagʷmat n‑ayt‑zaraḥ s‑takatin‑nsn, yašk‑id‑uṣġar ġ‑zabdi.

¹⁸ issḥaḍr‑d ayt‑takat‑ns yan s‑yan, yašk‑id‑uṣġar ġ‑ɛah̬an lli‑igan yus n‑karmi lli‑igan yus n‑zabdi lli‑igan yus n‑zaraḥ zġ‑tqbilt n‑yahuda.

¹⁹ isawl yahušuɛ s‑ɛah̬an yini‑as: «wa iwi, alġ lmajd n‑rbbi sidis n‑israyil, tqrrat ġilad tmlt‑iyi ma‑tskrt. ad‑ur‑flla‑tssntlt yat.»

²⁰ ijawb‑d ɛah̬an i‑yahušuɛ yini: «iṣḥa is‑ɛṣiġ rbbi sidis n‑israyil, skrġ ġmkad.

²¹ ẓriġ yan‑uslham ifulkin bahra ġ‑gr lh̬ir‑an, ig win babil, ẓrġ ma‑itggan sin id‑miyya (200) n‑uqarid n‑nnʷqrt, ẓrġ yan‑uṭṭib n‑uwrġ ra‑yuwzn kra n‑smmus id‑mraw (50) n‑nnʷqrt, iriġ‑tn asiġ‑tn. hati mḍlġ‑tn ġ‑ddu‑wakal ġ‑uh̬iyyam‑inu. nnʷqrt twala izdar.»

²² yazn yahušuɛ irqqasn, azzln s‑uh̬iyyam‑ns, afn‑in tiġawsiwin‑lli, tyawmḍalnt ġ‑uh̬iyyam, twala nnʷqrt izdar.

²³ awin‑tnt‑d zġ‑ugʷns n‑uh̬iyyam, sslkmn‑tnt‑d i‑yahušuɛ d‑ayt‑israyil kullutn, srsn tiġawsiwin‑an ġ‑lgddam n‑sidi rbbi.

²⁴ inkr yahušuɛ ula kullu ayt‑israyil, awin ɛah̬an yus n‑zaraḥ, nttan d‑nnʷqrt d‑uslham d‑uṭṭib n‑uwrġ, d‑tarwa‑ns d‑istis d‑imugayn‑ns d‑iġʷyal‑ns d‑uwlli‑ns d‑uh̬iyyam‑ns d‑kullu ma‑dars‑illan, ssawn‑tn s‑talat n‑ɛah̬ur.

²⁵ yini‑as yahušuɛ: «mah̬ a‑yġ‑d‑tiwit lhalak? sidi rbbi a‑ra‑k‑ihlk ġassad.» ar‑t‑kkatn kullu ayt‑israyil s‑iẓran. jdrn‑tn s‑lɛafiyt, ar‑tn‑kkatn s‑iẓran,

²⁶ ssmunn‑in agudi n‑iẓran f‑iggi‑ns, iqama ġin sul s‑ġassad. iwrri‑d sidi rbbi ġakudan zġ‑lġaḍab‑ns irġan. ġayan a‑f‑a‑ttinin i‑udġar‑an ‹talat n‑ɛah̬ur› sul s‑ġassad [tga lmɛna‑ns ‹lhalak›].