yahušuɛ 6 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

agadir idusn n‑tmdint n‑ariḥa

¹ tqqn‑tmdint n‑ariḥa, rgln‑tt‑id f‑ssibt n‑ayt‑israyil. ur‑iẓḍar yan a‑ikšm wala iffuġ.

² isawl‑d sidi rbbi s‑yahušuɛ yini‑as: «ha‑yyi giġ‑n ariḥa d‑ugllid‑ns d‑imdwas‑ns ḥaršnin ġ‑ufus‑nk.

³ a‑ttidum kunni n‑inmmaġn ar‑di‑ttlulliym i‑tmdint yat‑twal ġ‑wass, ard tkmmlm sḍis‑uwssan.

⁴ ar‑didun‑ttidun ula ssa n‑imsakmurn, zwurn i‑ṣṣnduq n‑lɛhd, kud yan s‑isk‑ns n‑izimmr. wis ssa n‑uwssan ra‑ttidum ar‑ttlulliym i‑tmdint ssa n‑twal, ṣuḍn ilmma imsakmurn ġ‑waskawn‑nsn.

⁵ ġakud nna‑utn ġ‑waskawn‑nsn s‑uṣwaḍ iġzzifn, iġ‑tsfldm i‑ijjij‑an n‑waskawn, ad‑alln mddn awal‑nsn utn s‑yat‑tġuyit itjhhdn, s‑iḍr‑ugadir n‑tmdint s‑wakal, awnn srs mddn, ikšm kud yan zġ‑umnid‑ns.»

⁶ iġr‑d yahušuɛ yus n‑nuwn ġakudan i‑imsakmurn yini‑asn: «asyat ṣṣnduq n‑lɛhd, tẓlim zġ‑giwn ssa, kud yan gisn a‑yasi isk n‑izimmr, ad‑zwurn i‑ṣṣnduq n‑lɛhd n‑sidi rbbi.»

⁷ yini ilmma i‑mddn: «zaydat ar‑ttidum ar‑ttlulliym i‑tmdint, tadjm willi bkisnin i‑imiġ ad‑zwurn i‑ṣṣnduq n‑lɛhd n‑sidi rbbi.»

⁸ ġmklli‑s‑tn‑yuṣṣa yahušuɛ ad‑skrn mddn kullutn. zaydn ssa n‑imsakmurn s‑ssa n‑waskawn n‑izimmr, ar‑ttidun ġ‑umnid n‑sidi rbbi, ar‑ṣwaḍn ġ‑waskawn, iggru‑asn ṣṣnduq n‑lɛhd n‑sidi rbbi.

⁹ ar‑ttidun willi bkisnin i‑imiġ, zwurn i‑imsakmurn lli‑iṣwaḍn ġ‑waskawn, ḍfurn‑tn wiyyaḍ ġ‑tġurdin n‑ṣṣnduq n‑lɛhd. ġmkan a‑iqama ijjij n‑waskawn.

¹⁰ imma yahušuɛ yuṣṣa mddn yini‑asn: «ad‑ur‑tġuwwtm, ula tnnam kra ityawsflidn, ula tudjm kra n‑wawal a‑d‑ik infurn‑nun ar ass lli‑ġ‑rad‑awn‑iniġ a‑trẓmm i‑yat‑tġuyit. ġakudan a‑ra‑tutm s‑tġuyit.»

¹¹ ġmkan a‑s‑ifta ṣṣnduq n‑lɛhd n‑sidi rbbi aylliġ‑d‑ilulliy i‑tmdint yat‑twal. wrrin‑d ilmma s‑usras, nsn gis.

¹² inkr‑d yahušuɛ zikk ṣbaḥ. asin daġ imsakmurn ṣṣnduq n‑lɛhd.

¹³ zaydn ssa n‑imsakmurn s‑waskawn n‑izimmr, ar‑ttidun ġ‑lgddam n‑ṣṣnduq n‑lɛhd n‑sidi rbbi, ar‑ṣwaḍn ġ‑waskawn. zwurn‑asn willi bkisnin i‑imiġ, ggrun‑asn wiyyaḍ ġ‑tġurdin n‑ṣṣnduq n‑lɛhd n‑sidi rbbi, iqama ijjij n‑waskawn.

¹⁴ ftun ġassan lli‑igan wis sin‑uwssan aylliġ‑d‑lulliyn i‑tmdint yat‑twal, wrrin‑d ilmma s‑usras. ġmkan ad‑skarn sḍis‑uwssan.

¹⁵ wis ssa n‑uwssan nkrn‑d zikk, bḥra‑d‑ifaw‑wass, ftun ġmklli bdda, walaynni lulliyn‑d i‑tmdint ssa n‑twal. ġassan waḥdut a‑d‑lulliyn i‑tmdint ssa n‑twal.

¹⁶ tis ssa n‑twal, lliġ‑n‑ṣuḍn imsakmurn ġ‑waskawn, yini yahušuɛ i‑mddn: «utat s‑tġuyit ġilad. ha sidi rbbi ifka‑yawn tamdint.

¹⁷ h̬ziyt a‑tga‑tmdint‑ad ġ‑iẓri n‑sidi rbbi, iqqan‑tt‑id lfna, nttat ula kullu ma‑gis‑illan. abla tamggant raḥab a‑ra‑iqama tddr, nttat d‑willi kullu dids illan ġ‑tgmmi‑ns, ašku tḥḍa inagan lli‑d‑nuzn.

¹⁸ walaynni rarat lɛaql a‑ur‑n‑takmurm s‑aynna igan h̬ziyt, a‑ur‑di‑tzzugzm lfna f‑ih̬fawn‑nun iġ‑tusim kra igan h̬ziyt, tzzugzm‑d lfna ula f‑usras n‑ayt‑israyil thlkm‑t.

¹⁹ imma nnʷqrt d‑uwrġ d‑irukutn n‑wanas d‑uwzzal, hatni ra‑tyawẓlayn i‑sidi rbbi kšmn s‑lh̬zin n‑sidi rbbi.»

²⁰ lliġ ṣuḍn ġakudan ġ‑waskawn, rẓmn mddn i‑tġuyit. hati ġir sfldn i‑uṣwaḍ‑an n‑waskawn, alln awal‑nsn utn s‑tġuyit itjhhdn, s‑iḍr‑ugadir n‑tmdint ġakudan s‑wakal. awnn mddn s‑tmdint, ikšm kud yan zġ‑umnid‑ns, amẓn tamdint.

²¹ fnun s‑uwzzal imsidn kullu ma‑illan ġ‑tmdint ġ‑irgazn ula timġarin, ma‑imqqurn ula ma‑imẓẓin, imugayn ula ulli ula iġʷyal.

tnjm raḥab zġ‑lfna n‑ariḥa

²² isawl yahušuɛ s‑sin irgazn lli‑n‑itaggʷn ma‑illan ġ‑tmazirt yini‑asn: «kšmat s‑tgmmi n‑tmggant, tssufġm‑d tamġart d‑mddn‑ns ġmklli‑f‑as‑tggullam.»

²³ kšmn ntni ssufġn‑d raḥab d‑babas d‑innas d‑aytmas d‑mddn‑ns, awin‑d ayt‑dars kullutn, srsn‑tn‑in ġ‑brra n‑usras n‑ayt‑israyil.

²⁴ jdrn ilmma s‑lɛafiyt tamdint ula kullu ma‑gis‑illan. abla nnʷqrt d‑uwrġ d‑irukutn n‑wanas d‑uwzzal, srsn‑tn‑in ġ‑lh̬zin n‑tzdġt n‑sidi rbbi.

²⁵ imma tamggant‑lli raḥab d‑ayt‑tgmmi n‑babas ula mddn‑ns kullutn, yudja‑tn yahušuɛ ad‑qaman ddrn. ha nttat tzdġ ġ‑wakal n‑ayt‑israyil sul s‑ġassad, ašku nttat a‑iḥḍan imazann lli‑yuzn yahušuɛ a‑n‑aggʷn ma‑illan ġ‑tmdint n‑ariḥa.

²⁶ idɛu yahušuɛ ġakudan yini: «a‑ih̬zu sidi rbbi wanna sul inkrn a‑ibnu tamdint‑ad n‑ariḥa. iġ‑iġza llsas‑ns, ad‑as‑immt ifh̬ddi‑ns. iġ‑as‑issbidd iflwan, ad‑as‑immt‑umẓẓi‑ns.»

²⁷ yahušuɛ, illa dids sidi rbbi, ityawssan ġ‑wakal‑an kullut.