yahušuɛ 5 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ẓẓullan i‑willi‑d‑iluln ġ‑lh̬la

¹ sfldn fllas kullu igldan n‑ayt‑amur lli‑llanin ġ‑tsga‑yad n‑wasif n‑urdun lli‑iwalan amṭar n‑tafukt, ula kullu igldan n‑ayt‑kanɛan ġ‑tama n‑umda imqqurn. lliġ ssnn is‑izzwa sidi rbbi aman n‑urdun ġ‑lgddam n‑ayt‑israyil aylliġ‑t‑bbin, tġašan‑uwlawn‑nsn, tqqaji rruḥ‑nsn f‑ssibt n‑ayt‑israyil.

² isawl sidi rbbi s‑yahušuɛ ġakudan yini‑as: «skr kra n‑tiẓẓa zġ‑uẓru imsidn, tẓallm i‑iwtman n‑ayt‑israyil zund tawala tamzwarut.»

³ ddun skrn tiẓẓa zġ‑uẓru imsidn, ẓẓalln i‑iwtman n‑ayt‑israyil ġ‑gibɛa‑haɛralut [tga lmɛna‑ns ‹awrir n‑ilmšan›].

⁴ mayad a‑f‑asn‑iẓẓulla yahušuɛ, ašku kullu iwtman lli‑d‑iffuġn zġ‑miṣr, lli‑iẓḍarn i‑imiġ, hati mmutn lliġ a‑tmuddun ġ‑lh̬la tigira n‑ma‑d‑ffuġn zġ‑miṣr.

⁵ s‑ṣṣaḥt willi‑d‑zġ‑gis‑iffuġn, zzrin yadlli taẓallit, walaynni willi darsn iluln ġ‑lh̬la ġakud lliġ‑d‑muddan zġ‑miṣr, ur‑tt‑zzrin.

⁶ ašku kkuẓ n‑id‑mraw (40) n‑usggʷas a‑tmuddun ayt‑israyil ġ‑lh̬la, aylliġ kullu mmutn willi‑d‑iffuġn zġ‑miṣr, lli‑iẓḍarn i‑imiġ, ašku ur‑rin ad‑sflidn s‑wawal n‑sidi rbbi. ġayan a‑f‑asn‑iggulla sidi rbbi ur‑ẓrran akal lli‑f‑iggulla i‑id‑babatsn ad‑aġ‑t‑ifk, ig akal lli‑ġ‑ingi‑ugʷfay d‑tammnt.

⁷ imma tarwa‑nsn lli‑mi‑d‑ifka taġamt‑nsn, iẓẓulla‑yasn yahušuɛ i‑ddat, ašku ur‑zzrin taẓallit ġ‑uġaras.

⁸ lliġ kmmln taẓallit n‑ddat i‑kullu mddn‑an, qaman ġ‑illiġ llan ġ‑usras aylliġ jjin.

⁹ isawl‑d sidi rbbi s‑yahušuɛ yini‑as: «ġassad ssḥnkuriġ zġ‑giwn lɛar n‑miṣr.» mayan a‑f‑a‑ttinin i‑udġar‑an ‹gilgal› sul s‑ġassad [tga lmɛna‑ns ‹aḥnkuri›].

¹⁰ lliġ‑n‑tḍr tafukt ġ‑wass wis kkuẓ d‑mraw (14) n‑wayyur‑an, sul gawrn ayt‑israyil ġ‑gilgal ad‑zzrin lɛid n‑usurf ġ‑uzaġar n‑ariḥa.

¹¹ ndid azkka n‑lɛid n‑usurf, ššn arh̬ṣiṣ d‑tzlfin zġ‑lġllt n‑wakal‑an.

¹² wis kraḍ‑uwssan‑an a‑ibbi‑umššu n‑‹man›, tigira n‑mad‑ššan zġ‑lġllt n‑wakal‑an. ur‑sul‑a‑d‑itgguz ‹man› i‑ayt‑israyil. hati ġasggʷas‑an ar‑šttan zġ‑ṣṣabt n‑wakal n‑kanɛan.

ariyas n‑ikabarn n‑rbbi

¹³ yili ilmma yahušuɛ ġ‑tama n‑ariḥa, yall alln‑ns a‑n‑imnad. ha yan‑urgaz ibidd ġ‑lgddam‑ns, tili tuzzalt ġ‑ufus‑ns. yakmur‑n srs yahušuɛ isqsa‑t: «izd nkkʷni a‑zġ‑tgit nġd inuwwašn‑nġ?»

¹⁴ irar‑as‑d: «uhu, nkki giġ ariyas n‑ikabarn n‑rbbi da‑illan. mayad a‑f‑d‑uškiġ.» iḍr yahušuɛ s‑wakal, iknu f‑uwdm‑ns. isqsa‑t: «ma‑ra‑tinit a‑sidi i‑uh̬ddam‑nk?»

¹⁵ isawl‑d‑uriyas n‑ikabarn n‑sidi rbbi yini‑as: «kkis turẓiyin zġ‑iḍarn‑nk, ašku ġid ġ‑tbiddt ityawẓlay i‑rbbi‑nk.» iskr yahušuɛ ġmkan.