yahušuɛ 4 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

usin iẓran zġ‑wasif

¹ lliġ bbin kullu mddn‑an asif n‑urdun, isawl‑d sidi rbbi s‑yahušuɛ yini‑as:

² «sti sin d‑mraw (12) n‑urgaz zġ‑gr mddn, kraygatt argaz zġ‑tqbilt,

³ tuṣṣat‑tn tinit‑asn: ‹asyat sin d‑mraw (12) n‑uẓru zġ‑ġid, zġ‑tuẓẓunt n‑wasif ġ‑illiġ biddn imsakmurn, tawim‑tn didun, tsrsm‑tn ġ‑udġar lli‑ġ‑ra‑tnsm ġ‑iḍ‑ad.› »

⁴ isti yahušuɛ sin d‑mraw n‑urgaz zġ‑gr ayt‑israyil, kraygatt argaz zġ‑tqbilt, iġr‑asn‑d s‑dars.

⁵ yini‑asn yahušuɛ: «zaydat s‑tuẓẓunt n‑wasif ġ‑illiġ illa ṣṣnduq n‑lɛhd n‑rbbi siditun, yasi‑d kraygatt yan giwn yan‑uẓru f‑tġʷraḍ‑ns s‑unšk lli‑gant‑tqbilin n‑ayt‑israyil.

⁶ rad‑awn‑ig mayad tamatart ġ‑wammas‑nun. ġilad s‑uflla iġ‑kʷn‑sqsan tarwa‑nun: ‹mad‑awn‑ɛnan iẓran‑ad?›

⁷ tinim‑asn: ‹bbin‑waman n‑urdun ġ‑umnid n‑ṣṣnduq n‑lɛhd n‑sidi rbbi. lliġ‑d‑izri zġ‑wasif n‑urdun, bbin‑in‑waman n‑urdun.› ġmkan a‑s‑rad‑gn iẓran‑ad akttay i‑ayt‑israyil kullu mayd iftan.»

⁸ skrn ayt‑israyil maylli‑f‑tn‑yuṣṣa yahušuɛ, asin‑d sin d‑mraw n‑uẓru zġ‑tuẓẓunt n‑wasif, s‑unšk lli‑gant‑tqbilin n‑ayt‑israyil, ġmklli‑s‑inna sidi rbbi i‑yahušuɛ. awin‑tn‑d s‑udġar lli‑ġ‑nsan.

⁹ ġin a‑ġ‑issbidd yahušuɛ sin d‑mraw n‑uẓru lli‑d‑usin zġ‑tuẓẓunt n‑wasif, zġ‑dar iḍarn n‑imsakmurn lli‑yusin ṣṣnduq. ilin iẓran‑an sul s‑ġassad.

¹⁰ ašku ġ‑tuẓẓunt n‑wasif a‑ġ‑biddn imsakmurn lli‑yusin ṣṣnduq, aylliġ yuwfa‑kullu‑wawal lli‑f‑yuṣṣa sidi rbbi yahušuɛ a‑t‑yini i‑mddn, s‑mklli nnit yuṣṣa musa yahušuɛ. ḥarrun mddn bbin kullu asif.

¹¹ lliġ kullu zġ‑gis zrin, izri‑d ula ṣṣnduq n‑lɛhd n‑sidi rbbi d‑imsakmurn, ar‑tn‑tmnadn mddn.

¹² ayt‑rawbin d‑ayt‑gad d‑mnaṣṣ‑an zġ‑tqbilt n‑manaššah bbin asif s‑ikabarn‑nsn. ntni a‑izwurn i‑kullu ayt‑israyil ġmklli‑s‑asn‑inna musa.

¹³ ibbi ma‑itggan kkuẓ id‑mraw n‑walf (40 000) s‑ikabarn‑nsn ġ‑umnid n‑sidi rbbi, bkisn i‑imiġ, s‑uzaġar n‑ariḥa.

¹⁴ ass‑an a‑ġ‑issmqqur sidi rbbi yahušuɛ ġ‑iẓri n‑kullu ayt‑israyil, gn fllas luqr kullu ussan n‑tudrt‑ns ġmklli‑t‑gan f‑musa.

¹⁵ isawl‑d sidi rbbi s‑yahušuɛ yini‑as:

¹⁶ «amr i‑imsakmurn lli‑yusin ṣṣnduq n‑lɛhd ad‑d‑awnn zġ‑wasif n‑urdun.»

¹⁷ yini yahušuɛ i‑imsakmurn: «awnat‑d zġ‑urdun.»

¹⁸ ġir iwnn imsakmurn lli‑yusin ṣṣnduq n‑lɛhd n‑sidi rbbi zġ‑tuẓẓunt n‑urdun, ġir srsn iwurzan‑nsn ġ‑iggi n‑taġart, s‑d‑wrrin‑waman n‑urdun s‑illiġ ttin kkan, ngin aylliġ zrin tamiw‑ns zund ġayd izrin.

¹⁹ wis mraw‑uwssan ġ‑wayyur izwurn ad‑d‑iwnn mddn zġ‑wasif n‑urdun. srsn ġ‑illi mi‑ttinin ‹gilgal›. takmur s‑ariḥa ġ‑tsga lli‑iwalan asġlay n‑tafukt.

²⁰ sin d‑mraw (12) n‑uẓru lli‑d‑usin zġ‑wasif n‑urdun, issbidd‑tn yahušuɛ ġ‑gilgal.

²¹ yini i‑ayt‑israyil: «tarwa‑nun zġ‑ġilad s‑uflla, ġakud nna‑sqsan id‑babatsn: ‹mad‑ɛnan iẓran‑ad?›

²² tmlm‑asn lmɛna tinim: ‹bbin ayt‑israyil asif n‑urdun f‑taġart,

²³ ašku rbbi siditun izzwa aman n‑urdun ġ‑lgddam‑nun aylliġ tbbim asif. iskr rbbi siditun ġmklli yadlli iskr i‑umda azggʷaġ, izzwa‑t ġ‑lgddam‑nġ aylliġ nzri.

²⁴ ġmkan a‑s‑rad‑issann kullu ayt‑tmizar n‑ddunit mnšk a‑itjhhd‑ufus n‑rbbi da‑bdda‑illan, d‑ġmkan a‑s‑ra‑tiksaḍm rbbi siditun kullu mayd iftan.› »