yahušuɛ 3 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ayt‑israyil bbin asif n‑urdun

¹ ndid azkka inkr yahušuɛ zikk ṣbaḥ, muddun ayt‑israyil kullutn zġ‑šiṭṭim, aylliġ lkmn tama n‑wasif n‑urdun. srsn ġin ur‑ta‑t‑bbin.

² tigira n‑kraḍ‑uwssan, nkrn iriyasn ar‑zrayn ġ‑gr mddn ġ‑usras

³ inin‑asn: «ġakud nna‑tẓram imsakmurn n‑ayt‑lawi usin ṣṣnduq n‑lɛhd n‑rbbi siditun, nkrat zġ‑illiġ tskiwsm tḍfurm‑t.

⁴ walaynni ffalat ma‑itggan alf n‑uẓmmuẓẓl ġ‑gratun dids, a‑ur‑n‑srs‑takmurm. ġmkan a‑s‑ra‑tissanm maniġ a‑ttidum, ašku ur‑jji‑tkkim aġaras‑ad.»

⁵ isawl yahušuɛ s‑mddn yini‑asn: «ssġusat ih̬fawn‑nun ašku azkka ra‑iskr sidi rbbi lɛjayb ġ‑wammas‑nun.»

⁶ yini ilmma yahušuɛ i‑imsakmurn: «asyat ṣṣnduq n‑lɛhd, tddum tbbim asif ġ‑umnid n‑mddn.» asin ṣṣnduq n‑lɛhd ġakudan, zwurn‑asn.

⁷ yini sidi rbbi i‑yahušuɛ: «zġ‑ġassad tasawnt ra‑k‑ssimġurġ ġ‑iẓri n‑kullu ayt‑israyil, f‑ad‑issann izd ġmklli lliġ nkki d‑musa a‑ra‑dik‑iliġ ula kiyi.

⁸ zayd tuṣṣat imsakmurn lli‑yusin ṣṣnduq n‑lɛhd tinit‑asn: ‹iġ‑tlkmm aman n‑wasif n‑urdun, tbiddm ġin ġ‑waman n‑urdun.› »

⁹ isawl yahušuɛ s‑ayt‑israyil yini‑asn: «aškat‑d s‑ġid tsfldm i‑iwaliwn n‑rbbi siditun.»

¹⁰ izayd yahušuɛ yini‑asn: «ġmkad a‑s‑ra‑tissanm is‑illa rbbi da‑iddrn ġ‑wammas‑nun, tamnm izd s‑ṣṣaḥt ra‑iṭṭay ġ‑lgddam‑nun ayt‑kanɛan d‑ayt‑ḥit d‑ayt‑ḥiwi d‑ayt‑fariz d‑ayt‑girgaš d‑ayt‑amur d‑ayt‑yabus.

¹¹ ẓrat ṣṣnduq n‑lɛhd n‑walli igan sidis n‑ddunit kullutt, ra‑izri ġ‑wasif n‑urdun ġ‑umnid‑nun.

¹² ġilad styat sin d‑mraw n‑urgaz zġ‑tqbilin n‑israyil, kraygatt argaz zġ‑tqbilt.

¹³ ha imsakmurn lli‑yusin ṣṣnduq n‑lɛhd n‑rbbi da‑illan ig sidis n‑ddunit kullutt, ġakud nna‑ttrsn iwurzan n‑iḍarn‑nsn ġ‑waman n‑urdun, ra‑n‑bbin‑waman lli‑d‑ikkan aflla, gudin kullu zund tawrirt.»

¹⁴ ssukfn mddn kullu ih̬iyyamn‑nsn ad‑bbin asif n‑urdun, zwurn‑asn imsakmurn, usin ṣṣnduq n‑lɛhd.

¹⁵ ġ‑uzmz‑an n‑tmgra ar‑bdda‑inggi‑wasif, ard zrin‑waman tamiw‑ns. lliġ‑t‑in‑lkmn imsakmurn lli‑yusin ṣṣnduq, ġir kšmn‑in iḍarn‑nsn aman n‑tama n‑wasif,

¹⁶ s‑bbin‑waman lli‑d‑ikkan aflla, gudin zund tawrirt ġ‑tuggugt ġ‑tama n‑tmdint n‑adam lli‑iwalan ṣartan. bbin‑in‑kullu‑waman lli‑huwwdnin ġ‑uzaġar n‑urdun s‑umda n‑tisnt. zaydn mddn bbin asif ġakudan ġ‑umnid n‑tmdint n‑ariḥa.

¹⁷ biddn sul imsakmurn lli‑yusin ṣṣnduq n‑lɛhd n‑sidi rbbi, qaman ġ‑wakal iqqurn ġ‑tuẓẓunt n‑wasif n‑urdun. zrin kullu ayt‑israyil ġ‑taġart, aylliġ ibbi‑kullu‑uqbil‑nsn asif n‑urdun.