yahušuɛ 24 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

styat manwa ra‑ttqasam

¹ issmun‑d yahušuɛ kullu tiqbilin n‑ayt‑israyil ġ‑tmdint n‑šakim, iġr‑d i‑imġarn d‑ih̬fawn d‑lḥukkam d‑iriyasn d‑ingabaln‑nsn, ḥaḍrn‑d ġ‑umnid n‑sidi rbbi.

² isawl yahušuɛ s‑mddn kullutn yini: «ha ma‑inna wad bdda illan ig rbbi n‑ayt‑israyil: ‹ġ‑zman zdġn id‑babatun taraḥ d‑tarwa‑ns ibrahim d‑naḥur ġ‑tsga yaggugn n‑wasif n‑furat, qasan id‑rbbi yaḍni.

³ awiġ‑d ilmma babatun ibrahim zġ‑tsga‑yan n‑wasif n‑furat, ssaykġ‑t akal n‑kanɛan kullut, ssigtġ‑as ilmma amud‑ns. fkġ‑as isḥaq,

⁴ fkġ i‑isḥaq yaɛqub d‑ɛisu. fkġ ilmma i‑ɛisu iwrar n‑saɛir a‑tn‑iṭṭaf. imma yaɛqub ntta d‑tarwa‑ns huwwdn s‑miṣr.

⁵ aznġ ilmma musa d‑harun, utġ miṣr s‑tagatin ggutnin lli‑skrġ ġ‑wammas‑ns. tigira n‑mayan ssufġġ‑kʷn‑d zġ‑gis.

⁶ « ‹lliġ‑d‑ssufġġ id‑babatun zġ‑miṣr, lkmn amda. han ayt‑miṣr ẓẓan ġ‑id‑babatun s‑lkrarṣ d‑imnayn ar amda‑yan azggʷaġ.

⁷ lliġ a‑aqran s‑rbbi siditsn, gġ tillas ġ‑gratun d‑ayt‑miṣr, sswrriġ‑d amda fllasn ntni, dln‑tn‑waman. tẓrm s‑walln‑nun mad‑skrġ ġ‑miṣr. tkm ilmma tugtt n‑uwssan ġ‑lh̬la.

⁸ awiġ‑kʷn‑d tigira s‑wakal n‑ayt‑amur lli‑izdġn ġ‑tsga yaḍni n‑wasif n‑urdun. akʷin‑in fllawn, gġ‑tn ġ‑ufus‑nun, fnuġ‑tn ġ‑lgddam‑nun, twrrim teṭṭafm akal‑nsn.

⁹ inkr ilmma balaq lli‑igan yus n‑ṣiffur agllid n‑muwab yakʷi f‑ayt‑israyil, yazn s‑balɛam yus n‑baɛur iġr‑as‑d a‑kʷn‑inɛl.

¹⁰ agʷiġ nkki ad‑sfldġ i‑balɛam, izayd nttan ar‑awn‑itdɛu s‑lbaraka, fukkuġ‑kʷn‑d zġ‑ufus‑ns.

¹¹ tbbim‑d ilmma asif n‑urdun taškim‑d s‑tmdint n‑ariḥa. mmaġn didun iriyasn n‑ariḥa, ntni d‑ayt‑amur d‑ayt‑fariz d‑ayt‑kanɛan d‑ayt‑ḥit d‑ayt‑girgaš d‑ayt‑ḥiwi d‑ayt‑yabus, gġ‑tn kullu ġ‑ifassn‑nun.

¹² uznġ id‑warẓẓan ġ‑lgddam‑nun a‑tn‑ṭṭayn ntni d‑sin igldan n‑ayt‑amur ġ‑lgddam‑nun, urd s‑uwzzal ula iẓḍkan‑nun.

¹³ fkġ‑awn ikalln lli‑f‑ur‑tutm tammara, fkġ‑awn timdinin lli‑ur‑tbnim. ha kunni sul‑gisnti‑tzdġm, ar‑tšttam lġllt n‑igran n‑waḍil d‑uwrtan n‑zzit lli‑ur‑tẓẓim.› »

¹⁴ [yini‑asn yahušuɛ:] «illa fllawn ġilad a‑ttuqqarm sidi rbbi ar‑bdda‑ti‑ttqasam s‑nniyt iṣḥan izgan. kkisat id‑rbbi lli‑qasan id‑babatun ġ‑tsga yaggugn n‑wasif n‑furat ula ġ‑miṣr. qasayat rbbi da‑bdda‑illan.

¹⁵ iġ‑awn‑iban yʷh̬šn a‑ttqasam rbbi da‑illan, styat i‑ih̬f‑nun ġassad manwa ra‑ttqasam, izd id‑rbbi lli‑qasan id‑babatun ġ‑tsga yaggugn n‑wasif, nġd id‑rbbi n‑ayt‑amur lli‑mi‑tɛmmrm akal‑nsn? imma nkki d‑ayt‑takkat‑inu, ra‑ntqasa rbbi da‑bdda‑illan.»

¹⁶ sawln‑d mddn ġakudan inin‑as: «uhu, ur‑sard nkkʷni a‑ra‑ifl rbbi da‑bdda‑illan baš a‑nddu ar‑ntqasa id‑rbbi yaḍni.

¹⁷ ašku rbbi siditnġ da‑illan, nttan ad‑aġ‑d‑issiwnn nkkʷni d‑id‑babatnġ zġ‑miṣr, zġ‑tmazirt n‑tsmugit, iskr timitar hiyyanin ġ‑iẓri‑nġ, igabl‑aġ bdda ġ‑uġaras lli‑d‑nkka ġ‑gr kullu iqbiln lli‑mi‑nzri zġ‑wammas‑nsn.

¹⁸ iṭṭay ġ‑lgddam‑nġ kullu iqbiln n‑ayt‑amur lli‑izdġn ġ‑wakal‑ad. f‑mayan a‑f‑aġ‑d‑iqqan ula nkkʷni a‑nqasa rbbi da‑bdda‑illan, ašku nttan a‑igan rbbi‑nġ.»

¹⁹ irar yahušuɛ ġakudan i‑mddn yini: «uhu, ur‑ra‑tiẓḍarm a‑ttqasam rbbi da‑illan, ašku iga wad ityawẓlayn zġ‑kullu ma‑yʷh̬šnn, išqu f‑ma‑igan wins. ur‑rad‑awn‑iṣamḥ iġ‑twrrim tɛṣam nġd tjlam.

²⁰ iġ‑tddam ard tflm rbbi da‑illan ar‑ttqasam id‑rbbi iġribn, han ra‑giwn‑igrawl irẓ‑kʷn ifnu‑kʷn tigira n‑ma‑giwn‑iskr afulki.»

²¹ inin mddn i‑yahušuɛ: «uhu, ra‑nqasa rbbi da‑illan.»

²² yini ilmma yahušuɛ i‑mddn: «hati tgam inagan f‑ih̬fawn‑nun is‑tstim rbbi da‑bdda‑illan a‑ti‑tqasam.» inin‑as: «ha‑yaġ nga inagan.»

²³ yini‑asn: «nkrat ġilad tkkism id‑rbbi iġribn lli‑tskrm ġ‑darun, trarm ulawn‑nun s‑dar rbbi da‑illan ig rbbi n‑israyil.»

²⁴ inin mddn i‑yahušuɛ: «rbbi siditnġ da‑bdda‑illan, nttan ra‑nqasa, awal‑ns a‑s‑ra‑nskar.»

²⁵ ġassan a‑iskr yahušuɛ lɛhd d‑mddn ġ‑šakim, izzga‑yasn tinbaḍin d‑lḥkamat.

²⁶ yara yahušuɛ iwaliwn‑an ġ‑warra n‑ulmmud n‑rbbi. yasi‑d yan ifir imqqurn, issbidd‑t ġ‑ddu‑uṣġar n‑igg lli‑illan ġ‑tama n‑tzdġt n‑sidi rbbi.

²⁷ yini yahušuɛ i‑mddn kullutn: «ifir‑ad, hati iga fllanġ inigi, ašku isfld i‑kullu iwaliwn lli‑s‑aġ‑d‑inna rbbi da‑bdda‑illan. iġ‑twrrim tġḍrm ġ‑gratun d‑rbbi‑nun, rad‑fllawn‑ig inigi.»

²⁸ isafḍ ilmma yahušuɛ mddn kullutn, kraygatt yan s‑wakal lli‑t‑id‑yuškan ġ‑lwrt.

lmut n‑yahušuɛ

²⁹ lliġ izri mayan, immt yahušuɛ yus n‑nuwn ah̬ddam n‑sidi rbbi. illa dars miyya d‑mraw (110) n‑usggʷas.

³⁰ mḍln‑t‑in ġ‑wakal n‑lwrt‑ns ġ‑timnat‑saraḥ lli‑illan ġ‑iwrar n‑afraym ġ‑tsga n‑udrar n‑gaɛaš lli‑iwalan asmmiḍ.

³¹ ayt‑israyil ar‑tqasan sidi rbbi kullu ussan n‑yahušuɛ, ula kullu ussan n‑imġarn lli‑iqaman ddrn ġ‑tgira n‑yahušuɛ, gn willi issnn kullu maylli iskr sidi rbbi f‑ssibt n‑ayt‑israyil.

³² imma ih̬ṣan n‑yusf lli‑d‑ssiwnn ayt‑israyil zġ‑miṣr, mḍln‑tn‑in ġ‑šakim, ġ‑igr lli‑isġa yaɛqub zġ‑ayt‑ḥamur babas n‑šakim s‑miyya n‑uqarid. illa igr‑an ġ‑lwrt n‑ayt‑yusf.

³³ immt ula aliɛazr lli‑igan yus n‑harun, mḍln‑t‑in ġ‑tmdint n‑gibɛa lli‑d‑yuškan i‑yus finḥas, tlla ġ‑iwrar n‑afraym.