yahušuɛ 23 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

yahušuɛ yuṣṣa imġarn n‑israyil

¹ kigan a‑izrin tigira n‑ma‑isshnna sidi rbbi ayt‑israyil zġ‑kullu inuwwašn lli‑asn‑isutln, yuwssr yahušuɛ, izzri isggʷasn ggutnin bahra.

² iġr‑d yahušuɛ i‑kullu ayt‑israyil s‑dars, isawl s‑imġarn d‑ih̬fawn d‑lḥukkam d‑ingabaln, yini‑asn: «ha‑yyi ġilad uwssrġ mqqurġ ġ‑isggʷasn.

³ kunni tẓram kullu ma‑iskr rbbi siditun f‑ssibt‑nun i‑kullu iqbiln‑an. ašku rbbi siditun ad‑fllawn‑immaġn.

⁴ ẓrat, bḍiġ‑awn s‑uṣġar timizar n‑iqbiln lli‑iqaman ddrn, ġmklli‑awn‑bḍiġ tilli yadlli nriġ, f‑ad‑kullu‑gn lwrt i‑tqbilin‑nun, zġ‑wasif n‑urdun ar amda imqqurn ġ‑tsga n‑umṭar n‑tafukt.

⁵ rbbi siditun ra‑tn‑iṭṭay ġ‑lgddam‑nun, issitti‑tn‑in zġ‑iẓri‑nun. ra‑teṭṭafm akal‑nsn ġmklli‑s‑awn‑iqawl rbbi siditun.

⁶ gat‑n tiqqi‑nun bahra, tawim‑tt ġ‑kullu ma‑ityaran ġ‑warra n‑ulmmud n‑musa, ar‑bdda‑srs‑tskarm. a‑ur‑as‑tanfm la s‑ufasi ula s‑uẓlmaḍ.

⁷ ad‑ur‑ttmunum d‑iqbiln lli‑iqaman ġ‑gratun, ula da‑taddrm ismawn n‑id‑rbbi‑nsn, ula da‑srsn‑ttgallam ula da‑tn‑ttqasam, ula da‑tknnum ġ‑lgddam‑nsn.

⁸ amẓat ġ‑rbbi siditun ġmklli tskarm sul s‑ġassad.

⁹ ašku sidi rbbi a‑iṭṭayn iqbiln mqqurnin tjhhdnin ġ‑lgddam‑nun. kunni sul s‑ġassad, ur‑illi yan iẓḍarn a‑ibidd ġ‑lgddam‑nun.

¹⁰ kud yan giwn iẓḍar a‑iṭṭay alf, ašku rbbi siditun a‑fllawn‑itmmaġn ġmklli‑s‑awn‑iqawl.

¹¹ «rarat lɛaql ad‑bdda‑ttirim rbbi siditun.

¹² ašku iġ‑twrrim tzdim ih̬fawn‑nun d‑iqbiln lli‑iqaman ddrn ġ‑tamiw‑nun, iġ‑tzuydm ar‑zġ‑darsn‑ttahalm ar‑n‑darsn‑ttmunum ar‑d‑darun‑tmunun,

¹³ issanat s‑lmɛqul, rbbi siditun ur‑sul‑ra‑iṭṭay iqbiln‑an ġ‑lgddam‑nun. rad‑awn‑gn taẓqqurt ula ššbkt, gn azfl i‑tʷġraḍ‑nun d‑isnnann i‑walln‑nun, ard‑kʷn‑ifnu rbbi siditun zġ‑wakal‑ad ifulkin lli‑awn‑ifka.

¹⁴ «ha nkki ġilad, imikk rad‑kmmlġ aġaras‑inu zund kullu ma‑n‑ikkan ddunit‑ad. kunni tssnm kullukʷn ġ‑ih̬f‑nun d‑uwl‑nun, is‑ur‑iḍir ḥtta yan zġ‑iwaliwn fulkinin lli‑s‑iqawl sidi rbbi f‑ssibt‑nun. hatni kullu uwfan darun, ur‑iḍir ḥtta yan gisn.

¹⁵ walaynni ġmklli‑s‑awn‑uwfan kullu iwaliwn fulkinin lli‑s‑iqawl rbbi siditun ġayd izrin f‑ssibt‑nun, ġmkan a‑s‑rad‑awn‑issafu ula kullu iwaliwn‑ns šqanin, ard‑kʷn‑ifnu rbbi siditun zġ‑wakal‑ad ifulkin lli‑awn‑ifka.

¹⁶ iġ‑twrrim trẓam lɛhd n‑rbbi siditun lli‑f‑kʷn‑yuṣṣa, tddum tqasam id‑rbbi yaḍni ar‑asn‑tknnum, ra‑fllawn‑iznd lġaḍab‑ns ġakudan, laḥ‑kʷn ġ‑yat tasaɛt zġ‑wakal‑ad ifulkin lli‑awn ifka.»