yahušuɛ 2 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tumn raḥab ullt‑ariḥa

¹ yazn yahušuɛ yus n‑nuwn sin irgazn zġ‑šiṭṭim s‑tntla ad‑sslakan akal‑an. yuṣṣa‑tn: «ddwat taggʷm‑n tẓrm ma‑illan ġ‑tmazirt‑an, bahra tamdint n‑ariḥa.» ddun ntni aylliġ lkmn tigmmi n‑yat‑tmggant ism‑ns raḥab, gguzn ġ‑dars.

² isfld‑ugllid n‑ariḥa i‑wawal: «han kra n‑irgazn n‑ayt‑israyil uškan‑d d‑iyḍ, ad‑d‑aggʷn ẓrn ma‑illan ġ‑tmazirt‑nġ.»

³ yazn‑d‑ugllid n‑ariḥa s‑raḥab yini‑as: «ssufġ‑aġ‑d irgazn‑an darm ikšmn s‑tgmmi, ašku uškan‑d ad‑d‑aggʷn ẓrn kullu ma‑illan ġ‑tmazirt.»

⁴ walaynni tḥḍa‑tn‑tmġart‑an, trar awal i‑mddn‑an: «s‑ṣṣaḥt uškan‑d dari kra n‑irgazn, nkki ur‑ssinġ ayt‑mani ad‑gan.

⁵ lliġ ḍrnt tillas, ffuġn ntni ur‑ta‑iqqin imi n‑tmdint. ur‑ssinġ mani kkan. ġilad azzlat, ra‑fllasn‑tlkmm ġ‑uġaras.»

⁶ imma nttat tssġli‑tn s‑ukʷfaf, tḥḍu‑tn ġ‑gr ifškan n‑lkttan lli‑yadlli‑gis‑tssnmala.

⁷ ddun imazann n‑ugllid ar‑srsn‑siggiln ġ‑uġaras lli‑itawin s‑isukkay n‑wasif n‑urdun. ġir ffuġn imazann‑an s‑iqqn imi n‑tmdint.

⁸ imma sin irgazn‑an, ur‑ta‑ginn tġli darsn raḥab s‑ukʷfaf,

⁹ tini‑asn: «ssnġ rbbi da‑bdda‑illan ifka‑yawn akal‑ad, ašku umẓnt‑aġ‑tksaḍ‑nun, tġašan kullu imzdġn n‑tmazirt f‑ssibt‑nun.

¹⁰ ašku nsfld f‑rbbi da‑illan mamnk a‑izzwa aman n‑umda azggʷaġ ġ‑umnid‑nun ġakud lliġ‑di‑tffuġm zġ‑miṣr, nsfld f‑maylli tskrm i‑sin igldan n‑ayt‑amur, tfnum siḥun ula ɛug ġ‑tsga yaḍni n‑urdun.

¹¹ ġir nsfld fllas s‑tġašan‑uwlawn‑nġ, tqqaji rruḥ n‑kraygatt yan ginġ f‑ssibt‑nun, ašku rbbi da‑illan ig rbbi‑nun, nttan a‑igan rbbi n‑ignwan ġ‑uflla, ig rbbi n‑wakal ġ‑iyzdar.

¹² ġir ggallat‑iyi ġilad s‑rbbi da‑bdda‑illan, abla iġ‑tskrm afulki ġ‑ayt‑dar baba ġmklli giwn skrġ afulki, tfkm‑iyi tamatart n‑laman

¹³ n‑is‑ra‑tadjm baba d‑inna d‑aytma d‑istma ġ‑tudrt, tadjm‑asn mddn‑nsn, tjjnjmm‑aġ zġ‑lmut.»

¹⁴ inin‑as irgazn: «ḍḍmant n‑tudrt‑nġ a‑illan f‑tinun ar lmut. iġ‑ur‑tnnim i‑yan f‑tġawsa‑yad‑nġ, ha nkkʷni ġakud nna‑yaġ‑ifka sidi rbbi akal‑ad, rad‑am‑nssafu lḥnant d‑laman.»

¹⁵ tzzugz‑tn‑in ilmma s‑izikr zġ‑yan‑warryaḥ, ašku tigmmi‑ns tlla ġ‑ugadir n‑tmdint.

¹⁶ tini‑asn: «ddwat s‑iwrar, a‑ur‑diwn‑mnaggarn willi‑kʷn‑siggilnin. trgsm ġin kraḍ‑uwssan, ard‑d‑wrrin ntni, tamẓm ilmma aġaras‑nun.»

¹⁷ inin‑as irgazn: «tagallit lli‑s‑aġ‑tssgullit, ur‑ra‑stt‑nttu,

¹⁸ walaynni tizi nna‑d‑nkšm s‑tmazirt‑ad, krs ifili‑ad izggʷaġn ġ‑warryaḥ lli‑zġ‑aġ‑tzzugzt, tssmunt‑d babam d‑innam d‑aytmam d‑kullu ayt‑dar babam ġ‑tgmmi.

¹⁹ han wanna‑d‑iffuġn d‑imi n‑tgmmi‑nm s‑brra, idammn‑ns f‑ih̬f‑ns, nkkʷni ur‑fllanġ‑illi yat. walaynni kra dim illan ġ‑tgmmi, nkkʷni a‑f‑llan idammn‑ns, iġ‑n‑srs‑iga kra n‑yan afus.

²⁰ imma kmmi, iġ‑tnnit taġawsa‑yad‑nġ i‑wiyya, han ur‑sul‑fllanġ‑illi maylli‑f‑aġ‑tssgullit.»

²¹ tini‑asn: «wah̬h̬a, ġmklli‑s‑tnnam a‑ra‑yili.» tazn‑tn ġakudan ddun, tkrs ifili izggʷaġn ġ‑warryaḥ.

²² ddun awnn s‑iwrar, gawrn gisn kraḍ‑uwssan. willi‑tn‑siggilnin kkan srsn aġaras kullut ur‑tn‑ufin, wrrin ilmma s‑tmdint.

²³ zaydn sin irgazn ġakudan, huwwdn zġ‑iwrar bbin asif, wrrin‑d s‑dar yahušuɛ yus n‑nuwn, ɛawdn‑as f‑kullu ma‑ijran.

²⁴ inin i‑yahušuɛ: «s‑ṣṣaḥt sidi rbbi iga akal‑an ġ‑gr ifassn‑nġ. han imzdġn‑ns kullutn tġašan f‑ssibt‑nġ.»