yahušuɛ 14 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

snat d‑mrawt n‑tqbilt d‑lwrt‑nsnt

¹ ġmkad a‑ityawbḍa‑wakal n‑kanɛan baš a‑teṭṭaf kraygatt taqbilt lwrt‑ns. ibḍu‑asnt‑t‑umsakmur aliɛazr d‑yahušuɛ yus n‑nuwn d‑ih̬fawn n‑tagʷmatin n‑tqbilin n‑ayt‑israyil.

² grn‑d aṣġar f‑ṭẓa n‑tqbilin‑an d‑mnaṣṣ n‑tqbilt, ġmklli‑f‑yuṣṣa sidi rbbi f‑imi n‑musa.

³ ašku snat‑tqbilin d‑mnaṣṣ yaḍni, ifka‑yasnt yad musa akal ġ‑tsga yaḍni n‑wasif n‑urdun a‑ig lwrt‑nsnt. walaynni ur‑ifki kra n‑lwrt ġ‑gratsn i‑ayt‑lawi.

⁴ wrrin ayt‑yusf gan snat‑tqbilin n‑manaššah d‑afraym. imma ayt‑lawi ur‑asn‑ifki taġamt ġ‑wakal abla kra n‑tmdinin ma‑ġ‑a‑zddġn, ula igʷdlan‑nsnt ma‑ġ‑a‑kssan ulli d‑imugayn‑nsn.

⁵ bḍun ayt‑israyil akal ġakudan, ġmklli‑f‑yuṣṣa sidi rbbi musa.

zzɛmt n‑umġar kalab

⁶ lliġ llan ġ‑gilgal, aškin‑d kra zġ‑ayt‑yahuda s‑dar yahušuɛ, isawl‑d kalab yus n‑yafunna lli‑igan zġ‑ayt‑qaniz yini‑as: «hati tssnt ma‑inna sidi rbbi i‑uh̬ddam‑ns musa fllanġ nkki dik ġ‑qadaš‑barniɛ.

⁷ tizi‑an llan dari kkuẓ id‑mraw (40) n‑usggʷas, lliġ‑iyi‑yuzn musa ah̬ddam n‑sidi rbbi zġ‑qadaš‑barniɛ a‑n‑aggʷġ ẓrġ ma‑illan ġ‑wakal. wrriġ‑d ilmma iniġ‑as fllas kullu ma‑illan ġ‑uwl‑inu.

⁸ han aytma lli‑didi‑yiwnn, ntni ssġašan ulawn n‑mddn, imma nkki ḍfurġ sidi rbbi da‑igan rbbi‑nu zġ‑ttmi n‑nniyt‑inu.

⁹ iggall‑iyi musa ġassan yini‑yyi: ‹s‑ṣṣaḥt akal lli‑f‑n‑tsrst aḍar‑nk a‑ra‑ig lwrt‑nk, kiyi d‑tarwa‑nk kullu mayd iftan, ašku zġ‑ttmi n‑nniyt‑nk a‑s‑tḍfurt sidi rbbi‑nu.›

¹⁰ hati ġilad yudja‑yyi sidi rbbi ġ‑tudrt ġmklli‑s‑iqawl, kkuẓ id‑mraw d‑smmus (45) n‑usggʷas ayad, zġ‑ġassan ġ‑inna sidi rbbi awal‑an i‑musa, lliġ a‑sul‑tlulliyn ayt‑israyil ġ‑lh̬la. ha‑yyi ġilad rglġ tam id‑mraw d‑smmus (85) n‑usggʷas.

¹¹ nkki sul dusġ ġassad zund ass lli‑ġ‑iyi‑yuzn musa. tjhhdġ ġilad ġmklli tjhhdġ ġ‑tizi‑an. ujadġ i‑imiġ ar‑tffuġġ ar‑kššmġ.

¹² ġilad fk‑iyi iwrar‑ad lli‑s‑iyi‑iqawl sidi rbbi ġassan. ašku tsfldt tizi‑an f‑mamnk a‑gisn‑zdġn ayt‑ɛanaq [lli‑igan iġzuyfa tjhhdnin] ġ‑tmdinin mqqurnin mi sutln igudar dusnin. iġ‑didi‑illa sidi rbbi, ra‑tn‑ṭṭayġ zġ‑ġin ġmklli‑s‑iqawl.»

¹³ idɛu‑as yahušuɛ ġakudan s‑lbaraka, ifk ḥabrun i‑kalab yus n‑yafunna a‑ig lwrt‑ns.

¹⁴ ġmkan a‑s‑twrri ḥabrun tg lwrt n‑kalab yus n‑yafunna zġ‑ayt‑qaniz, iṭṭaf‑tt sul s‑ġassad, ašku iḍfur zġ‑ttmi n‑nniyt‑ns rbbi da‑illan ig rbbi n‑ayt‑israyil.