yahušuɛ 13 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

timizar lli‑sul‑iqaman

¹ lliġ yuwssr yahušuɛ, izzri isggʷasn ggutnin, yini‑as‑d sidi rbbi: «hati ġilad tuwssrt tmqqurt ġ‑isggʷasn, illa‑sul‑wakal iggutn ma‑tteṭṭafm.

² ikalln‑ad sul‑awn‑qaman. timizar n‑ayt‑filisṭin ula tin ayt‑gašur kullutnt,

³ ašku kkant‑sttin gant tin ayt‑kanɛan, zġ‑uwttu n‑miṣr ġ‑wasif n‑šiḥur, ar awttu n‑ɛaqrun ġ‑tsgiw lli‑iwalan asmmiḍ. hati ġilad ar‑gisnti‑tḥkamn smmus iriyasn n‑ayt‑filisṭin ġ‑tmdinin n‑ġazza d‑ašdud d‑ašqalun d‑gatt d‑ɛaqrun. iqama‑ula‑wakal n‑ayt‑ɛawwi ġ‑tsgiw lli‑iwalan tirġi.

⁴ iqama‑kullu‑wakal n‑ayt‑kanɛan zġ‑mɛara n‑ayt‑ṣidun ar afaq ġ‑uwttu n‑ayt‑amur.

⁵ iqama‑ula‑wakal n‑ayt‑gabal, d‑idrarn n‑lubnan kullutn ar tisgiw n‑usġlay n‑tafukt, zġ‑baɛl‑gad ġ‑tama n‑udrar n‑ḥarmun ar tizi n‑ḥamat.

⁶ qaman ula kullu iwrar zġ‑lubnan ar misrafut‑mayim, hati ɛmmrn‑tn ayt‑ṣidun. ra‑tn‑ṭṭayġ kullutn ġ‑lgddam n‑ayt‑israyil. «imma ġilad, gr‑d aṣġar f‑tmizar‑an, baš a‑tnt‑wrtn ayt‑israyil ġmklli‑f‑k‑uṣṣaġ.

⁷ bḍu akal kullut f‑ṭẓa n‑tqbilin, ula mnaṣṣ lli‑d‑iqaman zġ‑tqbilt n‑manaššah, f‑a‑gis‑amẓnt lwrt‑nsnt.»

⁸ imma taqbilt n‑rawbin d‑tin gad d‑mnaṣṣ yaḍni zġ‑manaššah umẓnt yadlli lwrt‑nsnt. ifka‑yasnt‑t musa ah̬ddam n‑sidi rbbi ġ‑tsga yaḍni n‑wasif n‑urdun lli‑iwalan asġlay n‑tafukt.