yahušuɛ 11 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tinri f‑tmizar n‑ššamal

¹ lliġ isfld yabin agllid n‑ḥaṣur f‑kullu mayan, yazn s‑yubab agllid n‑madun ula s‑ugllid n‑šimrun ula win akšaf.

² yazn ula s‑igldan lli‑llanin ġ‑iwrar ġ‑tsgiw lli‑iwalan asmmiḍ, yazn s‑willi llanin ġ‑uzaġar n‑jalil ġ‑tsgiw lli‑iwalan tirġi. yazn s‑willi iḥkamn ġ‑igsarn ula ġ‑tamiw n‑dur ġ‑tsgiw n‑umṭar n‑tafukt.

³ yazn s‑ayt‑kanɛan lli‑llanin ġ‑snat‑tsgiw n‑wasif n‑urdun, a‑tn‑igan d‑ayt‑amur d‑ayt‑ḥit d‑ayt‑fariz d‑ayt‑yabus ġ‑tmizar n‑iwrar. yazn ula s‑ayt‑ḥiwi ġ‑tama n‑udrar n‑ḥarmun ġ‑tmazirt n‑miṣfah.

⁴ ffuġn‑d ġakudan kullutn s‑ikabarn‑nsn. igatn bahra zund amlal n‑tama n‑umda, skrn kigan d‑iysan d‑lkrarṣ.

⁵ munn‑d kullu igldan‑an d‑ikabarn‑nsn, srsn ġ‑tama n‑uġbalu n‑mayrum, skrn f‑ad‑kullu‑mmaġn d‑ayt‑israyil.

⁶ yini sidi rbbi i‑yahušuɛ: «a‑ur‑zġ‑gisn‑tiksaḍt ašku azkka wan tasaɛt‑ad ra‑n‑rarġ kullu mddn‑an mmutn ġ‑lgddam n‑ayt‑israyil. tddum ilmma tbbim lɛṣbt i‑ifaddn n‑iysan‑nsn, tjdrm ula lkrarṣ‑nsn s‑lɛafiyt.»

⁷ iddu yahušuɛ d‑inmmaġn‑ns kullutn, ffuġn srsn ġ‑tama n‑uġbalu n‑mayrum akʷin‑in fllasn.

⁸ ig‑tn sidi rbbi ġ‑ufus n‑ayt‑israyil, utn‑tn ẓẓun gisn ar tamdint imqqurn n‑ṣidun ula misrafut‑mayim. zaydn ar talat n‑miṣfah ġ‑tsga n‑usġlay n‑tafukt, utn‑tn aylliġ ur‑sul‑gisn‑iqama kra n‑yan iddr.

⁹ iskr‑asn yahušuɛ ġmklli‑s‑as‑inna sidi rbbi, ibbi lɛṣbt i‑ifaddn n‑iysan‑nsn, ijdr lkrarṣ‑nsn s‑lɛafiyt.

¹⁰ igrawl‑d yahušuɛ ġakudan yamẓ tamdint n‑ḥaṣur, inġ agllid‑ns s‑uwzzal. ġ‑uwssan‑an tagldit n‑ḥaṣur a‑itjhhdn f‑kullu tiglday‑an yaḍni.

¹¹ yut kullu imzdġn‑ns s‑uwzzal ifnu‑tn, aylliġ ur‑sul‑gis‑iqama ma‑ġ‑illa‑unfus, ijdr tamdint n‑ḥaṣur s‑lɛafiyt.

¹² yamẓ yahušuɛ timdinin‑an kullutnt d‑igldan‑nsnt, yut‑tnt s‑uwzzal imsidn ifnu‑tnt, ġmklli‑t‑yuṣṣa musa ah̬ddam n‑sidi rbbi.

¹³ walaynni timdinin attuynin, ur‑tnt‑jdirn ayt‑israyil, abla ḥaṣur waḥdutt a‑ijdr yahušuɛ.

¹⁴ asin ayt‑israyil kullu lh̬ir n‑tmdinin‑an d‑lbhaym‑nsnt, imma imzdġn‑nsnt, nġan‑tn kullu s‑uwzzal fnun‑tn, ur‑gisnt‑filn ma‑ġ‑illa‑unfus.

¹⁵ ġmklli yuṣṣa sidi rbbi ah̬ddam‑ns musa, ġmkan a‑f‑yuṣṣa musa yahušuɛ, d‑ġmkan a‑iskr yahušuɛ. iskr kullu ma‑f‑yuṣṣa sidi rbbi musa, ur‑n‑gis‑ifil yat.

¹⁶ ġmkan a‑s‑yumẓ yahušuɛ akal‑an kullut. ilint‑gis‑tmizar n‑iwrar d‑lh̬la n‑nagab kullut, d‑wakal n‑gušan kullut, d‑igsarn ġ‑tsgiw n‑umda imqqurn d‑uzaġar n‑wasif n‑urdun. ilin gis kullu iwrar n‑israyil d‑izaġarn‑ns,

¹⁷ zġ‑udrar n‑ḥalaq ġ‑tama n‑saɛir ar baɛl‑gad ġ‑talat n‑lubnan ġ‑tama n‑udrar n‑ḥarmun. yamẓ kullu igldan‑nsn yut‑tn inġ‑tn.

¹⁸ ussan ggutnin a‑immaġ yahušuɛ d‑igldan‑an.

¹⁹ ḥtta yat‑tmdint ur‑tskir sslamt d‑ayt‑israyil abla ayt‑ḥiwi lli‑izdġn ġ‑gibɛun. amẓn‑tnt kullu s‑imiġ.

²⁰ ašku iqṣad sidi rbbi a‑issiqar ulawn‑nsn aylliġ‑d‑ffuġn ad‑mmaġn d‑israyil baš a‑tn‑kullu‑laḥ, ifnu‑tn bla rrḥmt ġmklli‑f‑yuṣṣa sidi rbbi musa.

²¹ iddu yahušuɛ ġ‑uwssan‑an, isfiḍ ayt‑ɛanaq [lli‑igan iġzuyfa tjhhdnin] zġ‑iwrar, zġ‑ḥabrun ula dabir ula ɛanab, zġ‑iwrar n‑yahuda d‑iwrar n‑israyil kullutn, ifnu‑tn yahušuɛ ntni d‑tmdinin‑nsn.

²² ur‑sul‑iqama yan ġ‑ayt‑ɛanaq ġ‑wakal n‑ayt‑israyil. yili sul kra gisn ġ‑ġazza d‑gatt d‑ašdud.

²³ ġmkan a‑s‑yumẓ yahušuɛ akal‑an kullut, ġmklli‑s‑kullu‑inna sidi rbbi i‑musa. ifk‑t yahušuɛ i‑ayt‑israyil a‑ig lwrt‑nsn, baš a‑gis‑teṭṭaf kraygatt taqbilt taġamt‑ns. isunfu‑wakal ġakudan zġ‑imiġ.