yahušuɛ 10 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tbidd tafukt f‑gibɛun

¹ agllid n‑urušalim ism‑ns aduni‑ṣadaq, isfld f‑mamnk a‑yumẓ yahušuɛ tamdint n‑ɛay ifnu‑tt, isfld is‑skrn i‑ɛay d‑ugllid‑ns ġmklli skrn i‑ariḥa d‑ugllid‑ns, isfld ula f‑ayt‑gibɛun is‑skrn sslamt d‑ayt‑israyil zdġn ġ‑gratsn.

² iwrri yiksaḍ bahra, ašku gibɛun tga tamdint itjhhdn, tg yat ġ‑tmdinin n‑igldan, d‑nttat tugʷr ɛay, d‑irgazn‑ns gan kullu imdwas.

³ inkr aduni‑ṣadaq agllid n‑urušalim yazn s‑huham agllid n‑ḥabrun, d‑firam agllid n‑yarmut, d‑yafiɛ agllid n‑lah̬iš, d‑dabir agllid n‑ɛiglun, yini‑asn:

⁴ «aškat‑d tɛawnm‑iyi a‑n‑nakʷi f‑ayt‑gibɛun ašku skrn sslamt d‑yahušuɛ d‑ayt‑israyil.»

⁵ munn‑d smmus igldan‑an n‑ayt‑amur, a‑tn‑igan d‑ugllid n‑urušalim d‑win ḥabrun d‑win yarmut d‑win lah̬iš d‑win ɛiglun. awnn‑d ntni d‑ikabarn‑nsn, srsn ġ‑lgddam n‑gibɛun, akʷin‑in ilmma fllas.

⁶ aznn‑d ayt‑gibɛun s‑yahušuɛ ġ‑usras ġ‑gilgal inin‑as: «ad‑ur‑tflt imqasan‑nk. ḥarru tawnt‑d s‑darnġ, tɛawnt‑aġ tfukkut‑aġ, ašku munn‑d kullu fllanġ igldan n‑ayt‑amur lli‑iḥkamn ġ‑iwrar.»

⁷ yawn yahušuɛ ġakudan zġ‑gilgal ntta d‑inmmaġn d‑imdwas ḥaršnin kullutn.

⁸ yini sidi rbbi i‑yahušuɛ: «a‑ur‑zġ‑gisn‑tiksaḍt, ašku giġ‑tn ġ‑ufus‑nk. ur‑rad‑zġ‑gisn‑ibidd ġ‑umnid‑nk ḥtta yan‑urgaz.»

⁹ yawn yahušuɛ d‑mddn‑ns zġ‑gilgal, kn iḍ kullut ġ‑uġaras, aylliġ‑n‑fllasn ukʷin ġ‑yat tasaɛt lli‑ur‑ġaln.

¹⁰ issduyy‑tn sidi rbbi ġ‑lgddam n‑ayt‑israyil, rẓn‑tn tirẓi išqan ġ‑gibɛun, ẓẓun gisn ar agsar n‑bayt‑ḥurun, ar‑tn‑kkatn aylliġ lkmn ɛziqah d‑maqida.

¹¹ lliġ rwln ġ‑lgddam n‑ayt‑israyil, huwwdn sul ġ‑ugsar n‑bayt‑ḥurun, yut‑tn‑d sidi rbbi s‑iẓran mqqurnin zġ‑ignwan, ar‑tmmtatn ġ‑uġaras ar tamdint n‑ɛziqah. han ġwilli mmutnin s‑ibruri utin ġwilli nġan ayt‑israyil s‑uwzzal.

¹² isawl yahušuɛ s‑sidi rbbi ġassan ġ‑ifka sidi rbbi ayt‑amur ġ‑gr ifassn n‑ayt‑israyil. yini ġ‑umnid n‑ayt‑israyil: «bidd a‑tafukt f‑gibɛun, tqamat‑n ay‑ayyur f‑talat n‑ayalun,

¹³ s‑tbidd tafukt iqama‑wayyur, aylliġ rurn ayt‑israyil f‑inuwwašn‑nsn ġaylli skrn.» is‑ur‑ityara mayan ġ‑warra n‑yašar? tbidd tafukt ġ‑wammas n‑ignwan, ur‑tzrb a‑n‑tḍr ass kullut.

¹⁴ ur‑jji‑illi zund ass‑an ġ‑ma‑t‑id‑izwurn ula ġ‑ma‑ys‑d‑iggʷran, lliġ isfld sidi rbbi s‑wawal n‑yan igan bnadm, ašku hati immaġ sidi rbbi f‑ssibt n‑ayt‑israyil.

lmut n‑smmus igldan

¹⁵ iwrri‑d ilmma yahušuɛ d‑kullu ayt‑israyil s‑usras ġ‑gilgal.

¹⁶ imma smmus igldan‑an rwln rgsn ġ‑yan ifri ġ‑maqida.

¹⁷ ilkm‑d‑wawal i‑yahušuɛ: «hati nufa igldan s‑smmus rgsn ġ‑yan ifri ġ‑maqida.»

¹⁸ yini‑asn: «ssknukyat iẓran mqqurnin f‑imi n‑ifri, tgm fllas tiḍaf,

¹⁹ walaynni ad‑ur‑tmaṭlm ġin. ẓẓwat ġ‑inuwwašn‑nun, ar‑di‑ttbbim winna‑d‑yagurn, wala tudjm‑tn ad‑kšmn s‑tmdinin‑nsn. ašku rbbi siditun iga‑tn ġ‑ufus‑nun.»

²⁰ irẓ‑tn yahušuɛ d‑ayt‑israyil tirẓi išqan aylliġ‑tn‑kullu‑fnan. idrus ma‑iqaman irwl s‑tmdinin lli‑mi‑sutln igudar dusnin.

²¹ wrrin‑d ilmma mddn kullutn ġ‑laman s‑dar yahušuɛ ġ‑usras ġ‑maqida. ur‑sul‑iẓḍar yan a‑yini kra f‑ayt‑israyil.

²² yini ilmma yahušuɛ: «rẓmat imi n‑ifri ġilad, tawim‑d smmus igldan‑an s‑dari.»

²³ ssufġn‑tn‑d zġ‑ifri, awin‑as‑d igldan‑lli s‑smmus, agllid n‑urušalim d‑win ḥabrun d‑win yarmut d‑win lah̬iš d‑win ɛiglun.

²⁴ lliġ‑tn‑d‑iwin s‑dar yahušuɛ, iġr‑d yahušuɛ i‑irgazn n‑israyil kullutn s‑dars, yini i‑iriyasn n‑inmmaġn lli‑yadlli‑dids‑itmunun: «aškat‑d tsrsm iḍarn‑nun f‑imggraḍ n‑igldan‑ad.» aškin‑d, srsn iḍarn‑nsn f‑imggraḍ‑nsn.

²⁵ yini yahušuɛ i‑irgazn‑ns: «ad‑ur‑tiksaḍm ula tusim taġuft. gat‑n tiqqi tzɛmm, ašku ġmkad a‑ra‑iskr sidi rbbi i‑kullu inuwwašn‑nun nna‑di‑tmmaġm.»

²⁶ yut‑tn ilmma yahušuɛ inġ‑tn, agʷln‑tn ġ‑smmust‑tṣġarin. qaman tyagaln ġ‑tṣġarin ar tadggʷat.

²⁷ lliġ‑n‑tḍr tafukt, yuṣṣa yahušuɛ fllasn. zzugzn‑d ddat‑nsn zġ‑tṣġarin, luḥn‑tnt‑in ġ‑ifri lli‑ġ‑yadlli‑rgsn. ssmunn‑d fllasn iẓran mqqurnin f‑imi n‑ifri, ilin ġin sul s‑ġassad.

²⁸ ula tamdint n‑maqida, yumẓ‑tt yahušuɛ ġassan. yut‑stt nttat d‑ugllid‑ns s‑uwzzal imsidn, ifnu kullu imzdġn‑ns, ur‑gis‑ifil kra n‑yan iddr. iskr i‑ugllid n‑maqida ġmklli iskr i‑win ariḥa.

tinri f‑tmizar n‑ljanub

²⁹ izayd yahušuɛ, munn dids kullu ayt‑israyil. izri zġ‑maqida s‑tmdint n‑libna, immaġ d‑ayt‑libna.

³⁰ ig sidi rbbi tamdint‑an d‑ugllid‑ns ġ‑ufus n‑ayt‑israyil. yut‑stt s‑uwzzal imsidn nttat ula kullu imzdġn‑ns, ur‑gis‑ifil kra n‑yan iddr. iskr i‑ugllid‑ns ġmklli iskr i‑win ariḥa.

³¹ izayd ilmma yahušuɛ, munn dids kullu ayt‑israyil zġ‑libna s‑tmdint n‑lah̬iš. igli‑tt immaġ dids.

³² ig sidi rbbi lah̬iš ġ‑ufus n‑ayt‑israyil. yamẓ‑tt ġ‑wis sin‑uwssan, yut‑stt s‑uwzzal imsidn nttat ula kullu imzdġn‑ns, ġmklli iskr i‑libna.

³³ yawn‑d huram agllid n‑gazar ġakudan baš a‑iɛawn i‑ayt‑lah̬iš, imma yahušuɛ yut‑t ntta d‑irgazn‑ns aylliġ ur‑gisn‑ifil yan.

³⁴ izayd ilmma yahušuɛ, munn dids kullu ayt‑israyil zġ‑lah̬iš s‑ɛiglun. glin‑tt mmaġn dids.

³⁵ amẓn‑tt ġassan, utn‑tt s‑uwzzal imsidn. ifnu kullu imzdġn‑ns ġassan, ġmklli iskr i‑lah̬iš.

³⁶ yawn ilmma yahušuɛ, munn dids kullu ayt‑israyil zġ‑ɛiglun s‑ḥabrun. mmaġn dids,

³⁷ amẓn‑tt, utn‑tt s‑uwzzal imsidn, nttat d‑ugllid‑ns d‑iduran‑ns ula kullu imzdġn‑ns. ur‑gis‑ifil kra n‑yan iddr. iskr‑as ġmklli iskr i‑ɛiglun, ifnu‑tt nttat d‑imzdġn‑ns kullutn.

³⁸ iwrri‑d yahušuɛ, munn dids kullu ayt‑israyil s‑dabir, immaġ dids,

³⁹ yamẓ‑tt nttat d‑ugllid‑ns d‑iduran‑ns. yut‑tn s‑uwzzal imsidn, ifnu kullu imzdġn‑ns. ur‑gis‑ifil kra n‑yan iddr. ġmklli iskr i‑ḥabrun d‑libna d‑ugllid‑ns, ġmkan a‑iskr i‑dabir d‑ugllid‑ns.

⁴⁰ ġmkan a‑s‑yut yahušuɛ kullu timizar n‑iwrar ula tin lh̬la n‑nagab ula tin igsarn ula tin talatin ula kullu igldan‑nsn. ifnu kullu ma‑ġ‑illa‑unfus, ur‑ifil kra n‑yan iddr, ġmklli‑t‑yuṣṣa rbbi sidis n‑israyil.

⁴¹ yut‑tn yahušuɛ zġ‑qadaš‑barniɛ ar ġazza, yut kullu tamazirt n‑gušan ar gibɛun.

⁴² yamẓ yahušuɛ kullu igldan‑an d‑ikalln‑nsn s‑yat‑twal, ašku rbbi sidis n‑israyil a‑immaġn f‑israyil.

⁴³ iwrri‑d ilmma yahušuɛ d‑kullu ayt‑israyil s‑usras ġ‑gilgal.