yahušuɛ 1 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

sidi rbbi izzɛam yahušuɛ

¹ lliġ immut musa ah̬ddam n‑sidi rbbi, isawl‑d sidi rbbi s‑yahušuɛ yus n‑nuwn, d‑ntta ikka‑ttin iga amɛwan n‑musa. yini‑as sidi rbbi:

² «ġilad hay‑ah̬ddam‑inu musa immut. nkr kiyi ula kullu mddn‑ad a‑tbbim asif n‑urdun s‑wakal lli‑fkiġ i‑ayt‑israyil.

³ inna‑f‑n‑ttrsn iḍarn‑nun, hati fkiġ‑awn‑t ġmklli‑s‑qawlġ i‑musa.

⁴ winun a‑ra‑ig‑wakal zġ‑lh̬la ar idrarn n‑lubnan, ar asif imqqurn lli‑igan asif n‑furat, teṭṭafm kullu akal n‑ayt‑ḥit, ar amda imqqurn ġ‑tsga n‑umṭar n‑tafukt.

⁵ kullu ussan n‑tudrt‑nk ur‑ra‑yiẓḍar yan a‑d‑srk‑inkr. ha nkki, ġmklli lliġ d‑musa a‑ra‑dik‑iliġ. ur‑sar‑k‑in‑filġ ula wrriġ‑d fllak.

⁶ g‑n tiqqi tzɛmt, ašku f‑ufus‑nk a‑f‑rad‑ṭṭafn mddn‑ad akal lli‑f‑ggulliġ i‑id‑babatsn ad‑asn‑t‑fkġ.

⁷ ġir g‑n tiqqi tzɛmt bahra, trart lɛaql a‑tskart s‑ulmmud kullut lli‑f‑k‑yuṣṣa‑uh̬ddam‑inu musa. ad‑as‑ur‑tanft la s‑ufasi ula s‑uẓlmaḍ, f‑a‑tnjḥt ġ‑innas tddit.

⁸ a‑ur‑sar‑yitti‑warra n‑ulmmud‑ad zġ‑imi‑nk. ar‑gis‑tswingimt ġ‑iyḍ ula azal, afad ad‑bdda‑trart lɛaql a‑tskart s‑kullu ma‑gis‑ityaran. ġmkan a‑s‑rad‑bdda‑ttkmmalt ma‑ttqṣadt, d‑ġmkan a‑s‑rad‑bdda‑tnjḥt.

⁹ is‑ur‑k‑uṣṣaġ ‹g‑n tiqqi tzɛmt›? ad‑ur‑ttiksaḍt ula da‑ttasit taġuft, ašku rbbi sidik a‑ra‑dik‑yili ġ‑innas tddit.»

isawl yahušuɛ s‑ayt‑israyil

¹⁰ yuṣṣa yahušuɛ iriyasn n‑mddn‑ns yini‑asn:

¹¹ «zryat ġ‑wammas n‑usras tinim i‑mddn: ‹jjujadat tiram i‑ih̬fawn‑nun, ašku hati kraḍ‑uwssan a‑iqaman. ra‑tbbim asif n‑urdun ġakudan, tkšmm a‑teṭṭafm akal lli‑awn‑ifka rbbi siditun.› »

¹² isawl ilmma yahušuɛ s‑ayt‑rawbin d‑ayt‑gad d‑mnaṣṣ zġ‑tqbilt n‑manaššah yini‑asn:

¹³ «ktyat‑d awal lli‑s‑kʷn‑yuṣṣa musa ah̬ddam n‑sidi rbbi lliġ inna: ‹rbbi siditun ifka‑yawn maniġ a‑tsunfum, ifk‑awn akal‑ad.›

¹⁴ akal‑ad lli‑awn‑ifka musa ġ‑tsga‑yad n‑urdun, ġilad ra‑gis‑qamant‑tmġarin‑nun d‑tarwa‑nun d‑lksibt‑nun. imma kunni n‑irgazn dusnin, ra‑tbbim asif s‑ikabarn‑nun tzwurm i‑aytmatun ad‑asn‑ttɛawanm,

¹⁵ ard issunfu sidi rbbi i‑aytmatun zund kunni, ṭṭafn ula ntni ikalln lli‑asn‑ifka rbbi siditun. twrrim‑d ilmma s‑wakal‑ad‑nun teṭṭafm‑t. iga akal lli‑awn‑ifka musa ah̬ddam n‑sidi rbbi ġ‑tsga‑yad n‑urdun lli‑iwalan asġlay n‑tafukt.»

¹⁶ jawbn i‑yahušuɛ: «kullu ma‑f‑aġ‑tuṣṣat, ra‑t‑nskr, d‑innas‑aġ‑tuznt nddu srs.

¹⁷ ġmklli nsflid s‑kullu ma‑inna musa, ra‑srk‑nsflid ula kiyi. ġir a‑dik‑yili rbbi sidik ġmklli illa d‑musa.

¹⁸ wanna iɛṣan luṣiyat‑nk, yagʷi a‑isfld s‑wawal nna‑f‑ti‑tuṣṣat, hati illa fllas a‑immt. ġir g‑n tiqqi‑nk tzɛmt.»