ufuġ 9 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tagat ġ‑lksibt

¹ yini ilmma sidi rbbi i‑musa: «kšm s‑dar firɛawn tinit‑as awal‑ad: ‹ha ma‑inna wad bdda illan ig rbbi n‑ayt‑ɛibr. adj mddn‑inu ad‑ddun a‑yyi‑tqasan.

² walaynni iġ‑tn‑sul‑tumẓt tagʷit a‑ysn‑trẓmt,

³ ra‑yut‑ufus n‑rbbi da‑illan lksibt n‑wakal‑nk s‑yan‑waṭṭan bahra išqan. ra‑yili f‑iysan d‑iġʷyal d‑irɛman d‑imugayn d‑uwlli kullutn.

⁴ walaynni rbbi da‑illan ra‑iẓli lksibt n‑ayt‑israyil zġ‑tin ayt‑miṣr. ur‑ra‑tmmt ḥtta yat zġ‑kullu lksibt n‑ayt‑israyil.› »

⁵ izzga sidi rbbi tizi yini: «azkka rad‑skrġ mayan ġ‑wakal n‑miṣr.»

⁶ ndid azkka iskr sidi rbbi ġmklli‑s‑inna, tmmt kullu lksibt n‑ayt‑miṣr. imma lksibt n‑ayt‑israyil, ur‑gis‑tmmut ḥtta yat.

⁷ yazn firɛawn ma‑ys‑d‑itawin lah̬bar, yaf‑n lksibt n‑ayt‑israyil ur‑gis‑tmmut yat, walaynni sul iqqur‑uwl‑ns, ur‑irẓim i‑mddn‑an.

tagat n‑uh̬bitn

⁸ yini daġ sidi rbbi i‑musa d‑harun: «asyat‑d urawn n‑iġd zġ‑ufarnu, a‑t‑yall musa izuzzr‑t ġ‑lgddam n‑firɛawn.

⁹ ra‑iwrri ig agdrur yafufn f‑tmazirt n‑miṣr kullutt, iskr uh̬bitn šqanin i‑mddn d‑lbhaym, ar‑tbbaqin s‑arsḍ ġ‑wakal n‑miṣr kullutt.»

¹⁰ asin‑d iġd n‑ufarnu. biddn ġ‑lgddam n‑firɛawn, yall‑t musa izuzzr‑t, s‑iwrri iga uh̬bitn šqanin, ar‑tbbaqin s‑arsḍ ġ‑mddn ula lbhaym.

¹¹ isḥḥarn ur‑sul‑ẓḍarn ad‑biddn ġ‑umnid n‑musa s‑uh̬bitn lli‑gisn ntni d‑ayt‑miṣr kullutn.

¹² walaynni sidi rbbi issiqar ul n‑firɛawn, ur‑srsn‑isfld ġmklli‑s‑inna sidi rbbi i‑musa.

tagat n‑ibruri

¹³ yini ilmma sidi rbbi i‑musa: «nkr zikk ṣbaḥ, tbiddt ġ‑lgddam n‑firɛawn tinit‑as awal‑ad: ‹ha ma‑inna wad bdda illan ig rbbi n‑ayt‑ɛibr. adj mddn‑inu ad‑ddun a‑yyi‑tqasan.

¹⁴ ašku ġilad rad‑ssyagasġ ul‑nk s‑tagatin šqanin s‑uggʷar, kiyi d‑imɛawann‑nk d‑mddn‑nk, f‑a‑tissant is‑ur‑illi zund nkki ġ‑ddunit kullutt.

¹⁵ ašku mra is‑n‑yadlli‑srk‑mdiġ afus‑inu, utġ‑k kiyi d‑mddn‑nk s‑kra n‑waṭṭan inqqan, lukun laḥ‑kʷn ġ‑iggi n‑wakal.

¹⁶ walaynni mayad a‑f‑k‑udjiġ, f‑ad‑ak‑ssbayynġ taẓḍḍart‑inu. d‑ġmkad a‑s‑rad‑sfldn mddn f‑ism‑inu ġ‑ddunit kullutt.

¹⁷ imma kiyi ar‑ukan‑sul‑ttallt ih̬f‑nk f‑mddn‑inu, tagʷit ad‑asn‑trẓmt ad‑ddun.

¹⁸ hati azkka tizi‑ad ra‑n‑aznġ ibruri išqan. ur‑jji‑illi zund nttan ġ‑miṣr zġ‑isizwur‑ns ar ġilad.

¹⁹ zayd ġilad taznt ma‑d‑issmunun lksibt ula kullu ma‑teṭṭaft ġ‑igran, tšškšmt‑tn s‑untal. ašku ra‑yut ibruri mddn ula lbhaym nna‑illan ġ‑igran. d‑willi ur‑intiln ġ‑tgʷmma, rad‑kullu‑mmtn.› »

²⁰ yili ma‑yumnn awal‑an n‑sidi rbbi ġ‑imɛawann n‑firɛawn, ssrwln‑d ismgan‑nsn ula lksibt‑nsn s‑tgʷmma‑nsn.

²¹ imma willi ur‑tt‑yiwin ġ‑wawal n‑sidi rbbi, udjan‑in ismgan‑nsn ula lksibt‑nsn ġ‑brra.

²² yini ilmma sidi rbbi i‑musa: «mdi‑n afus‑nk s‑ignwan a‑iḍr ibruri f‑kullu tamazirt n‑miṣr, f‑mddn ula lbhaym ula f‑kullu ma‑d‑imġin ġ‑igran ġ‑wakal n‑miṣr.»

²³ imdi‑n musa aɛmud‑ns s‑ignwan, yazn‑d sidi rbbi iggign d‑ibruri ar‑d‑kkatn‑usmann f‑wakal, iffi‑d sidi rbbi ibruri f‑tmazirt n‑miṣr.

²⁴ iggut ibruri išqu bahra. ur‑jji‑illi wan ibruri‑an ġ‑wakal n‑miṣr zġ‑isizwur n‑tmazirt. zaydn‑usmann ar‑d‑kkatn zġ‑tsga‑yad ula h̬tad.

²⁵ izayd ibruri ar‑itkkʷm kullu ma‑illan ġ‑igran n‑tmazirt n‑miṣr kullutt, mddn ula lbhaym ula ma‑d‑imġin, irẓ kullu iṣġarn.

²⁶ imma akal n‑gušn lli‑ġ‑llan ayt‑israyil, nttan waḥdut a‑ġ‑ur‑illi ibruri.

²⁷ yazn firɛawn ma‑d‑yaqran i‑musa d‑harun s‑dars yini‑asn: «ha‑yyi ġilad jliġ. rbbi da‑illan ad‑dar lḥqq. jliġ nkki ula mddn‑inu.

²⁸ ḍalbat rbbi da‑illan, ašku yuwda‑yaġ zġ‑iggign n‑rbbi d‑ibruri‑ns. ra‑kʷn‑adjġ a‑tddum, a‑ur‑sul‑tqamam ġid.»

²⁹ yini‑as musa: «ġir a‑n‑ffuġġ zġ‑tmdint, ra‑n‑mdiġ ifassn‑inu s‑rbbi da‑bdda‑illan, bbin‑in iggign laḥ ibruri, f‑a‑tissant s‑ṣṣaḥt, ddunit tga tin rbbi da‑bdda‑illan.

³⁰ imma kiyi d‑imɛawann‑nk, ssnġ is‑ur‑ta‑trim a‑stti‑ttawim ġ‑rbbi‑ad igan wad bdda illan.»

³¹ han tizi‑an ityawhlak lkttan ula ṭumẓin, ašku ṭumẓin ar‑d‑ssufuġnt tizlfin, ula lkttan ijjujg.

³² imma irdn d‑uḍkkuy ur‑tthlkn ašku ur‑ta‑d‑mġin.

³³ izayd musa ifl firɛawn ġakudan iffuġ zġ‑tmdint, imdi‑n ifassn‑ns s‑sidi rbbi, bbin‑in iggign d‑ibruri, ur‑sul‑a‑d‑itffi‑unẓar f‑wakal.

³⁴ walaynni firɛawn, lliġ iẓra anẓar d‑ibruri d‑iggign bbin‑in, ijlu daġ. issiqar‑uwl‑ns ntta d‑imɛawann‑ns.

³⁵ han iqqur‑uwl n‑firɛawn, ur‑yudji ayt‑israyil ad‑ddun, ġmklli‑s‑inna sidi rbbi f‑ils n‑musa.