ufuġ 8 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tagat n‑igʷra

¹ yini‑d sidi rbbi ġakudan i‑musa: «kšm s‑dar firɛawn tinit‑as: ‹inna‑yak rbbi da‑bdda‑illan, adj mddn‑inu ad‑ddun a‑yyi‑tqasan.

² iġ‑tagʷit ad‑asn‑trẓmt, han rad‑utġ kullu tamazirt‑nk s‑igʷra.

³ ra‑iɛmmr‑wasif n‑nnil s‑igʷra, awnn s‑tgmmi‑nk ula s‑uḥanu lli‑ġ‑a‑tggant ula s‑tisi‑nk, kšmn s‑dar imɛawann‑nk ula mddn‑nk kullutn, kšmn s‑tfurna ula tiqṣray.

⁴ ra‑d‑fllak‑takʷin igʷra kiyi ula mddn‑nk ula imɛawann‑nk kullutn.› »

⁵ izayd sidi rbbi yuṣṣa musa: «ini i‑harun: ‹mdi‑n aɛmud lli‑illan ġ‑ufus‑nk s‑trgiw d‑isura d‑tmdwin, tssawnt‑d igʷra f‑wakal n‑miṣr.› »

⁶ imdi‑n harun aɛmud‑ns s‑waman n‑miṣr, awnn‑d igʷra ɛmmrn kullu tamazirt n‑miṣr.

⁷ walaynni ula isḥḥarn skrn ġmkan s‑ssiḥr‑nsn, ssawnn‑d ula ntni igʷra f‑wakal n‑miṣr.

⁸ iġr‑d firɛawn ilmma i‑musa d‑harun yini‑asn: «ḍalbat i‑rbbi da‑illan a‑n‑yasi igʷra flla nkki d‑mddn‑inu. rad‑adjġ mddn‑nun ad‑ddun ġrṣn ġ‑umnid n‑rbbi da‑illan.»

⁹ irar musa i‑firɛawn: «alġ ih̬f‑nk tinit‑iyi man tasaɛt trit ad‑ḍalbġ f‑ssibt‑nk d‑imɛawann‑nk d‑mddn‑nk baš a‑n‑fllak‑ittin igʷra, kiyi d‑tgʷmma‑nk, a‑ur‑d‑sul‑ssurfn ttmi n‑wasif.»

¹⁰ yini‑as firɛawn: «azkka.» irar‑as musa: «ġmkad‑s‑tnnit a‑ra‑yili, f‑a‑tissant is‑ur‑illi kra n‑rbbi zund walli bdda illan ig rbbi‑nġ.

¹¹ ra‑n‑fllak‑tyattayn igʷra kiyi d‑tgʷmma‑nk d‑imɛawann‑nk d‑mddn‑nk. ur‑sul‑rad‑d‑ssurfn ttmi n‑wasif.»

¹² iffuġ‑d musa d‑harun zġ‑dar firɛawn. iġr musa s‑sidi rbbi iḍalb‑t f‑ssibt n‑igʷra ġmklli‑s‑inna i‑firɛawn.

¹³ iskr sidi rbbi maylli‑as‑iḍalb musa, mmtn igʷra ġ‑tgʷmma d‑iswak d‑igran.

¹⁴ ssmunn‑tn d‑igudiyn aylliġ ȷ̈̇ȷ̈̇uȷ̈̇ȷ̈̇an tamazirt kullutt.

¹⁵ walaynni lliġ iẓra firɛawn tagat‑an tzri, issiqar ul‑ns yagʷi daġ a‑sul‑srsn‑isfld, ġmklli s‑inna sidi rbbi.

tagat n‑wabiba

¹⁶ yini ilmma sidi rbbi i‑musa: «zayd tinit i‑harun: ‹mdi‑n aɛmud‑nk, tutt ġ‑ugdrur n‑wakal f‑a‑iwrri ig wabiba ġ‑kullu tamazirt n‑miṣr.› »

¹⁷ skrn ġmkan, imdi‑n harun aɛmud lli‑illan ġ‑ufus‑ns, yut ġ‑ugdrur n‑wakal, yili wabiba f‑mddn d‑lbhaym. iwrri‑kullu‑ugdrur n‑wakal iga wabiba ġ‑kraygatt mani ġ‑tmazirt n‑miṣr.

¹⁸ irin isḥḥarn ad‑skrn wabiba ġmkan s‑ssiḥr‑nsn, walaynni ur‑ẓḍarn. hati illa wabiba f‑mddn ula lbhaym kullutn,

¹⁹ aylliġ nnan isḥḥarn i‑firɛawn: «askkir n‑rbbi ayad.» walaynni ul n‑firɛawn iqqur, ur‑srsn‑isfld, ġmklli‑s‑inna sidi rbbi.

tagat n‑izan

²⁰ yini ilmma sidi rbbi i‑musa: «nkr zikk ṣbaḥ, tbiddt‑n ġ‑umnid n‑firɛawn ġ‑tizi lliġ a‑d‑itffuġ s‑dar‑waman, tinit‑as: ‹ha ma‑inna rbbi da‑bdda‑illan. adj mddn‑inu ad‑ddun a‑yyi‑tqasan.

²¹ walaynni iġ‑ur‑trẓimt i‑mddn‑inu, ra‑n‑srk‑aznġ izan, kiyi d‑imɛawann‑nk d‑mddn‑nk ula tigʷmma‑nk. rad‑ɛmmrn izan kullu tigʷmma n‑ayt‑miṣr ula ikalln lli‑ġ‑llan.

²² ġakudan rad‑ẓliġ akal n‑gušn lli‑ġ‑zdġn mddn‑inu, a‑ur‑t‑lkmn izan. ġmkan a‑s‑ra‑tissant is‑lliġ ġ‑wammas n‑tmazirt‑ad nkki‑ad igan wad bdda illan.

²³ ġmkan a‑s‑rad‑ẓliġ mddn‑inu zġ‑mddn‑nk. tamatart‑ad, han azkka a‑ra‑tili.› »

²⁴ iskr sidi rbbi ġmkan, kšmn izan ggutnin s‑tgmmi n‑firɛawn d‑tgʷmma n‑imɛawann‑ns ula kullu akal n‑miṣr. thlk‑tmazirt s‑tugtt n‑izan.

²⁵ iġr‑d firɛawn i‑musa d‑harun s‑dars yini‑asn: «zaydat tġrṣm ġid ġ‑umnid n‑rbbi‑nun ġ‑miṣr.»

²⁶ irar‑as musa: «ur‑izri a‑nskr mayan, ašku tiġrṣiw lli‑mi‑ra‑nġrṣ i‑rbbi‑nġ da‑bdda‑illan, hati ḥrmnt dar ayt‑miṣr. iġ‑aġ‑ẓran s‑tġrṣiw lli‑darsn‑ḥrmnin, is‑ur‑ra‑ginġ‑ẓẓun s‑iẓran?

²⁷ iqqan‑aġ‑d a‑nmuddu tawada n‑kraḍ‑uwssan ġ‑lh̬la, a‑n‑nġrṣ ġ‑umnid n‑rbbi‑nġ da‑bdda‑illan ġmklli‑f‑aġ‑yuṣṣa.»

²⁸ yini‑asn firɛawn: «ra‑kʷn‑adjġ a‑tddum a‑n‑tġrṣm ġ‑lh̬la ġ‑umnid n‑wad illan ig rbbi‑nun, walaynni a‑ur‑n‑taggugm. dɛwat‑iyi didun.»

²⁹ yini‑as musa: «ġir a‑n‑ffuġġ zġ‑dark, rad‑ḍalbġ i‑rbbi da‑illan a‑n‑fllak‑yasi izan azkka, kiyi d‑imɛawann‑nk d‑mddn‑nk. walaynni a‑ur‑iyi‑daġ‑tġḍrt, tagʷit a‑tadjt mddn‑nġ ad‑ddun a‑n‑ġrṣn ġ‑umnid n‑rbbi da‑illan.»

³⁰ iffuġ‑d musa zġ‑dar firɛawn iḍalb sidi rbbi.

³¹ iskr sidi rbbi maylli‑as‑iḍalb musa, issitti‑n izan f‑firɛawn d‑imɛawann‑ns d‑mddn‑ns, aylliġ ur‑sul‑tqama ḥtta yat‑tizit.

³² walaynni firɛawn issiqar daġ ul‑ns tawala yaḍni, ur‑yudji mddn ad‑ddun.