ufuġ 7 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

musa d‑harun ġ‑dar firɛawn

¹ isawl sidi rbbi s‑musa yini‑as: «ẓr ġilad, han giġ‑k d‑zund rbbi i‑firɛawn, gġ gʷmak harun d‑zund nnabi‑nk.

² ra‑ttinit kullu ma‑s‑a‑ki‑tamrġ, yini gʷmak harun i‑firɛawn a‑yadj ayt‑israyil ad‑ffuġn tamazirt‑ns.

³ walaynni rad‑ssiqarġ ul n‑firɛawn. timitar d‑lɛjayb ggutnin a‑rad‑skarġ ġ‑miṣr,

⁴ imma nttan ur‑ra‑srun‑isfld. ra‑n‑gġ ilmma afus‑inu f‑miṣr, ar‑fllas‑kkatġ lḥkamat šqanin, ssufġġ‑d ikabarn n‑mddn‑inu n‑ayt‑israyil zġ‑miṣr.

⁵ rad‑issann ayt‑miṣr izd nkki a‑igan rbbi da‑illan lliġ‑n‑mdiġ afus‑inu f‑miṣr, ssufġġ‑d ayt‑israyil zġ‑gratsn.»

⁶ iskr musa d‑harun maylli‑f‑tn‑yuṣṣa, skrn kullu s‑wawal n‑sidi rbbi.

⁷ lliġ sawln s‑firɛawn, ilin dar musa tam id‑mraw (80) n‑usggʷas, ilin dar harun tam id‑mraw d‑kraḍ (83) n‑usggʷas.

⁸ izayd sidi rbbi yini i‑musa d‑harun:

⁹ «iġ‑awn‑inna firɛawn ‹mlayt‑iyi‑d kra n‑lɛjb›, tinit ġakudan i‑harun ‹asi aɛmud‑nk tluḥt‑t‑in ġ‑lgddam n‑firɛawn›, ra‑iwrri ig algʷmaḍ.»

¹⁰ ikšm musa d‑harun s‑dar firɛawn, skrn ġmklli‑f‑tn‑yuṣṣa sidi rbbi. iluḥ‑n harun aɛmud‑ns ġ‑lgddam n‑firɛawn d‑imɛawann‑ns, hati iwrri iga algʷmaḍ.

¹¹ iġr‑d firɛawn ġakudan i‑ayt‑tḥkimt‑ns d‑išuwwafn‑ns, skrn isḥḥarn n‑miṣr ula ntni ġmkan s‑ssiḥr‑nsn.

¹² kraygatt yan iluḥ‑n aɛmud‑ns, s‑han iɛmad‑lli wrrin gn ilgʷmaḍn. imma aɛmud n‑harun, hati iṣrṭ iɛmad‑nsn.

¹³ walaynni sul iqqur‑uwl n‑firɛawn ġmklli‑s‑inna sidi rbbi, ur‑srsn‑isfld.

tagat n‑idammn

¹⁴ yini ilmma sidi rbbi i‑musa: «han iqqur‑uwl n‑firɛawn, yagʷi a‑irẓm i‑mddn‑inu.

¹⁵ ddu s‑dar firɛawn zikk ṣbaḥ ġ‑tizi lli‑ġ‑a‑itffuġ s‑dar‑waman, tbiddt a‑k‑in‑yaf ġ‑tama n‑wasif, tasit ġ‑ufus‑nk aɛmud lli‑iwrrin ig algʷmaḍ,

¹⁶ tinit‑as: ‹yuzn‑iyi‑d srk rbbi da‑bdda‑illan, ig rbbi n‑ayt‑ɛibr, inna‑yak: adj mddn‑inu ad‑ddun a‑yyi‑tqasan ġ‑lh̬la. imma kiyi sul s‑ġilad ur‑ta‑trit a‑tsfldt.

¹⁷ ha ma‑yk‑d‑inna rbbi da‑bdda‑illan: ġmkad a‑s‑ra‑tissant is‑giġ rbbi da‑illan. aman‑ad n‑wasif n‑nnil, ra‑gisn‑utġ s‑uɛmud‑ad illan ġ‑ufus‑inu, wrrin gn idammn.

¹⁸ rad‑mmtn kullu islman lli‑gisn‑illan, iwrri iȷ̈̇ȷ̈̇u‑wasif. ra‑t‑tkrhun ayt‑miṣr, ur‑sul‑rad‑iḥmaln ad‑sun aman‑ns.› »

¹⁹ yini ilmma sidi rbbi i‑musa: «zayd tinit i‑harun: ‹asi aɛmud‑nk tmdit‑n afus‑nk s‑kullu maniġ llan‑waman ġ‑miṣr, ig‑iyt tirgiw nġd isura nġd timdwin nġd ifraḍn, ad‑kullu‑wrrin gn idammn.› rad‑ilin idammn ġ‑kraygatt mani ġ‑tmazirt n‑miṣr, ula ġ‑irukutn n‑ukššuḍ d‑win‑uẓru.»

²⁰ iskr musa d‑harun ġmklli‑s‑asn inna sidi rbbi. yall aɛmud, yut ġ‑waman n‑wasif ġ‑lgddam n‑firɛawn d‑imɛawann‑ns. wrrin‑kullu‑waman n‑wasif gn idammn.

²¹ mmtn kullu islman lli‑gisn‑illan, iwrri‑wasif iȷ̈̇ȷ̈̇u. ur‑sul‑ẓḍarn ayt‑miṣr ad‑sun aman‑ns. ilin idammn ġ‑kraygatt mani ġ‑tmazirt n‑miṣr.

²² imma isḥḥarn n‑miṣr ula ntni skrn ġmkan s‑ssiḥr‑nsn. sul iqqur‑uwl n‑firɛawn, ur‑srsn‑isfld ġmklli‑s‑inna sidi rbbi.

²³ igrawl firɛawn ġakudan iddu s‑tgmmi‑ns, imma ġaylli ijran, ur‑tt‑akkʷ‑gis‑yiwi.

²⁴ ayt‑miṣr ar‑kullu‑qqazn ġ‑tama n‑wasif n‑nnil ad‑afn aman mad‑ssan, ašku ur‑ẓḍarn ad‑sun aman n‑wasif.

²⁵ zrin ssa n‑uwssan tigira n‑ma‑yut sidi rbbi asif n‑nnil.