ufuġ 6 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

iqawl rbbi i‑mddn‑ns s‑ujnjm

¹ isawl‑d sidi rbbi ġakudan s‑musa yini: «ra‑tẓrt ġilad ma‑rad‑skrġ i‑firɛawn. ašku s‑ufus itjhhdn a‑s‑ra‑t‑rarġ a‑issufġ mddn‑ad, d‑ufus itjhhdn a‑s‑rad‑tn‑iṭṭay zġ‑tmazirt‑ns.»

² yini ilmma rbbi i‑musa: «nkkin a‑igan ‹rbbi da‑bdda‑illan›.

³ kkiġ‑ttin ssbayynġ ih̬f‑inu i‑ibrahim d‑isḥaq d‑yaɛqub s‑‹rbbi da‑iẓḍarn i‑kulši›. walaynni ur‑asn‑fkiġ a‑yyi‑issann s‑ism‑inu ‹rbbi da‑bdda‑illan›.

⁴ skrġ didsn lɛhd‑inu ma‑s‑a‑ysn‑akkaġ akal n‑kanɛan, a‑t‑igan d‑wakal lli‑ġ‑a‑tlulliyn gn gis iġribn.

⁵ imma ġilad sfldġ i‑tndra n‑ayt‑israyil lliġ‑tn‑gan ayt‑miṣr d‑ismgan, swangmġ‑d lɛhd‑inu.

⁶ mayan a‑f‑k‑uṣṣaġ a‑tsawlt s‑ayt‑israyil tinit‑asn awal‑ad: ‹nkkin a‑igan rbbi da‑bdda‑illan. ra‑kʷn‑d‑ssufġġ zġ‑ddu iẓaẓayn n‑ayt‑miṣr, fukkuġ‑kʷn‑d zġ‑tsmugit‑nsn, jjnjmġ‑kʷn‑d s‑umdday n‑ufus‑inu itjhhdn ula s‑lḥkamat‑inu šqanin.

⁷ ra‑kʷn‑gġ d‑mddn‑inu, gġ nkki rbbi‑nun. ġakudan a‑ra‑tissanm is‑giġ rbbi siditun lli‑kʷn‑d‑issufġn zġ‑ddu iẓaẓayn n‑ayt‑miṣr,

⁸ šškšmġ‑kʷn‑d s‑wakal lli‑f‑ggulliġ a‑t‑fkġ i‑ibrahim d‑isḥaq d‑yaɛqub, fkġ‑awn‑t a‑ti‑twrtm ula kunni. nkkin a‑igan rbbi da‑bdda‑illan.› »

⁹ isawl musa s‑ayt‑israyil s‑wawal‑an, walaynni ur‑srs‑sfldn, ašku ttyagas rruḥ‑nsn s‑tsmugit‑an išqan.

¹⁰ yini daġ sidi rbbi i‑musa:

¹¹ «kšm s‑dar firɛawn agllid n‑miṣr tinit‑as awal‑ad: ‹adj ayt‑israyil ad‑ffuġn tamazirt‑nk.› »

¹² imma musa irur i‑sidi rbbi: «han ayt‑israyil ur‑sri‑sfldn. mamnk a‑ra‑sri‑isfld firɛawn, nkki‑ad mi ur‑ġusn infurn‑inu?»

¹³ ġmkan a‑s‑isawl sidi rbbi s‑musa d‑harun f‑ayt‑israyil ula f‑firɛawn agllid n‑miṣr, yuṣṣa‑tn ad‑d‑ssufġn ayt‑israyil zġ‑wakal n‑miṣr.