ufuġ 5 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

izuyd firɛawn išqa s‑uggʷar

¹ iddu musa d‑harun ġakudan, kšmn dar firɛawn inin‑as: «ha ma‑inna wad bdda illan ig rbbi n‑ayt‑israyil: ‹adj mddn‑inu ad‑ddun f‑ad‑iyi‑skrn lɛid ġ‑lh̬la.› »

² irar‑asn firɛawn: «ma‑iga ‹wad bdda illan› aylliġ a‑ra‑srs‑sfldġ rẓmġ i‑ayt‑israyil? ur‑ssinġ wad bdda illan. uhu, ur‑rad‑rẓmġ i‑ayt‑israyil.»

³ inin‑as ġakudan: «iban‑aġ‑d rbbi n‑ayt‑ɛibr. adj‑aġ ġilad a‑nftu tawada n‑kraḍ‑uwssan ġ‑lh̬la, a‑nġrṣ ġ‑umnid n‑wad bdda illan ig rbbi‑nġ, a‑ur‑imil yut‑aġ‑d s‑waṭṭan nġd tiẓẓa.»

⁴ irar‑asn‑ugllid n‑miṣr: «mah̬ a‑musa d‑harun aylliġ tram a‑trẓmm i‑mddn zġ‑twuri‑nsn? wrryat ġilad dar‑twizi‑nun.»

⁵ izayd firɛawn yini‑asn: «hati ġilad ggutn mddn ġ‑tmazirt, tirim kunni a‑tn‑tssbiddm f‑twuri‑nsn.»

⁶ izayd firɛawn ġassan yuṣṣa iriyasn n‑ayt‑twizi d‑ingabaln‑nsn yini‑asn:

⁷ «a‑ur‑sul‑takkam i‑mddn‑an alim mad‑tggan i‑uṭṭibn ġmklli myurn ntni. adjat‑tn a‑ttidun ar‑d‑ssmunun alim i‑ih̬f‑nsn.

⁸ walaynni inyat‑asn ad‑sul‑skarn unšk lli‑yadlli‑skarn n‑uṭṭib. a‑ur‑asn‑tssrh̬um yat. ašku ɛgzn ntni, ġayan a‑f‑a‑tngmugn ar‑ttinin: ‹a‑nddu a‑nġrṣ ġ‑umnid n‑rbbi‑nġ.›

⁹ srsat‑n tawuri iẓẓayn f‑mddn‑an baš a‑srs‑tnhatafn bahra a‑ur‑sul‑tlhun s‑iwaliwn h̬wanin.»

¹⁰ ffuġn iriyasn d‑ingabaln n‑ayt‑twizi inin‑asn: «inna‑yawn firɛawn ur‑sul‑ra‑ywn‑yakka alim.

¹¹ zaydat kunni ar‑di‑ttawim alim i‑ih̬f‑nun zġ‑innaġ‑ti‑tufam, walaynni unšk lli‑yadlli‑tskarm n‑uṭṭib a‑rad‑sul‑tskarm.»

¹² akutn mddn ġakudan ġ‑wakal n‑miṣr kullut ad‑d‑ssmunun ilibi a‑ig alim.

¹³ ẓiyyrn‑tn iriyasn inin‑asn: «arayt‑d ġ‑wass ġunšk lli‑tskarm ġ‑lliġ yujad‑walim.»

¹⁴ zaydn iriyasn ar‑kkatn ingabaln lli‑ssbiddn f‑ayt‑israyil inin‑asn: «mah̬ aylliġ ur‑tkmmilm tawuri, ur‑tskirm ġassad ula igḍam unšk lli‑tskarm ġayd izrin?»

¹⁵ ddun ingabaln n‑ayt‑israyil s‑dar firɛawn, ssmummʷin fllas sqsan‑t: «mah̬ aylliġ a‑tskart ġmkad a‑sidi i‑imqasan‑nk?

¹⁶ ur‑a‑yġ‑d‑akkan alim, sul ar‑ttinin ‹skarat uṭṭibn.› ha‑yaġ nkkʷnin a‑išttan akuray imma mddn‑nk kiyi a‑f‑illa llum.»

¹⁷ irar‑asn: «lɛgz ayan, lɛgz a‑giwn‑illan aylliġ a‑ttinim: ‹a‑nddu nġrṣ ġ‑umnid n‑rbbi da‑illan.›

¹⁸ zaydat ġilad s‑twuri‑nun. ur‑ra‑ywn‑nakka alim, walaynni skarat unšk lli‑yadlli‑tskarm n‑uṭṭib.»

¹⁹ ẓrn ingabaln n‑ayt‑israyil izd tamukrist yʷh̬šnn a‑ġ‑llan ašku inna‑yasn: «a‑ur‑tssnaqṣm yat zġ‑ġaylli tskarm n‑uṭṭib kraygatt ass.»

²⁰ ffuġn‑d zġ‑dar firɛawn, afn‑d musa d‑harun biddn ar‑srsn tqln,

²¹ inin‑asn: «wa kunni, a‑d‑srun‑yaggʷ sidi rbbi, irar‑awn‑d f‑ġayd tskrm. ašku trurm firɛawn d‑imɛawann‑ns ḥašan‑aġ, tgm iẓḍi ifrsn ġ‑ufus‑nsn ma‑s‑a‑yġ‑nqqan.»

²² irar musa ġakudan udm‑ns s‑sidi rbbi yini: «wa rbbi da‑bdda‑illan, mah̬ aylliġ tzuydt tarfufnt i‑mddn‑ad? mah̬ a‑yyi‑di‑tuznt?

²³ zġ‑lliġ kšmġ s‑dar firɛawn ad‑srs‑sawlġ s‑ism‑nk, hati izuyd išqu bahra d‑mddn‑ad. d‑kiyi ur‑akkʷ‑tfukkit mddn‑nk.»